La Amistad

Diario Judío México

LA AMISTAD

Todo modo de aire siempre topa palos i polvos para areventar
Kada fanteziya tiyene piernas ensima de las kualas se asentar!
Todo modo de suenyo topa una esperansa i no le importa asperar.
L’uniko ke no se topa fasil es l’amistad i es duro de lograr..

Mos ambezimos a bolar komo pasharos i nadar komo pishkados
Ma mos olvidimos una koza…Bivir komo personas no savemos
No se dize riko al ke tiene muncho, se dize al ke tyene korason.
Ken no lo tyene nunka puedra akumplir en este mundo su misyon.

Si no tengo keridos para kompartir, a kualo sierve mi fortuna?
Mis keridos son los ke me aman i pensan ke so justa i buena
Son los ke me abrasan kuando todos se alesharon… porke kayi
Son los ke se kreyen en mi, mizmo si no supe i me yerri..

Mis amigos son los ke me alegran, kuando todos me dan pena
Los ojos de ken briyan, kuando el ke kero tanto me telefona,
Son los ke yoran kon mi i komparten mi dolor i mi tristesa
Son los ke me travan de mi, se kedan i me konsolan kon finessa

Lo mas de todo los keridos deven kerer komo en matematika.
Multiplikar las alegriyas, kitar la merikiya de tu kavesika,
Divizar lo ke mos atriste i ajuntar a los diyas de la vida
Kitar las ansyas i kalkular las nesesitades de tu almika

I SIEMPRE KEDAR EL MAS FUERTE DE TODOS
PARA DARTE LA MANIKA !

[email protected]