La mueva era de las vitaminas

Diario Judío México - No es del todo koza de riyir lo ke vos kero eskrivir oy dospues de aver estudyado bastante lo ke afita a muestra vieja planeta… No so dingun mediko i dinguna autoritad sientifika para avlarvos de kozas tan seryozas i penso ke seriya mas fasil i mas divertido de transmetervos siertas informasyones ke kedaron en mi kavesa dospues de mis largas noches de lektura.. .

No tengo duvdas ke savesh lo aktual mizmo mijor de mi kon todos los bruidos ke se azen en la TV i en los jurnales.

Komo no ? Se trata de la vida de miliones de personas ke se ven apanyados por el malditto virus sin saver si puedran salvarsen o peryer sus vidas de manera tan horrible…. Es una maldisyon de los Sielos, de la Natura, ke mos kayo en la kavesa sin azer kuento si la persona es mansevo o aedado, riko o povre, ande se topa, si es mujer o hombre ets. I tendramos ke bivir kon esta menasa dayinda muy muncho tiempo… Kon no pueder guadrar los negosyos por munchos, una desgrasyada kriza ekonomika, una vida sosyal ke no egzistera mas, eskolas serradas, un ambiente peligrozo, delinkuentes ke no tienen mas nada de peryer en muestro derredor, miles de serkolyos kada diya, hospitales yennos ke no puedran mas arresivir los pasyentes…. Bivir i ver ! La ravia de Dio es para toda la humanitad…. I dayinda bushkan a attakar, a azer maldad, peleyarsen, enganyar, rovar i matar ! No abastan las innondasyones, los terremotos, los fuegos, las tempestas i las menasas del Espasyo, la agua ke no abastara, la famina i las hazinuras, deklaran guerras ! Mas matansinas, mas degoyos i mas sangre, sivdades enterras derrokadas…. NO AZER MAS KREATURAS !

Parese ke mos aserkamos de un trokamyento fundamental en el mundo. Empeso la era de enfuerteserse kon Vitaminas… Es el espanto del Covid-19 ! Kale ser prontos para sovrebivir ! Es el sistema de immunitad ke deve ser aparejado en konsekuensya… Komo ? Kon un punyado de Vitaminas ke se deven de tomar kada diya.

La curcuma, el ajo, el zinc, el fierro, la Vitamina C, la Glucosamine Chondroitin para las artikulasyones, NMN (lo mas importante), Omega 3, otros i otros….. Todos estos son suplementos alimentarios i no kavzan danyo. Alargan la vida i protejan de las hazinuras.

Munchos de los savios antigos i spesyalmente durante la Edad Media predisavan el aserkamiento de la fin del mundo. Nostradamus y Bueno de Mesquita (profesor de la UNY) koensidan en munchas kozas, a parte de la diferensya en los metodes para yegar a los mismos rezultados. No me refiero a los 500 anios de diferensya entre la vida de Michael Nostradamus i Bruce Bueno de Mesquita, sino ke Nostradamus se basava muncho en las teoriyas pitagorikas, parte astrolgikas, parte matemetikas i parte simple prediksion. Para esto uzava su profundo konosimiento de las artes mistikas para entender la kombinasyon entre siensya i astrolojia. Bueno de Mesquita uza un ordenador i un algoritmo sekreto, komo todos los endevinos o los ke azen prediksyones, independiente de sus sistemas bushkan tambien su propia konvenensya i su propio ego.

Debemos tornar a Pitagoras para ver si el, ke utilizava en parte las matematikas komo Nostradamus, pensava komo el, ma antes devemos demandarmos si Pitagores era un mistiko o un matematiko !

Mismo del tiempo del Pharaon Ptolemeo en Egypto, se kreyiva a la astrolojia sin saver ke la tierra boltava alrededor del sol ! Fue Copernico ke deskuvrio ke el mundo es el ke torna… Eyos kreian en el fin de este mundo tal komo lo konosemos agora. Tambien el kalendario Maya deskribe la data del fin del mundo, el apocalipsis, el 21 de Desembre 2012, la misma data ke Nostradamus predigo.

Munchos kreyen ke el dalkavo antikristo ya esta vivo i en estos momentos mos estamos aserkando de la fin.
Iran ? Korea del Norte kon China ?

Si Iran alkanza a fabrikar una fuerza nuklear, es kuaji seguro ke la va utilizar. Pakistan no la uza porke eyos la fabrikaron para sovrebivir, i la India lo mismo.

El grande fíziko Isaac Newton predigo ke ay kodikos sekretos en la Biblia i es por esto ke se ambezo el hebreo i dize ke ayi se pueden topar las repuestas ! Kon los ordinadores modernos vemos ke se puede yegar a estos kodikos sekretos ke mos pueden yevar a siertas koensidensyas !

Mos konfiamos i rogamos a Dio Todo Poderozo para ke mos de salud, repozo i vidas largas… AMEN !

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.