En su artikolo de Marso 2006, anunsiando la serradura de la revista “La Lettre Sepharade”, su fondador i redaktor Jean Carasso avia apuntado, entre otras, ke la kreasion de este periodiko avia sido una manera de “aventura”, siendo ke no uvo nada de premeditado, de verdaderamente programado en el nasimiento i los primeros dezvelopamientos de esta revista.
Esto, adjusto el, fue el rezultado de un enkontro ke tuvo lugar en 1991, entre una ventena de miembros de famiyas Carasso ke avian venido de diversos paizes para mijor konosersen i konoser sus istoria familial. Este enkontro fue tan reushido ke Jean Carasso, ke fue uno de los organizadores, fue rogado de eskrivir un rendekonto – lo ke el izo kon plazer i kon muncho talento. En segito a una seria de dezvelopamientos ke seria demazia largo de deskrivir aki en detalio, este rendekonto yevo a la kreasion de una revista trimestrala, “La Lettre Sepharade”, ke devino bien presto uno de los mas importantes de entre los periodikos ke se dedikan al mantenimiento i promosion de la kultura djudeo-espanyola.
La reushidad de esta revista, apunto Jean Carasso en su artikolo, es devida al fakto ke eya respondia al verdadero menester de numerozos sefaradis orijinarios de Gresia, Turkia, Bulgaria i otros paizes mas, de renovar sus atadijos kon la kultura djudeo-espanyola, mizmo si eyos mismos ya no avlan mas en ladino sino ke se akodran kon nostaljia de la lengua ke avian oyido en sus chikez, ansi ke de los kantes, refranes, kuentos i otros aspektos de esta ermoza kultura.
Despues de serka de 15 anyos de aktividad intensiva, en los kualos La Lettre Sepharade yego a miles de lektores en 48 paizes, Jean Carasso duvo rekonoser ke la revista avia yegado a la fin de su kamino, siendo ke sus fuersas ya no le permetian mas de kontinuar i ke no topo ninguno ke pueda azerse responsable de todos los aspektos de esta revista, publikada desdel prinsipio a titolo volontario.
En la letra anunsiando su desizion, Carasso paso en revista el dezvelopamiento i los alkanses de la Lettre Sepharade, no solo en el kampo periodistiko sino ke tambien en la organizasion de aktividades kulturales komo las Fiestas de Djoha; el Primer Festival Mundial de Muzika Djudeo-espanyola, en 2001, en el kual fueron dados durante una semana 10 konsertos de kantes djudeo-espanyoles; el kongreso “Lengua i Kultura Djudeo-espanyolas” ke tuvo lugar en Paris en 2002, basho el patronaje de la UNESCO, la distinksion ke le fue echa por el Ministerio Fransez de Kultura, akordandole el titolo de “Chevalier des Arts et des Lettres”, i enfin la invitasion de la Lettre Sepharade a Madrid, en Enero 2006, komo konsultante para la konmemorasion del Dia Internasional de Memoria de la Shoa. En la muy impresionante seremonia ke tuvo lugar en la sala de la Universidad Complutense, en prezensia de la reyna de Espanya, del Primer Ministro i numerozos ministros ansi ke del prezidente de las komunidades djudias de Espanya, el rey Juan Carlos evoko el rekuerdo de las viktimas de la Shoa i termino sus palavras kon un emosionante “Shalom”. Todo esto, apunto Jean Carasso en konkluzion, le permete de dizir ke si la publikasion de La Lettre Sepharade fue una aventura, esta fue tambien, siguramente, una “ermoza aventura”!
El tiene razon ma aki kale adjustar ke esta “ermoza aventura” no se termino kon la serradura de la revista, sino ke a la kontra, se esta kontinuando, aunke en otros kampos de la lucha para la kontinuidad de la kultura djudeo-espanyola.
En efekto, no kontentandose kon los livros ke fueron publikados en la epoka de aktividad de la LS, entre eyos el tan importante Diksionario Djudeo-espanyol/fransez de Nehama, del kual ya fueron echas 4 edisiones desdel anyo 2001, Carasso desido de aprovechar su eksperiensa i konosimientos en el kampo de la edision de livros para publikar de muevo algunas de las mas importantes ovras de la istoria i literatura de los sefaradis, komo la “Literatura sefardita de Oriente” de Michael Molho; el livro de istoria “Les Israélites de l’Empire Ottoman” de Moise Franco, i mas.
En kolaborasion kon la Alliance Israélite Universelle, el kreo la koleksion “El Mundo Djudeo-espanyol” en el kuadro de la kuala ya fueron publikados asta oy 6 livros, ke mas abasho damos la lista de sus titolos i nombres de autores.
No solo esto, sino ke Jean Carasso ayudo jenerozamente a proyektos diversos en el kampo de la kultura djudeo-espanyola, entre otras a Aki Yerushalayim tambien – kontinuando ansi la “ermoza aventura” de lucha por el futuro del ladino i de su kultura.
Por todo esto, ansi ke por su aktividad en el kuadro de La Lettre Sepharade, Jean Carasso merese muestro mas kalorozo agradesimiento i el de todos los amantes de la lengua djudeo-espanyola i de su kultura.
Artículos Relacionados: