De mi korason a los sielos….

Israel, mi amor, ke lo tope del D-io el ke te kere mal !…….

Ke no ayegen a alimpyarsen las manos suzyas
ke te echan roketas para derrokar tus sivdades,
tus kazas, tus guertas., la verdure de tus parkes,
para matar tu puevlo, ijos, ijas, madres i padres,

Ke lo topen del Di-o los ke keman tus bandyeras
I gritan “muerte a los Judyos” kon bozes altas
Ambezan a odyar I a assasinar a sus chikas kreaturas
Ni tienen ni deshan repozo kon solo maldad en sus almas.

Sharope blanco

YOM ATZMAUT

Es el uniko payis ke egziste en el mundo ke fiesta su aniversaryo
Dospues de aver yorado sus ermanos matados en el Holocausto
I yorado dospues, sus ijos ke kayeron defendyendo el patrimonio,
Las tierras ke Di-o dyo a los judyos para prosperar i siempre alavarLo.

Tornimos a muestras tierras aze poko, dospues de dos mil anyos!
Yegimos para arrebivirla i lavorar sus tierras, fraguar puevlos
Ken disho ke se iva tan ermozeyar ? De arenas, balsas i polvos
Una reyna iva naser… Poderoza i modesta, piyadoza en sus echos..

Sus enimigos no la deshan trankila… Sus ijos luchan para defenderla
Los enemigos se infiltran i terrorizan el puevlo, keren destruyirla
Atakan kon armas maldichas, vienen para matar sin konsiensya
Tantos i tantos muryeron, sufren firyidas ke kedaran toda la vida…

Israel es la flor del dezyerto, un oasis immenso, vedre i perfumado
Israel es un kanto ! Muzika de los hassidim i melodiyas del pasado
Todos kantan i baylan en la Fiesta de Independensya, mano en la mano
Luzes bolan en los sielos, una dulse freskor arrebive el padre i el ijo.

Noche de grande alegriya ! Noche de konfiensa i de amistad..
Yom Atzmaut… Israel selebra su idependensya, es esto la verdad !
Los enemigos i los antisemitos pueden nyegar la realitad
Ma Israel briyara siempre en el Medio Oriente i en absoluta libertad !