Dedikado a todos las personas, los amigos ke sienten, sentieron o sentiran ansina de sentimientos, emosyones kuando todo les parese maraviyozo i dezgrasyado en mizmo tiempo.
Afita, afita un diya kon kolores diferente de los otros diyas
Keres kayarte o gritar o simplamente kontar tus tormentas
Afita ke pensas a la soledad o a akeyas noches estreyadas
En el bodre del rio o en los boskes endjuntos kon las gazelas
Ansina es la vida…. Afitan tiempos ke gozas de todo
De las gottas de las luvyas kayendo sovre tu braso desnudo
De la golor del vedre i de la tierra mojada, kaminando solo
Tu perro, tu kompanyero siguiendo tu paso kon el ayre fresko.
Afita ke dezeyas enamorarte para oyir una alegre kampana
Konoser la savor del kafe ke se beve de la mizma tassa
Ver tu kamiza ke eya viste kuando se alevanta de la kama
Oyir los mizmos biervos noche entera fina la demanyana.
Afita ke te vas a kayar porke dingunos te oyeran
Portanto miles de kozas te persiguen, ma no entendyaran
Mijor es kayarte. Desha ke eyos se esfursen i te komprenden
El eskarinyo kema la tadre, yo te amo, ven a mi lado…. Ven !
Sharope blanco
Artículos Relacionados: