Diario Judío México - Es de mi Rabbi kerido ke me ambezi lo ke konto eskrivirvos esta demanyana i penso ke kaye muy bien kon los “Yamey Norayim” i Kipur en serka. No tengo dinguna duvda ke mi Rabbi es uno de los mas savidos en el mundo i kada palavra suya aze parte del trezoro de la savyedura de la persona. Vos prezento aki lo ke pensa sovre el kastigo eternal….
EN EL JUDAIZMO, EL KONSEPTO DEL KASTIGO ETERNAL NO TIENE IMPORTANSA….
De mizmo no egziste de dinguna manera “krimenes de pensamyento” en el Judaizmo porke es un sistemo de komportamiento etiko i no de kreensya.

Portanto, es tambien vedra ke egziste tres grados de “herem” ke es el ekivalente de la ekskomunikasyon en el Kristyanizmo. Kon esto, la ekskomunikasyon de los kristyanos se aplika sovre todo a los krimenes de pensamyento, la herejiya…

El Judaizmo nunka aplika el herem por “pensar falso” . El herem es por los yerros seryozos de komportamyento entre los judyos.

Los Karaitos no fueran metidos en herem pormodo de rechesar la Tora she-be-al Pe, ma por uzar un kalendaryo sin enterkalasyon, akto ke los trusho a observar los hagim, inkluido Kipur, el « Diya del Gran Perdon», en diferentes datos del puevlo judyo…..

Ansi es ke, por egzemplo, un buen djudyo etiko ke “kafro en el ikar” darshando por la mila, keda d’ayinda un buen djudyo, syendo ke «Yisrael af she–het u, Yisrael u ». Endemas, se kere tenido en tino un presipyo de l’antropolojiya kulturala de grande importansa, muy munchas distinksyones entre lo ke se puedriya klasifikar komo la « Relijyon », kon la « R » majuskula, i la «relijyon », kon la « r » miniskula. La « Relijyon» konsiste en el sistema teolojiko kodifikado. En el Djudaizmo la « Relijyon » es el sistema etiko de Tora u-Mitsvot. La « relijyon » d’un puevlo se topa en el abondo de praktikas i kreyensyas folklorikas.
En Irlandya, la « Relijyon » es el Katolisizmo Romano del Vatikano. La « relijyon » se ve por todas las partes ande los Irlandezes, en la kontinuidat de la fe pre-Kistyana, el Druidizmo, ke konsive el mundo espartido i kompartido entre nefashot kon puerpos i nefashot sin puerpos, el sea-dizyente mundo de los fados.
(cf. Evans Wentz.The Fairy Faith in Celtic Countries).

Mohammad kodifiko una idea asemejante en el Kor’an, ambezando afilu ke los djnun fueron kriados antes del ben adam. Ma esta idea en el Islam no es de la « relijyon » komo en Irlandya, sino de la « Relijyon » kodifikado. La idea koranika ke los djnun a sus torno enfluensyaron la “relijyon” judiya kon su folklore de sedimes. Orijinalmente, los shedim en lashon ha-mikra (Hebreo) se vyeron komo los kavzantes de hazinura. Oy dizimos “ajanes patojenikos”

En el siglo XIII, Yehuda ha-Hasid, en su livro Sefer ha-Hasidut eskrivyo : Kemo she-noagim ha- nohrim, kaha noagim ha-Yehudim, kere dizir “komo se komportan los non-judyos, ansi se komportan los judyos ».

Esto es la influensya de los Kristyanos o ekivalamente del Islam en el Judaizmo folkloriko, la “relijyon” judiya.

Entre estas influensas figura la idea d’una negrura enkarnada. La « Relijyon » judiya kodifikada depoza, a la kontra, un entendimyento profundo de la psikolojiya umana. Sigmund Freud tomo esta observasyon klinika fecha por muestros hahamim i de esta fraguo su teoriya del superego…

La « Relijyon” judiya kodifikada va kontrastar la idea Kristyana/Islamika kon el ambezo del « yetser ha-ra/yetser ha-tov ». A la enkuentra de la doktrina Kristyana/Islamika de un poder kozmiko luchando en una terrivle guerra kon las fuersas del Santo bendicho El,
El Judaizmo mantyene l’unisidat de la Mente ke kriyo la egzistensya. No ay dingun « Satan ke me lo fizo fazer ».

Kada uno i uno de mozos tenemos de yevar i sostener muestra proprya responsavilitad por el komportamyento etiko muestro.

En el Perso klasiko yamaron al poder kozmiko de lo bueno « Ahura Mazda», i al poder kozmiko de lo negro, « Ahriman ».

Eredando esta persepsyon del mundo del Zoroastryanizmo, kon sus relijyones–ijas, el Mitraizmo i el Manikeizmo, al Kistyanizmo i al Islam les era menesterozo topar un nombre djusto para dezignar el prensipyo de «Ahriman». El Kistyanizmo eskojo i adopto el biervo Hebreo, Satan, i el Islam, una derivasyon del miezmo, Sheitan. Aun kon esto, el byervo evreo no es un nombre. Es un titolo jeneriko, generalmente akompanyado del artikolo defenido.

En el mashal (metafora) del primer kapitolo de Iyov– i ke no se melde asigun el pshat (lektura literala) – el satan no esta en guerra kon el Di-o Abastado, sino ke es uno de sus munchisimos syervos. I no lucha por la alma del ben adam para kastigarla en un kastigo eternal.

No se avla del prensipyo del satan en la literature evrea fin a la epoka helenistika, kon su trokamyento dinamiko de ideas konkurrentes, i las sus enfluensas non-djudiyas en la « relijyon » populara d’. Malgrado esto, la « Relijyon » djudiya kodifikada, Tora u-mitsvot, el sistema de komportamyento etiko, kedo entakto.

Agora byen, keridos amigos, tokante a la kestyon de kualunke kastigo eternal, deshadme solo fazar un’unika linya de demandas :

  1. El Di-o, perfekto en todo, Kavza de todas las kavzas, veramente el Abastado, es ke El ama o odya a sus kriaturas?
  2. Un padre umano, emperfekto en todo, porke es umano i errare humanum est, «yerrar umano es », este padre, el ke te ama de todo su korason, i kon todo su amor umano-dunke- emperfekto, tal padre kuando seriya kapache de dizirte » : Ves akeya kaldera de kovre enriva de la soba en el mupak? Esta buyendo de la lumbre por debasho. No la tokes por modo de ke te kemara. »
  3. I alora, kuando, por la simple kuryozidat de la ninyes, t’estyendes la mano a la kaldera i echas gritos de la pena de kemarte.
  4. Ke modo de padre umano, amandote kon todo su amor umano-dunke-imperfekto, savriya dizirte : « Te kastigi agora, porke me dezobeyites, vo forsarte la mano a no esmover del lado de la kaldera i eskuchar tus gritosde pena una ora entera! Ke modo de padre amante i karinyozo te fariya ansina de koza?
    No se kere arrespondido.
  5. Kama ve-hama , «kuantimas i kuantimas », muestro Padre, muestro Kriador, perfektamente yeno d’entendimyento, perfektamente yeno de saviduriya, perfektamente yeno de amor por sus kriaturas, El Todo Poderozo, komo saveriya azerte ansina de koza
    afilu mas muncho mala, i alora askuchar tus gritos de pena una eternidat? No kale dicho.
    Bar minan! Leshos de mozotros i leshos de muestra kaza pensar ansi. Di-o, el Di-o de muestros padres, es demazyado bueno por aver kriado un kastigo eternal. El Di-o de Avraam, de Yitzhak i de Yaakov, el Di-o de Yisrael, la Intelijensya Maksima es el Amor Plenizmo.

Eran los biervos de mi Rabbi C,A de Texas..
[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorDeporte entre Israel e Irán
Artículo siguienteJaguar Night Experience protagonizado por el renovado Jaguar XE 2020
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.