El hombre teniya un papagayo intelijente i muy ermozo !
Pasava el diya en frente de la ventana a mirar lo ke afitava afuera i se ambezava munchos biervos ke oyiva okazyonalmente.
Un diya pasaron abasho mansevos de la siedra ke estavan gritando :
“Kale ke este puevlo aga revolusyon !”
REVOLUSYON REVOLUSYON !
Muestro papagaya se ambezo el biervo pishin.
Un diya dospues, pasaron los mansevos de la derecha !
El papagayo empeso REVOLUSYON REVOLUSYON !
Asuvyeron los mansevos a kaza i rompyeron todo !
El hombre se sorprendyo muncho kuando entro a kaza de su echo i se ambezo de los vizinos lo ke afito !
Tres diyas dospues pasaron de abasho otra vez los mansevas de la siedra. El pasharo muestro empeso a dizir lo ke se ambezo de los de la derecha !
“EL MOVIMYENTO DEL PUEVLO NO SE PUEDE IMPEDIR !”
Asuvyeron los mansevos a kaza i no desharon ni kupa ni plato sano en kaza…Arazgaron todo !
Kuando el hombre torno a su kaza vido ke otra vez todo estava d’arriva abasho ! Aferro el papagayo i lo enkasho al kumes/gallinero
Las gaynikas, todos los kokorikos, empesaron a burlarse del povreto ! Kokoko kikiki!
– Ke tal artizto ! Saviyas mirarmos de la ventana diya entero…. Ke te afito …. Kokoko kikikik !
– Kayavos p….sin verguensa ! Baratas eskovas de kaye ! Yo no esto aki por irme kon vedre i seko ! Esto aki en prizyon, i malhorozamente kon vozotros, por delito de pensamiento !
KE RIYAMOS SIEMPRE KON KEYF !
Artículos Relacionados: