LEHAYIM !
Por seguro ke me namoro por todo lo tradisyonal i las Fiestas de Navidad en el mundo Kristyano… Komo no ? Es tan koloryado kon tanta luz i tan attraktivo ke no es posivle de no enkantarse en estos diyas de alegriya komun. Lo ermozo en estas fiestas, en todas las relijyones, es la innosensya de la persona, ke todo en savyendo ke son solo agadas para kreaturas, se desha emborrachar por la ermazura, los regalos, las komidas de fiesta, las dekorasyones i la atmosfera pozitiva ke renya en todos los lugares!
Lo ke importa es lo ke se tiene en el korason i no en ke fe se nasyo. Lo ke se ambezo la persona en su chikes i ke sigue karesando en su alma porke da repozo a la konsiensya, le plaze i aze parte de su vida.
Ande mozotros es lo mizmo. Somos attados a muestras tradisyones porke komo kada uno i uno somos konvensidos ke tuvimos mazal/suerte de aparteneser a la kaza de Israel, el primer puevlo monoteisto en el mundo ke eksperiyensyo las mas kruelas ekperiyensyas en la Historya i no solo durante la inkizisyon i el nazizmo i los progromes de Rusya ma en inkontavles dezgrasyas ke al lugar de aneantisirlo le diyeron mas fuersa i mas voluntad de sovrebivir, adelantar mas, guadrar i defender muestro chikichiko patrimonio mizmo si estamos entornados de puevlos ke djuran al sangre por muestra muerte….
Las fiestas, todas en el Judaismo son dias de rekuerdo de penas i sufriyensyas komo Pesah ke mos akodra la salida de Egypto ande estuvimos siervos esklavos de Pharaon. Hanuka los diyas de destruksyon i muerte, Purim, el dekreto de la muerte ke se troko en fiesta, entre Roshashana i Kipur los diyas ke demandamos pedronansiyas al Todo Poderoso por las errores ke kometyeron muestros ansestros en el dezyerto (la vaka de oro mallograda !) i Diya de Shoa (Holokosto) Diya de Zikaron (Soldados muertos por Israel) i el Diya de Independensya ke kon la alegriya mos akodra ke dayinda no terminimos i no tenemos paz en muestras tierras de las kualas mos keren arrondjar para otra vez no tener patria no tener muestro hogar muestra bandiera amada i Tsahal, la fuersa armada i spiritual de Israel, de muestros mansevos ke saven ke si no dan sus vidas, estos salvajes pueden entrar en sus kazas i azer las mas kruelas torturas a sus paryentes, sus mujeres i ijos, sus amigos, sus vizinos komo afito en Mumbai i en tantos lugares otros…
Tenemos tambien el derrito de egzistir en muestras tierras komo un puevlo en este mundo. Israel es el uniko payis Judyo en el mundo i es muestra honor, muestra fuersa de egzistensya, muestro nido, la erensiya ke arresivimos de muestros padres, de sus tierras ke por fin son muestras oy, i kedaran muestras fina ke el d’alkavo judyo sera bivo. Muestras fiestas son todo esto, la emuna/kreensya total ke tenemos en Elohim, muestro Di-o , Uniko en su Reynado en la Sielos, EL ke siempre alavamos Su Gloria, i a ken rogamos por la Unitad de Israel, muestra salud i egzistensya.
Kon karinyo
[email protected]
Artículos Relacionados: