LOS JUGETES
Yo tengo selos ! No haz ve halila selos de lo bueno de los otros. Grasyas al Di-o no me interesa del todo. Puedeser porke tengo todo lo ke topo nesesaryo por una vida repozada i lo ke veygo en mi kaza me agrada…. Miro las flores, la verdura, mis animalitos…
Ay Tobi, el ke me mira de arriva del palo alto ande enkolgo mis bolsas, un pantalon de akel diya, una esharpa….. Ya entenditesh de kualo avlo! Yo lo yamo “Adam”. Benadam no puedeser porke no tiene alma. Benpalo tampoko porke no lo paryo un palo. Alora solo “Adam”.
– Tobi es el perriko blanko ke me trusho mi ijo antes munchos munchos anyos.
– Tengo “creamy” ke es el lonsiko savrozo ke se echa kon mi.
– Ay Felisya, mi gato blanko, asentada ensima de su kavesal enfrente de la puerta d’entrar i munchos otros ensima del raf (etagere)
Ke azen dia entero ? Dedikodu ! (Commerage – gossip !)
Me kitan ! Me meten !
Por la gente son djugetes. No para mi ! Azen partido de esta kaza i de mi vida. Les avlo, les konto, los abraso….i a vezes les grito todo lo ke no puedo gritar a los otros. Ma dospues todo se olvida i somos amigos de muevo… I…. no kale olvidar mi “lazy boy” ke es mi fotolyo el mas konfortable del mundo ! Komo se puede bivir sin un “lazy boy” , no me lo kero ni imajinar ! Barminan ! Me asento, durmo, komo, eskrivo, penso, miro la TV, do lisyones (lavoro) en sus brasos (!) i so la mas felis del mundo ! Ojas blankas para eskrivir, kalemes… (crayons) i todo esta justo.. No manka nada !
- ESKRIVIR I SHESHBESH (tavli) – Backgammon
Vos estava kontando ke tengo selos ! Komo no ? !!! Ay personas ke pueden i saven eskrivir kon bruido kon la TV, personas ke avlan en kaza, el bruido de la kaye, el telefon ke sona… la puerta…. Miliun “nada” ke te “arranka” a lo ke estas azyendo ! Yo no puedo ! Me se vazya todo en la kavesa ! Por esto prefero eskrivir de noche. Mas tadre, mas ermozo !
Agora esto dando razon a siertos eskritores ke se ivan “a la ida del Dio” para “kitar” sus livros. Puedeser i yo kale ke me vayga ande “ni gayo kanta ni perro grita “! Alora me ago i yo eskritora eh ? Muy shik de dizir “Moro en X u -un djehennem koy- (kazal ande se arapa el guerko) para eskrivir letras a SM ! De pishar de la riza ! No…. seryozo agora ! Komo ke los eskape mis livros si tengo el tino en jugar sheshbesh (backgammon) en el Yahoo del internet de la komputadora de mi kamareta ? !!! Esta komplikado…Si. Tenesh razon ma no es mi kulpa si la teknolojia lo fraguo ansina !
Estava dizyeno ke esto jugando tavli…Ayyyy ke me namoro yo por este djugo ! No es shakas lo mio ! Ay 4 anyos ke esto lazrando para tener un “rating” (puntos) komo se deve ! Grasyas al Dio ya lo allogri !
Esto djugando en ligas. 5 Ligas egzaktamente ande se azen torneos siempre. Dayinda no tengo un numero en los mijores del mundo para este djugo ma ya me muero ke me kero ir a los “opens” en Vegas. Deke no ? Un poko de mazal i yo, Sharope, me asento al trono
- RIYIR I YORAR
Ayyyyyyyy kuanto me plazyo kuando me disheron ke una dammika telefono para dizir ke se eskarinyo de mis eskritos porke se riye disho !…
Ke riyga siempre ma no se porke se ‘esta riyendo ! Yo so seryoza persona ! No eskrivo por riyir ma parese ke sale ansina…. Mas mijor 🙂 I a mi me plaze muncho riyir. Ay filmos ansina de riyir muncho ! Me tresalgo yo por eyos…En vezes todos se kayan i solo yo riyo…. Dospues me averguenso ! Ma mijor de yorar … No ? Un dia me afito ke me fui a un filmo i fue el kontraryo ! Estava la sola a yorar en el sinema. Deke no se… La gente no tienen mas piyadad parese ! Sus korason se les enduresyo, son komo las piedrizikas del bodre del mar ! El mio es muy blando porke me yamo sharope blanko, deve de ser, komo este asukar ke venden en los sirkos i en los parkes ande se van las kreaturas. Akeya koza grande de sukar en el palo ! Me namoro ! Solo ke pormodo de esto yoro mas de los otros i rio mas fasilamente. Riyir es kolay(fasil) ma ke azesh kuando yorash i vos olvidatesh la rida en kaza ? Mil guerkos del gehinnam ! Murir de soflamas ! Ya me tiene afitado i mijor no pensar en esto ! Agoro siempre kontrolo si tengo una rida antes de salir de kaza ! La gente kontrolan si tomaron sus sellular! Estos telefonikos chikitikos ke entran afilu el la aldikera de la kamiza !
Ke ermoza de koza ! Yo me iva merkar ma no tengo kon ken avlar afuera ! Alora… Para kualo ? Mirar lo i inyervarme porke no sierve a nada ? Avlo kon el telefon de kaza si tengo de menester i punto !
- HAYIM VITALI SADACCA Z”l I DR. BEKI BARDAVIT Z”l
Ayyyyyy no vo los dishe dayinda ? So loka de no aver kontado una koza tan importante ! Los konosi al sinyor H. Vitali Sadacca, el maestro de las poezias en ladino i su kerida mujer la sinyora Janet Sadacca. Vide sus eskritos enletras rashi i me empresyoni muy muncho. El sinyor Sadacca eskrive en Rashi komo estenografia !
Estava envitada ande eyos i estavan aya la sinyora Doktora Beki Bardavit i su espozo. Komo me plazyeron ! Estuve enkantada de konoserlos…No solo me plazyeron, los kije bien de los primeros puntos!
Yo so ansina…Kero bien del empesijo o nunka ! En vezes sale personas kon ken no me siento bien alora prefero no inkontrarme mas kon eyos…
Muy raramente afita ke los kero tanto bien ke no veygo ke no valen la pena del todo ! No embarasa…Torno a mi lugariko i ago komo si nunka egzistieron ! Siento el pezgo en mi korason por un sierto tiempo porke a dingunos les plaze yerrarse ansina !
Ya avli bastante… Es ke yo no se kedarme kuando tengo la pluma en la mano. Espero ke no vos enfasyi kon todo lo ke dishe i ke no inche ni una avyanika ! (Yo no lo penso ansina !) Ke seyga ! Ya lo se ke me keresh bien i vos plaze ke vos konte ansina…kuentizikos !
Lo mas importante es meldar en muestra lingua i akodrarse de palavras o ekspresyones ke mos se fuyeron kon el tiempo !
Artículos Relacionados: