Diario Judío México - Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 16 de djunyo, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.

Oy kale ke sepash ke muestro amigo Jose Poveda, ke mora en la isla Gran Canaria i ke es myembro de Ladinokomunita, me izo el grande plazer i onor de eskrivirme para felisitarme de unas kuantas emisyones ke ize, entre eyas una sovre la atadura de Itshak.

I estos diyas me eskrivyo para propozarme de avlar sovre la perasha Aazinu, ke es el kapitulo 32 de Devarim, ande Moshe Rabenu, poko antes de morir, arrekoje todo el puevlo i le avla de manera profetika. Le arrespondi ke yo no era haham, ni mismo djudyo praktikante, solo un otodidakto kuryozo, ama ke sovre Haazinu no saviya nada, i mijor seriya si el empesava de eskrivir sus penseryos sovre esta perasha.

El acheto i me embiyo sus propyos penseryos. Los vo meldar agora sin trokar un byervo, i solo despues vos dare mis sentimentos personales, ke, komo lo vash a oir, van bastante a la kontra de lo ke mos dize Jose Poveda.

Ama en primero empesaremos de meldar lo ke mos dize Poveda. Ansina empesa:

LA SINYIFIKASION DE HAAZINU

Devarim 32:1-52

Haazinu (eskuchad) es un kanto redaktado por Moshé Rabenu por enkomendanza de el Dio para avertir a los Benei . Es un kanto triste de mal augurio. El Dio ke todo lo save, ya de antes saviya lo ke teniya ke afitar kon los Benei , por eso le dishe a Moshé ke su muerte está serka, ke pronto deskansara kon sus padres, i ke el puevlo de siguira a otros dioses estranyos, i ke va romper el akordo ke izo con El, ma ese diya los va abandonar, va eskonder su kara de eyos y seran eliminados por todas sus negruras.

Y le disho presto el Dio a Moshé “i agora eskrivid este kanto para ensenyarlo a los Benei poniendo es su boka este kanto como testimonio miyo kontra eyos” Devarim 31:19.

Rabí Eljanan Wasserman eksplika estos konseptos en su ovra Kovetz Maamarim:

« I agora eskrivid este kanto…… » Aki se dan tres komandamientos: 1) eskrivid el kanto ; 2) ensenyar al puevlo de su sinyifikasion i 3) ponerlo en su boka.

I entónses kanto Moshe delántre de los oyidos de todo el puevlo de esta kantika ásta terminar:

Moshé le pide al syelo i a la tierra ke seyan testigos diziendo:

¡Eskuchad oh syelos i avlaré, ke oyga la tierra las palavras de mi boka !

Mi ensenyanza va kaer sovre vozotros komo la luvia i mi palavra yegara komo el rosio, komo luvia chika sovre el tierno vedre y komo fuerte luvia sovre la yerva

Kuando diga el nombre de Adonaï, glorifikad a muestro Dio

El es la Piedra i Sus ovras son perfektas, komo perfektos son Sus djuzgos, Su fidelidad y Su rektitud. Devarim 32: 1-4

Haazinu es una akusasion de los pekados de :

Yeshurun (Israel) al engodrar, abandono a su Kreador y olvido la Piedra de su salvasion

Kavsaron la ira del Dio por ir detras de dioses estranyos

Izieron sakrifisios a demonios ke no son Dio, a dioses ke no konoziyan, a muevos dioses vezinos a kenes tus padres nunka adoraron

No te akordaste de la Piedra ke te aviya mantenido i te olvidaste del Dio ke te izo naser. Devarim 32: 15-18

Haazinu es un augurio del kastigo de Israel por sus pekados:

I kuando Adonaï lo vio se burlo de eyos por la provokasion de sus ijos i de sus ijas

Entónses disho: eskondere Mi kara de eyos y vere komo terminan porke es una jenerasion mala de ijos de negro korason

Kon sus vanidades Me izieron araviar y apareser selos por dioses ke no son tales. Por esto yo Voy a provokar a eyos kon kualkyér puevlo sin emportánsa

La flama del fuégo de Mi ira yegara asta el abismo mas profundo, kemara la tierra y las bazas de las montanyas.

Terminare los males ke puedo kavzar a eyos i embiare kontra eyos todas Mis sayetas.

Eyos seran eliminados por el ámbre, la kalor ke no desha respirar i por la grandedestruksion. Embiare kontra eyos asta los dientes de las bestias salvajes i el veneno de las kulevras ke andan en la tierra.

La espada los exterminara por afuéra i el espanto los va a konsumir por adyéntro, tanto al mansevo komo a la manseva, tanto a la kreatura de pecho komo al ombre de blankos caveyos.

Dishe para Mi ke los embiariya por todos sitios de la tierra asta desparesér todo rekódro de eyos entre los ombres…..Devarim 32: 19 -26

La priméra vez ke meldi esto un diya de shabat shubá, entre Rosh Hashaná y Yom Kipur mi korason se entristesio, se me izo un anyúdo en el garon y las lagrimas empesaron a salir de mis ojos pues me akodre de todas muestras desgrasias: la kaida del reyno de Israel i la desparesion de muestros ermanos en medio de las nasyones asiatikas. La kaida del reyno de Yehuda, la destruksion del templo de Yerushalaïm por Nabuchodonosor, rey de los Babylonyanos i la esklavitud en Babylonya. La kaida de Yerushalaïm i la destruksion del sigundo Bet Amikdash por los soldados de Titus en el anio 70 i la muerte de káji 1.100.000 djudios i la esklavitud de otros 100.000 djudios a manos de los romanos. La destruksion y muerte de 580.000 djudios despues de la Rebelion de Bar Kojba en el anio 132-135 i la diaspora i todas, todas… las persekusiones i matansas asta los negros diyas de la Shoa.

Malorozamente la profesiya de este kanto esta kumplida en las karnes de los Benei Israel.

Ma, Haazinu es tambien la promesa de la redension de Israel a la fin por el Dio:

Adonaï azera djustisia a Su puevlo i tendra piedad kuando aiga terminado Sus kastigos

Entónses dizira El: ónde estan sus dioses, la piedra en ken eyos konfiaron ?

Ken komio la godrura de sus sakrifisios i ken bevio el vino de las ofrendas ?Ke vayan en vuestra ayuda i vos protejan

Mirad pues ke la Piedra Soy Yo, solamente Yo i dingún otro dios me akompanya. Yo doy la muerte y doy la vida. Yo fago ferida i kuro ; Dingúno puede liberarse de Mi mano…….

Elevad, oh puevlos, al puevlo Suyo, porke El vengara la sangre de Sus syervos i kastigara a Sus enemigos ; El azera la ekspiasion de la tierra y de su puevlo. Devarin 32: 36-43

Moshe Rabenu kanto esta kantika en los oyidos de Israel, el i Yoshua ijo de Nun. I termino sus ensenyanzas a todo Israel diziendo:

Poned vuestro korason en todas estas palavras ke oy puse komo testimonio delantre de vozotros i komunikad a vuestros ijos para ke tambien kumplan todos los komandamientos de esta Ley ; Aser ke no son kozas vaziyas para vozotros: son vuestra vida. Por eyas podresh aumentár vuestros diyas en la tiera ke vash a eredar kuando pasesh el riyo Jordan. Devarim 32: 45-47

Dunke, kuala es la vedradera sinyifikasion de la kantika Haazinu para mozotros los djudios?

Haazinu es un kanto para avertir de lo ke puede okurrir si Israel pedre el kamino senyalado en la Torah. Haazinu es un grito ke mos desha Moshe Rabenu para oyirlo i despertar agora. Nunka debemos ulvidar, ke lo mas importante de muestras vidas es amar al Dio por sovre todas las kozas, kon toda muestra alma, kon todo muestro korason y kon todos muestros rekursos, ma de vedrad, por ensima de todo, de muestros seres keridos, de las paras, de las kozas materiales, del lavoro, i de tantas i tantas kozas ke mos pueden aleshar de muestro Elohim, de muestra Piedra de salvasion. Kale rekodrar esto siempre kuando dizimos Shemá Israel, esta orasyon debe salir de muestro korason……Ansina, si amamos al Dio, no lo ofenderemos i kumpliremos sus mitzvot sus dekretos i sus leyes. Ma, tenemos indemas la responsabilidad de ensenyar a muestros ijos desde la chikez a amar a Adonaï por ensima de todas las kozas…

El Dio de Israel mos elijio por sovre todas las nasyones i mos dio la bendicha Torah. Kualo fue su propozito? Fazer de mozotros un puevlo santo, por afuera i por adyéntro un puevlo ekjemplar para todas las nasyones, los otros ijos del Dio, afilú mozotros semos el puevlo preferado. El propozito de todo es ke seamos luz para todos los puevlos. Para ke todas las nasyones se ambezen de mozotros.Es una realidad ke toda la umanidad a kresido moralmente i espiritualmente desde ke Adonaï mos dyo la Torah.

Muestra responsabilidad logikamente es mayor por aresivir mas atension del Kreador i ansina tambien el Dio es mas duro con mozotros, komo un padre ke kere bien a sus ijos. Ma ke grande disgusto para muestro Dio, kuando sus ijos preferados yegan a la tierra prometida i se ulvidan de todo, asta del Dio mezmo, i kaen en la idolatria adorando dioses de mintira lavorados kon las manos de los ombres. Dioses ke tienen ojos ma no pueden ver, dioses que tienen oyidos ma no pueden oyir…Ke gran pekado, ke gran ofensa i ke gran kastigo… kuando el numero de ombres djustos se amengua i ay dekadensia moral i espiritual yega el kastigo i pagan djustos por pekadores.

En estos diyas i en estos tyempos en muestras sosiedades, la moral se aze pagana i se akseptan modos de vida kontrarios a la naturaleza, mozotros debemos rekodrar i no ulvidar kenes semos, i nunka deshar a un lado a muestro Dio para fazer otras kozas, debemos ser firmes en su amor, leales i djustos i kumplir la Torah, este es el uniko kamino ke mos yevara a la salvasion…

Jose Poveda

Ansina se eskapa el teksto ke me embiyo Jose Poveda, i ke vos meldi tal i komo lo arresivi. Kualo penso de este teksto? Komo lo dishe antes de meldarlo, mis penseryos personales von bastante a la kontra de sus komentaryos, afillu si sus komentaryos son puede ser mas kasher ke los miyos.

Deke i sovre kualo vo a la kontra? Vo a la kontra de la idea eksprimida ke si sufrimos por vanda de asasinos, es un kastigo por muestras kulpas. Por siguro, esto pensando en la Shoa. Mas de un milyon de kriaturas djudiyas, entre eyas munchos bebikos, fueron matados por los almanes, en kondisyones ke no puedo ni dizir: a lo mijor aogados por gaz, ama munchos echados bivos en el ogar, otros enterrados bivos al lado de los puerpos de sus padre i madre matados o solo feridos por balas. Por ke kulpa estos syenes de miles de kriaturas i de bebikos sufriyeron ansina? I mismo los adultos, ke kulpa izyeron para ser tratados peor ke animales de degoyar?

« Pagan djustos por pekadores » mos eskrive Poveda. Esto no me parese ser un kastigo meresido, i el Dyo no kyere esto. Lo ke dize al profeta Yehezkel es djusto lo kontraryo: « la alma la peccan, ella morira ; hijo no llevara por delito del padre, y padre no llevara por delito del hijo ; justedad del justo sobre el sera, y maldad del malo sobre el sera. » (Yehezkel kapitulo 18, pasuk 20)

El Dyo no es el ke kijo ke las kriaturas pagen para kulpas del padre, si kulpa izo, povereto de djusto asasinado. La kulpa de la matansina es la kulpa del matador, no es la kulpa del matado.

La shoa es la kulpa de los asasinos almanes, no de los djudyos asasinados. La shoa no es un kastigo del Dyo. Es un krimen de los ombres almanes kontra djudyos inosentes.

Lo ke es vedra, es ke el Dyo no vino ayudar a los inosentes komo lo izo en la istorya de Purim. Ni los ayudo durante los trezyentos anyos de la Inkizisyon. Los hahamim ke eskrivyeron la Agada no konosiyan dainda la Inkizisyon, los pogromes i la Schoa. Si la aviyan konosido, no esto siguro ke uvyeran eskrito lo ke meldamos kada anyo, ama a mi me vyene muy a fuerte kuando lo meldo: « No uno solamente se paro sovre nos por atemarmos, salvo que en cada djeneransio y djeneransio se paran sovre nos por atemarmos y el Santo bendicho El nos escapa de sus manos. » Entre 1941 i 1945 no mos eskapo tanto…

El Dyo disho a Yehezkel (kapitulo 18, pasuk 9) avlando del djusto: « justo el, biviendo bivira, dicho de Adonay Dio ». Por tanto, entre estos sesh milyones de djudyos asasinados, muncho djustos aviya, i no vimos ke bivyeron…

Esta kuestyon terrivle del djusto aharvado, ay un livro entero del Tanah ke la trata sin tratarla ; es el livro de Yoav. Yoav es un djusto aharvado. No entyende deke. El Dyo le responde ke es todopoderozo, i ke no se pueden entender sus desizyones.

A mi me parese ke el Dyo no avlo de la misma manera a Yehezkel i a Yoav. Al primero disho ke si uno es djusto, bivira. A Yoav ke ve morir a los djustos el Dyo responde ke es Todopoderozo i ke el ombre no puede entender sus desizyones.

Desho a los hahamim de kompartir entre estas dos repuestas. A mi me kuadra mas la atitud umilde del ombre dizyendo no puedo entender ke la afirmasyon ke si el djusto muere matado es ke no fue djusto, o ke paga por los pekadores.

Ni me plazyo tampoko la repuesta del haham bashi de los sefaradim de Israel Qvadya Yosef, asigun el kual los djustos i las kriaturas matadas en la shoa yevavan almas de pekadores. Si avlar es para dizir esto, a mi me parese ke mijor es no avlar, o si kale avlar mijor es dizir: « no se ».

Sovre esta repuesta me vo kedar, porke es la sola ke me syento kapache de dar: No se…

Lo ke vengo de dizirvos, lo embiyi a Jose Poveda para konoser su penseryo, i me respondyo: « Komprendo ke no estes de akodro ni konmigo ni kon Moshe Rabenu. No es kolay de entender la kuestyon del kastigo, ma esta eskrito ansi, a mi tambyen me konmueve el alma…i ansina entyendo tu razonamiento, es savio dizir « no se », solamente el Dyo save la vedrad de todo. »

Astal djueves ke vyene, si kyere el Dyo!

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorLeonard Cohen, Premio Príncipe de Asturias de las Letras 2011
Artículo siguienteLa vida i la muerte de Dario Moreno
Noticias, Reportajes, Cobertura de Eventos por nuestro staff editorial, así como artículos recibidos por la redacción para ser republicados en este medio.