Diario Judío México
Ahhhhh estas mujeres judias de Sefarad !
Kerido Tio Moshon kon el baston.. Es para ti ke lo eskrivo !
YA ESTAAAAA… LA SAVOR MIYA !
Por seguro ke esta fraza fue dicha en los tiempos de muestros bistarapapus de la parte de una malavlada i se oye dayinda en muestros diyas….. Una mujer ke topa de dizir por kada persona i persona i se siente la mijor, la mas kapache, la mas savida ets… I puedeser ke es ansina… No lo savemos ! Lo ke savemos aki es ke no tyene la lingua en la aldikera para dizir ke no le plaze una komida ! Topar de dizir kozas negativas por las vizinas, la ernuera, akel, el otro, la otra no era i no es echo difisil para las mujeres del mundo entero i no solo para las sefaradias… I no es por esto ke no son balabustas alavadas, madres egzemplaryas i espozas keridas…. Azen parte de la tradisyon i de la kultura de sus entornos. Avlar ansina va endjuntos kon el dedikodu (habladurias) ke pueden de vedra danyar la persona i a vezes famiyas enteras… Los muestros diziyan “kitar el rey i meter el vezir !”. Mos puedemos figurar los rizikos i el peligro ke reprezenta esta dicha ke da por egzemplo “detronar un monarko i remplasorlo kon su konsejero !” Es el “lashon ha ra” ke la Ley Judia defende. Kon esto, no kale aprovecharse de la signifikasyon del lashon ha ra para ezvacharse de bushkar justisya o tapar las vedras. De toda manera, todo el tiempo ke no se trata de una ofensya direkta, mijor vale kayarse i no firyir las personas en sus orgulyos !
Komo puede ser esta mujer ? Tengo delantre de los ojos una mujer bastante avansada en edad porke las mansevas no tienen konfiyensiya en eyas-mizmas a este punto! Por seguro godrika, porke el mupak sefaradi i la savor de las komidas judiyas, nada de dieta, son alavadas en el mundo entero. No se puediya kedar delgadika dospues de los sinkuenta ke era una edad muy avansada en akeyos tiempos !
Mirava a estas mujerikas delgadikas i se selava de sus ermozuras i de sus manseves…. Se komparava i se sintiya aminguada ! No se plaziya delantre del espejo ! Es por esto ke a kada komida ke no le plaziya i munchas vezes por selos…. diziya YA ESTAAA… LA SAVOR MIYA !
Yo siempre oyi DE CHUPARSE LOS DEDOS i nunka klavos. Esto seriya el kontraryo de los dedos ! Kijiyendo dizir “Mizmo los klavos son mas savrozos de esta komida ! ”
Un ” Yihtiiii ” puede dizir munchas kozas tambien ensima de la savor de una koza !
Kon esta okazyon “todarabarabaraba” para los ermozos linkes ke me embiyash… Es un privilejyo de figurar en vuestra lista de amigos !
Karinyozamente
[email protected]
Artículos Relacionados: