Binyamin de Tudela nasio, segun ya lo indika su nombre, en la sivdad de Tudela, en el reyno de Navarra, en Espanya. El bivio en la segunda metad del siglo XII i es el mas importante viajador djudio de todos los tiempos.
A la vista ke el salio a esta aventura entre los anyos 1159-1167 i torno a Espanya entre los anyos 1172-1173.
El vijito en 190 sivdades en paizes de Evropa i del Oriente, demostrando un grande intereso enverso los djudios ke bivian en algunas de eyas, notando todo lo ke vido i oyo i deskriviendo sus situasion sosial, sus sentros de estudio i formas de vida, ansi ke las difikultades i reushidades ke eyos tuvieron en sus estadia en estos paizes.
A la vista, el livro de viajes de Binyamin de Tudela fue uno de los primeros manaderos, sino el primer manadero, sovre la demografia djudia en el mundo de akeya epoka. En su livro Sefer Masaot (Livro de Viajes) ke eskrivio en ebreo, topamos una muy kurta informasion sovre su vida. En desparte de ser un viajador i investigador, al pareser ke el era tambien komersante, prinsipalmente de piedras presiozas. Su livro empesa kon las sigientes palavras:
“Yo, Binyamin, ijo de Rabi Yona, de bendicha memoria, sali primeramente de mi sivdad natala Tudela, en direksion de Zaragoza, kamini a lo largo del rio Ebro asta Tortosa, i desde ayi kamini otros dos dias asta la antigua Tarragona ke se topa al bodre de la mar…
Despues de dos dias de kamino el yega a Barcelona sovre la kuala eskrive:.
“Topi una santa komunidad de djudios – ombres savios i intelijentes, komo Rabi Sheshet, Rabi Salomon i Rabi Abraham ibn Hasday. Vienen a su porto komersantes de todas las partes del mundo i de la Tierra de Israel tambien”.
A traves de Gerona el entra a la rejion de Provence, en Fransia. En Marseille, se embarka en su kamino a Italia i pasa por las sivdades de Genova, Pisa, Luca i Roma – sivdad en la kuala prolonga su estadia afin de gozar de su arkitektura i de los maraviyozos monumentos ke ay ayi. En Roma, eskrive el en su livro, biven unos 200 djudios onorables ke no pagan dasios i algunos estan al servisio del Papa Alejandro, entre eyos Rabi Daniel el Maestro i Rabi Yehiel, ke entran i salen libremente a su palasio.
Entre otras sivdades ke el vijito en Italia puedemos mensionar las de Napoli, Capua i Pozzolli. En esta ultima, konta el, del fondo de la tierra sale un djenero de azeyte ke yaman “petrolio” i ke emplean en inguentes i otros remedios.
Kaji en todas las sivdades de Italia por las kualas paso, entre eyas Trani, Bari, Taranto, Brindizi i Pulia, (ke le paresio ke era el “Tel Pul” mensionado en la Biblia), el se enkontro kon grandes komunidades djudias, en los terminos de akeya epoka, ke tenian un buen estado ekonomiko.
De Italia el kontinuo su viaje asta la izla de Corfu onde se enkontro kon el uniko djudio ke bivia ayi, Rabi Jose. Despues de dos dias de viaje por mar el yega a la sivdad de Arta, en Gresia, pasa por las sivdades de Epilon i Netulikon en su kamino a Patras i yega a Neofaktos, ke el yama kon su nombre espanyol “Lepanto”.
En fin el yega a la antigua i gande sivdad grega, Tabai, en el norte del paiz. El topa ayi una grande i muy aktiva komunidad kon una povlasion de unos 1000 djudios.
“Eyos son los mijores artizanos de Gresia en la produksion de vistimienta de seda i purpura. Entre eyos ay grandes savios en la Mishna i el Talmud, unikos en sus jenerasion, i a sus kavesera los rabinos Koti, Moshe, Eliya Tirotot i rabi Yoktan, i no ay mijores de eyos en toda la Gresia, a la eksepsion de Konstantinopla.” eskrive el en su diario.
En Gresia el vijita tambien en las sivades de Saloniko onde se enkontra kon unos 500 djudios, ke a sus kavesera se topa el Rav Samuel i sus dishiplos i es el enkargado de las relasiones de la komunidad djudia kon el rey. Saloniko, adjusta el, es lugar de opresion para los djudios ke se okupan en la manifaktura de seda.
Despues de 6 dias de kamino durante los kualos el paso por las sivdades Dimitrizi, Drama, i Kristopol el yega enfin a la kapitala del Imperio Bizantino, Konstantinopla, ke en akeya epoka estava basho el reyno de Manuel I. Impresionado por la ermozura i diversidad de esta grande i rika sivdad el deskrive ansi sus impresiones.
“No ay komo eya en dingun paiz – sivdad a la kuala yegan merkaderes de todos los kontinentes. Ayi esta la iglezia Santa Sofia. Ay tantas iglezias komo el numero de dias ke tiene el anyo. Los djudios estan reunidos en la parte de la mar Marmara. Ay ayi komo unos 2000 djudios i 500 karaitas. Ayi se topan tambien los savyos Rabi Avtalyon, Rabi Ovadya i otros mas. Las relasiones entre los djudios i los gregos no son tan buenas ma una koza es sierta: eyos son rikos, buenos i kumplen los preseptos ke les enkomenda la Tora. El nombre del lugar ande moran los djudios es Pera.”
De Konstantinopla, el kontinua en su viaje por via maritima,verso el Sud: traversa la mar Egea, pasando por la izlas de Samos i Chios ke tenian chikas komunidades, ansi ke Rodos onde avia una komunidad djudia de 400 almas kon a sus kavesera los rabinos Hananel i Eliya.
Despues de 4 dias de kamino el desbarka en la izla de Chipre, en la mar Mediterranea i se enkontra kon djudios ke mantienen los preseptos de la ley, kon un chika komunidad de karaitas i otros desendientes de djudios yamados epikorses, porke profanan el Shabat i tienen el alhad komo dia de repozo.
Kontinuando su kamino en la mar Mediterranea el yego a Beirut, paso a Tsidon ande se enkontro kon los druzos ke el deskrivio komo un puevlo ke bive en las montanyas i se eskonde entre los pinyaskos, no tiene rey i sus tierras yegan asta la montanya Hermon. Tienen una sola fiesta durante el anyo, durante la kuala ombres, mujeres i kriaturas se reunen i komen i beven endjuntos. Este puevlo era yamado Druzian.
Enfin Binyamin ariva a Tsor i de ayi a Akko – empesijo de su sejorno en Erets Israel. De Akko el viajo a Hayfa, ke el noto komo ‘Ha-Hefer, i del otro lado el Monte Karmel. Ayi en el monte, eskrivio el, se topa la kueva de Eliyau ‘Hanavi. Por Cesarea (Keisaria) el disho: esta es un sivdad muy ermoza, al bodre de la mar, fraguada por el imperador Augusto Cesar ke tambien le dio su nombre.
De Cesarea Binyamin de Tudela viajo al sud del paiz, yego a la sivdad de Lod ke era yamada en akeya epoka St.George i ande topo un solo djudio ke lavorava komo tintorero.
El torna al Norte, a Sebastia ke es Shomron, i rekonose el palasio de Ah’av, en ruinas. Ayi no topa djudios.
Enfin yego a Yerushalayim. “Sivdad chika, kon a su deredor tres murayas, i onde biven yishmaeles, jacobistas, arameos, gregos i tambien frankos. Ayi se avlan todas las lenguas de los goyim, de los non djudios.”
El deskrivio de manera muy exakta i sovresaliente a los Templares, el kuartier djudio, el Monte del Templo, los estables del Rey Shlomo, Yad Avshalom, el manadero de Shiloah i el Monte Sion, onde segun la leyenda, esta enterrado el rey David.
Bet Lehem i la tomba de Rahel Imenu, ansi ke Hevron, kon la Mearat ‘Hamahpela, ande estan enterrados muestros padres, los patriarkas, fueron las dos importantes sivdades ke el vijito despues de Yerushalayim.
Oy kuando viajamos kon muestros otos, i pasamos por Latrun, en muestro kamino a Yafo o Ramle, o abashamos verso el Sud del paiz, en kamino a Ashdod, Yavne o Ashkelon, ni mos damos kuento ke, siglos atras, por estos mizmos lugares, paso un viajador-aventurero ke no tenia a su dispozision el minimo konfor, kaminando a pie, o puede ser sovre mula o kavayo, sin tener ande repozarse i arefreskarse en el sol kemador o abrigarse del frio i luvya.
Despues de Erets Israel, Binyamin de Tudela, kontinuo su viaje pasando por Siria, paiz ke entonses estava basho dominasion turka. En Damasko el topo una grande i aktiva komunidad djudia ke kontava unas 3000 almas. De la sivdad de Alepo, en Siria, el pasa a Bavel (Irak), yega a la sivdad de Mosul onde se enkontra kon una grande komunidad, ke kontava 7000 abitantes i a sus kavesera el rabino Zakai ‘Hanasi, desendiente de la dinasitia del Rey David.
En Bagdad, eskrive el, ay unos 40.000 djudios ke biven en kalmo i repozo. La mayoria estudian en yeshivot i ay entre eyos grandes savios en la Tora.
Vijito en Persia, en Samarkand i en Buhara, despues de lo kualo se dirijo al Sud, traverso la mar Kolorada, desbarko en Afrika, paso el dezierto asta Assuan i yego asta Ismailiye i Cairo, en Ejipto. En Cairo, konto el, ay komo unos 2000 djudios i dos kales – uno para los de Erets Israel i otro para los djudios de Bavel.
Del porto de Alexandria en Ejipto, el salio a su kamino de retorno. No se save exaktamente kuando termino sus viajes, ma se pensa ke el torno a Espanya entre los anyos 1172-1173.
El nombre de Binyamin de Tudela es akodrado en muestra istoria komo el viajador djudio mas famozo, i su livro es konsiderado komo el manadero mas importante de la istoria de Israel en su epoka.
El viajador Israel Yosef Binyamin, ke bivio en el siglo 19, eskrivio el tambien, basho la enfluensa de B. de Tudela, un livro de viajes en el kual adopto el nombre de Binyamin el Segundo. Mendele Moher Sefarim (famozo eskritor en yidish ke nasio en Rusia kon el nombre de Shalom Yaakov Abramovich) eskrivio, en 1878, el livro “Masaot Binyamin ‘Hashlishi” (los viajes de Binyamin III), satira sovre un viajador djudio en el estilo de Don Kishot.
En las sivdades de Yerushalayim, Tel Aviv i Beer Sheva, ay kayes ke yevan su nombre i el poeta Natan Alterman eskrivio el poema “Masaot Binyamin miTudela” ke, kon la melodia kompozada por Naomi Shemer, devino un kante muy konosido i popular en Israel.
En 1998 el governo espanyol emetio una seria de timbros para la perpetuasion de la istoria de los djudios de Espanya, i uno de eyos fue dedikado a la figura de Binyamin de Tudela.
MUY BUENO. (Y)