A vezes, no muncho, afita ke avlo de kozas seryozas. Agora e esto aparejando otra ves a eskrivir ensima de un sujeto ke me depasa ! Ma esto sintiendo ke esto tambien me va salir komo me salio el judeo-espanyol ke yo nunka kreyi ke saviya ! No vos riej ! Es la verdad ! Lo djuro ! me salio ansina, naturelamente…sin darme kuenta ! Komo algun perriko ke metesh en la mar i supito se mete a nadar sin ke dingunos le ambezaron esto ! Ke mirakulo es la lingua maternal ! (granmama-al ! – paternal -vizindal !!!) i ke manera de memoria ekstraordinarya se tiene en la chikez ! Lo ke ize el otra dia no me akodro !
Dunke… Avlare de fanatizmo ! No komo en un livro akademiko (se eskrivyo miles de ovras sovre esto i yo no meldi dingunos de estos, ma komo lo veygo yo…en mi kavesika chika dospues de tantos anyos de eksperyensya… No es mi kulpa si no me engrandesi ! Yo lo veygo todo ansina, muy simple : Blanko es blanko i preto es preto ! El grizo yihtiiiii !
No me plaze , so namorada de kolores bivas !
Alora.. el fanatiko es el ke apartenense a un grupo de personas o el ke tiene una ideolojiya, una kreensya “por la kola !”. Lo apanya esta apartenensya por la kola (komo la kola de un gato) i ke afita ? Komo el gato ke se inyerva muncho, este fanatizmo empesa areskunyar a modrer i tener afilu dezeyos de matar a ken lo trava por la kola i dize : ” hmmmm yo le travi la kola pormodo de estoz fulanos ke no son komo mi ! No son komo mi ? Hmmmm son de basha kondisyon ! (Porke yo so el mijor de lo mijores, komo no !!!) No solo de basha kondisyon ma tontos i negros porke ansina nasyeron i meresen todo lo negro divinamente ! Porke si no les meresiya de estar debasho de mozotros, ivan a venir al mundo komo mozotros ! (Esto egzajerando para ke se de kuenta la persona ke kadar (fina ke punto) el fanatizmo es koza sin sentido i por siguro peligrozo/danjorozo !)
El mizo dize : Estos tienen otra relijiyon ! oyyyyy! Iniegan muestro profeta i lo ke mos rekomendyo muestro Dio ? Ke mueran ! No tiyenen derecho de bivir kon una enfamiya tan grande ! Ademas no son de los muestros – s’enrikeseron pormodo ke la Amerika los ayuda i por kavzo ke ay munchos de eyos en esta Amerika maldita ! Eyos i la Amerikia i Israel i todo el mundo kristiyano estan kontra de mozotros ! I yo, personalamente, i kon grande honor, para mostrar a mi padre, a mis ermanos i al mundo entero, para ke la leche de mi madre me seya halal i ke eya tenga la onor de ser madre de un ijo ke se va ir diraktamente al
Ganeden, bevyendo vino de las manos de las mallahitas siempre virjin, djuro ke los vo degoyar ! Los vo kemar bivos ! Los vo detruizir komo seya ! Vo azer saltar otobuses, eskolas, moradas, todo lo ke es posivle para matar lo mas ! I yo kon eyos shahid !
( KE NO AYEGEN PATRON DE TODO EL MUNDO – AMEN )
No se kere dicho kuantas almas se bolaron a los sielos pormodo del fanatizmo nazi! Otra vez esta kestion de ser diferentes, tener kustumbres ke no puediyan entender i akseptar ! No tolerar ajenos mismo si no eran ajenos, siendo habitantes de estos payizes por jenerasyones. Sin mensiyonar ke biviyan kon honor, ke eran edukados i ke eran personasde kariyera, savios, artistos, merkaderes, i gente buena ! Ma eran djudyos !
( KE SUS ALMAS REPOZEN EN PAZ – AMEN )
La pertenensiya a un grupo o a una ideolojiya i tomar esto por la kola ! Fanatizmo preto i desgrasyado, el manko de tolerensya, la negrigura ke durme profundamente ma ke se puede supito espertar para kavzar kozas ke l miente no puede akseptrar tan ez inkreyivlement krual i violente sin baryeras !
Fanatizmo de los konkistadores portugezes espanyoles kontra los indios de l’Amerika, kontra los djudyos ke biviyan en la Peninsula Iberika… Fanatizmo en Rusya ande mataron sin kontar todos ke teniyan una ideolojiya kontraryo al komunizmo… Fanatizmo en el Sud Afrika matando los pretos… Fanatizmo en Kongo, en Sudan… Agora en diya fanatizmo en Irak… Personas muryendo…muryendo en miles…en diez miles…en sienmiles… Sin pekado, solo por ser diferentes de kolor, en kreensya o en pertenensya !!!!!!
I…i…la diferensya entre los ashkenazis i los sefaradis ? Dos grupos diferentes ! Judyos sierto ma avlando i teniendo kostumbres o gizado diferente ! Aaaaaaaaah ! Es una kulpa ! Avlar yiddish ? Ke desgrasya ! Avlar ladino ! yikesssss.. Siiiiiiiii separar las sinagogas ! Tener eskolas i yeshivas diferentes ! Los muestros.. Eyos…ande mozotros se… Ande vozotros se…..
Verguensa ! Fanatizmo ! Manko de tolerensya, de intelijensya, de kultura, de edukasyon i de amor ! En Turkiya, (antes ke fui a Israel) konosiya lehlis. No saviya ke es ashkenazi. Eskenazi era solamente un nombre de famiya i no teniyan diferensya de los muestros… Los lehlis ken eran ? Bueno… judyos ma ya saves, dezmazalada !.. Se kazo kon un lehli ! Son suzyos ! La suegra kon el marido avlan esto..yiddish! Solo esto le mankava ! Yo.. a mi ija ! La degoyo por mi vida si me traye novyo lehli ! De ande para ande !
Humor ? Humor preta !
Kuando me fui a israel el mundo se kayo de boka a’basho ! Sefaradi, Mizrahi, Ashekenazi… me ambezi ke ay kastas ! En primero los yekes (de Almanya) dospues los Polonezos i los ke vinieron de Europa, de Amerika (entre eyos kaliya tambien eskojer ! De ke desendiyensa !) los sud afrikanos… Dospues los sefaradis de Gresya, Bulgaria i Turkiya.. Del Libano, Syria, Irak ( payises ande se avla el arabo ) dospues los djudyos de India i por fin los ke vinieron del Yemen i de la Ethiopa…..
Los Rusos ? Ashkenazes ? Blankos, enstruidos ? Brasos avyertos !
Ma…. Ya savesh ! Ay ke no son djudyos ? Ke importa ! Sus ijos seran ! No keren avlar Hebreo ? Se van a ambezar o mozotros mos vamos a ambezar el Ruso ! Fasil ! Lo estamos oyendo en todo los lugares i gazetas.. Ay programas de televizyon.. Empesa por meldar los nombres de los magazenes ! Agora esta yeno de lavorantes etranjeros kon ojikos estirados, rumanos, turkos arrankados.. Todo bueno..yo ? No ! No me esta plazyendo todo esto del todo ! Ken so yo ! (rogando para ke venga el diya ke no se va avlar mas de esto… se va efasar de las memoryas ! )
Mano kon mano, rogando lo mizmo, rogando para ke no se dezate muestra union i ke siempre seya prezente entre las nasyones del mundo, ke tengamos la frente alta i el orgolyo de aparteneser a una nasyon nombrada por su djustisiya, su fuersa, su kultura i su unifikasyon ! AMEN I AMEN.
Artículos Relacionados: