Dos grandes personalidades sovresalen de entre los djudios de Espanya ke a la fin del siglo XV duvieron eskojer entre la konversion a la relijion kristiana o la ekspulsion. Eran estos Don Isaac Benvenisti, konsejero del rey Fernando i de la Reyna Isabela, i Don Avraam Senior, ke komo Rav de la Korte era el djudio kon mas alto titolo en toda Espanya.
Ya se save ke los dos intervinieron serka del rey i de la reyna, en Granada, demandandoles de anular el edikto de ekspulsion. Kuando sus demanda fue rempushada i tuvieron eyos tambien ke desidir kualo azer, Don Isaac Abravanel eskojo el exilo, renunsiando a todo lo ke avia alkansado a lo largo de su vida, ma Don Avraam Senior tomo el kamino opozado. El aksepto de konvertirse i fue baptizado kon grande pompa, en prezensia del rey i de la reyna, tomando el nombre de Ferrad (Fernando) Perez Coronel.
Ke paso kon sus desendientes? Es ke kontinuaron todos el kamino de sus avuelo o es ke uvo tambien algunos ke retornaron al djudaizmo? Oy ya savemos ke una parte a lo menos de sus desendientes emigraron de Espanya a otros paizes, tornarona la relijion djudia, a vezes kon la alkunya de Senyor o uno de sus derivados, i a vezes kon la alkunya Koronel.
Una anekdota muy interesante sovre una de estos desendientes fue kontada, en un artikolo publikado en la prensa israeli, por la eskritora israeli ‘Hodaya Bend, de la 17ena jenerasion de desendientes de Avraam Senior.
Eya konta, en este artikolo, ke viajo a Espanya, entre otras, afin de bushkar materiales para un livro ke pensava eskrivir i tambien para ver la kaza ande bivio su avuelo. Bushkando informasion sovre este tema eya embezo, entre otras, ke en el palasio de Avraam Senior, en Segovia, ke fue restorado por la UNESCO i la Munisipalidad de la sivdad, uvo en su tiempo un kal. Eya tenia tambien informasion, de istoriadores en Israel, ke Senior uzava abashar de una las salas en el segundo etaj de su kaza, a este kal ande uzava azer sus orasiones.
En Segovia eya deskuvrio ke la metad de este palasio avia sido transformado en un monasterio fransiskano. Eya entro a la otra metad, ke es un muzeo, i demando de una de las empiegadas en la butika de suvenires si tiene un livro sovre Avraam Senior. A la demanda si save de ken se trata, respondio de “si” adjustando ke eya es su desendiente.
La reaksion fue inkreivle. La empiegada la bezo i la abraso i la yevo al departamento de kultura de la munisipalidad onde todos, inkluzo el mayor, ke fue yamado mas tadre, la resivieron kon muncha kalor i afeksion, le dieron un gia para vijitar el lugar i darle toda la informasion ke dezea; ma kuando disho ke kere ver el kal de Avraam Senior. el gia respondio ke no konose un tal kal i ke a lo mas Don Avraam Senior azia sus orasiones kon un chiko minyan en su propia kaza.
Frente a su obstinasion el gia empeso a telefonar i preguntar i le disho: “Vo ver kualo pueo azer. Tengo buenas relasiones kon la djente del monasterio i vo demandarles de ayudarmos.”
El reusho i al dia de despues eya, su marido i el gia entraron al monasterio por una chika puerta. Eya demando si ay ayi una sala de orasiones i el gia lokal los yevo a traves una seria de koridores a una grande sala ande, de la parte derecha avia la azara de las mujeres kon simbolos de Magen David, i enfrente – la bama i el eihal. Paresia komo si agora solo venia de salir de ayi el ultimo yahid, a la fin de las orasiones.
Todos los prezen- tes kedaron maravi-yados i emosionados siendo ke dinguno no kreia ke ivan a topar ayi un kal. En el lugar ande devia estar el eihal ay agora un altar kon la kruz. El portero disho ke todo kedo lo mizmo sin dingun trokamiento salvo por el fakto ke de antes esta kamareta no tenia ventanas.
Eya demando tambien si ay unas eskaleras, i en efekto la yevaron, al lado de una de las paredes onde avia una eskalera, por la kuala probablamente abashava Avraam Senior de su kaza.
Este interesante artikolo es una prova mas kuanto keda ainda a bushkar i a investigar para konoser todos los aspektos de la istoria i kultura de los djudios ke bivieron en Espanya asta sus ekspulsion, en el 1492, despues de lo kualo fueron kaje kompletamente ulvidados i es en los ultimos anyos solamente ke es echo un esforso para rekonoser sus rolo i kontribusion a la istoria de Espanya.
Artículos Relacionados: