Diario Judío México - Filozofo de grande fama, kritiko kultural, poeto, muzisyano, filolojisto Aleman,  skolaryo de Latino, grego, Fransez i Hebreo, Profesor de la Universitad de Basel  a 24 anyos solo, se retiro en 1879  pormodo de problemes de salud.  A 44 anyos peryo sus kapasitades mentales.  Nunka se kazo i fueron en primero su madre i dospues su ermana ke lo sostenyeron en sus hazinuras toda su vida. Su ovra toka el  antisemitizmo i el nasyonalizmo.  Fue influensado por Schopenhauer, Wagner i Goethe.  Wagner i su espoza i tambien Franz Listz eran entre sus mijores amigos.   El mundo se inspiro de el por el arte,  la filolojiya, la historya, la relijyon, la kultura, la siensya, la literatura, la psikolojiya, la politika, la kultura popular, estudyando su filozofiya kontinental komo el egzistensyalizmo, la post-modernizasyon i el post-strukturalizmo.  Unos kuantos sovresalyentes elementos  de su filozofiya son su kritika radikal sovre la vedra, su kritika genealojika de la relijyon i la moralitad kristyana i su teoriya relasyonado sovre la moralitad del patron-esklavo, el nihilizmo, el poder del humano para estar en kontrol de la vida sosyal, de la kultura i de los kontekstos morales para yegar a muevas valores.

 

–  Mas la persona es fuerte i mas esperansas

tendra del amor.

 

– Los penserios no son nada mas ke las ombras

de muestros sentimentos –  Siempre mas

aleskuros, mas vaziyos i mas simples…

–  La fe es no kerer konoser las vedras

–  Kuando esto yegando mas ariva, un perro

ke se yama  “ego”  me va persiguiendo

Friedrich Nietzsch

 

LA VIDA

No Diras  “Kedate”   a alguno ke se esta indo

Si no,  pensaran ke sos  dezmazalado…

Dizir “Vate”  a uno ke se esta kedando

No es otra koza ke ser un deskarado !

 

Dizir  “Torna”  a uno ke se fue

Es ser flako i no se aze !

Ma kale ser de vedra noble

Para  dizir a alguno “vate”

Si de vedra lo merese….

 

No des mas valor de lo ke les vale, a dingunos

Sino seras tu el ke no tiendra valor a sus ojos !

Pensa, ken puede dar mas pena a tu alma

Mas de tu mizmo kon una ravya no kontrolada

Ken inchira tu vaziyo si sos tu ke te syentes sola

Ken se aserkara de ti si es tu boka ke lo rechesa ?

 

Ken tokara tu korason i va azerte felis de muevo

Si tu no lo keres o no te sientes pronto para esto ?

Ken puede amarte si no te amas a tu mizmo ?

 

Todo empesa kon ti i se termina en ti, ya lo saves !

Basta ser fuerte, ke no konsumas, no te konsumes,

I no deshes ke derroken tu keyf i tu alegriya de bivir.

 

Konosi en la vida el amor, el Eden i el Infierno

El fuego de la passion i  kualo es el renunsyo

Estava en sena i los otros miravan del primer rango

Si,  jugi…. Ma meldi, meldi,  lo meldi  de muevo

Era tan komplikado ke no entyendi kualo era mi rolo.

 

En kaza, me topi avlandome a mi mizmo, solo !

Sintiya la ravya buyir en mi, dospues estava kalmo…

A vezes estava riyendo, todo me paresiya komiko !

 

El tiempo paso i me dishe :  Apprometeme agora

Si amas la mar, amaras tambien las olas, la tempesta

Los ventos, el kalmo, los pishkados, las rokas i la arena.

Si bives kon espanto,  solo puedras kontemplar la vida

 

Ke vida !  Konosi  los d’alkavos viajes muy presto

No saviya ke eran tan presyozos los mezes, el tiempo,

Agora lo se, ago las kozas presto presto solo por esto

 

Si keres ser amado, en primero te amaras a tu mizmo

Si saves bolar,  tus brasos ekstendidos, sin espanto,

Te ambezaras tambien a kayer de boka abasho !

Agora lo komprendi.

 

  1. NIETSZCHE (1844-1900)

Traduizido i adaptado por

Sharope blanco

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.