En memoria de mi bienamado amigo ke mos desha la vida buena, membro de SEFARADIMUESTRO, COBERT ROHAN Nice – Fransia alias Robert Cohen Z”l
Cobertiko,
Deke no mos eskrives poeziyas
poeto de mi korason?
Tu pluma kanta las rikezas
de tus sentimientos en prizyon !
Liberalas ! Kontamos tus penas,
tus alegriyas, amores del kashon…
Avre los almaryos ande guadras
Las amarguras i tu emosyon…
ESPERANSA EN EL
Amigo.. Sufrites en los duros anyos..
Olvidate de las dolores, todo paso !
No mos arrovan mas muestros keridos
Es un mundo loko ma no tenemos espanto.
Mozotros no veremos diyas dezgrasyados
a muestra edad, aserkandomos del Repozo !
Es un mundo de firyidas en el kual bivimos
Unos estan al abrigo, otros siempre en peligro !
Deke peryemos esperansa i dezesperamos ?
El Puevlo Judyo siempre se salvara del enemigo !
Es la Alliansa en la kuala mos kreyemos
SU Puevlo sovrebivira i sera duenyo del Destino.
En muestra larga historya no mos mankan egzemplos
Fuimos esklavos, egzilados, torturados ma ken kedo ?
Todos dezaparesyeron en miles i miles de anyos
El Puevlo Judyo kedo… Siempre mas fuerte mas rezyo !
Mos arrekojeremos en muestro payis !
Ke los mansevos tornen a las Tierras Santas !
Israel es la esensya, la seva de muestra rayis
Es de Eya ke bevemos la leche de las fuersas
Es Eya ke mos avre sus brasos i mos aze felis
Es pormodo de eya ke muestras kavesas estan altas
Le daremos todo i muestra vida mizmo in extremis
Sin hezitar seremos heros muertos para sus tierras !
Sharope blanco
31 de Julio 2012
————————————
NO LO PUEDO OLVIDAR
No te aravies, amiga mia,
Si te digo los yoros mios
A meldar tu longa poezia
Alavando amor de ninios.
Dio de la tiera i Dio del Sielo,
Dio de bendision i de tsedaka,
Porke mos echates tanto fielo,
Madres d’Aushwitz i Treblinka?
No kedi de yorar, los anios de mi vida
Milion kinienta mil, mis amigos de juego,
Io sobravivi, eyos son boka muda,
Kiero dezir aki ke bivieron kon mi.
Se yamavan Shimon, Salvador i Franko,
Teniyan ermanikas kon kara lympia i pura
Los guerkos los echaron, los izieron estierko,
Sin ke muestro Hachem mos abolte la kara.
No puedo mas sentir los kantos del amor,
Madres judiyas lokas, patetikas i amantes,
Korazon kaldo solo kema mejor
A la ora kruela de la muerte ardiente.
Dime ke soy hazino, porke no puedo ver
Madre bezando ninio, komo koza normala,
Mujeres de mi puevlo no tuvieron poder
De bevir esta paz de rizas kriaturas.
Se dize ke el Dio mos izo a su semeja,
El ombre dio atras el mizmo atamiendo,
Dio la kara del Dio al guerko asasino,
I mos kito del alma alguna esperanza.
Cobert
31.7.12
Sharope Blanco
Sefaradimuestro
Artículos Relacionados: