Diario Judío México
LA INFAMA REZOLUSYON DE LA UNESCO :
YERUSHALAYIM NO TIENE DINGUNA KONEKSYON KON EL PUEVLO JUDYO !
UNOS DIZEN KE SE YERRA I KE TOMO UNA REZOLUSYON SIN BUSHKAR LA VEDRA…
OTROS DIZEN KE NO SE YERRA PORKE SU FUNDASYON MIZMA ES BAZADA SOVRE LOS INTERESOS POLITIKOS DE LOS PAYIZES SIN BUSHKAR LA VERDAD….
I yo digo : EGZAKTAMENTE !
No les konviene bushkar ! Keren ke seya deklarado lo ke dezean ke seya deklarado…. Al Azazel ke se vaygan…. .
I lo mas ermozo es ke todos saven de kualo se trata… No es dingun misteryo o koza mueva ! Ma les plaze i applozan kuando lo oyen por la UNESCO…. Una viktorya kontra los ke odyan !!!!
No es importante ken lo deklara kon tanta falsedad… El sol no se puede tapar kon las manos. Lo importante es lo ke Israel aze kon esto por ke es una provokasyon avyerta. El chaketon antes del duello ! Honor o flakeza.
Judyos ! Arekojevos ! La vida pasa por ser una nasyon fuerte primero de de todo ! Israel nesesita lo mas buenos stratejos i vayantes militares en Tsahal…
De mas en mas el mundo se bolta en una jungla ande la piyadad no egziste. El juego torno al “YO o TU !” El Medyo Oryente esta en fuego ! I mozos somos parte de este Medyo Oryente ke peryo su kavesa i ve sangre en todos los lados…. Somos los vizinos de los assasinos, de los radikales de los ke toman plazer en indo a la muerte i en matando…. Kada uno, Judyo en la diaspora o bivyendo en su Tierra, deve saver ke su vida i la vida de los suyos, sus keridos, depende de lo ke partisipa a su puevlo, aze por su payis i engrandese kreaturas responsavles.
No egziste dingun puevlo en el mundo ke fue tan persekutado i esta tan persekutado oy en diya !
No peryamos fe en Su Mano Poderoza i guadremos la fraternitad ke es la mas grande fuersa….
PS. Malgrado su muy fuerte aksento Hebreo, se puede entender el Inglez del Senyor ke avlo por el Puevlo Judyo delantre del Komite Internasyonal….
Sus palavras eran justas i bien eskojidas. Metyo bastante klaramente lo ke los Judyos pensan de la rezolusyon absurda, falsa, antisemita de la UNESCO una Organizasyon ke justamente tiene el dover de guadrar los patrimonyos de los puevlos.?
Espero ke tomaron buena nota de este kurto diskorso muy reushido i esto les
servira de lisyon… En todo kavzo una deklarasyon Judiya ke devriya absolutamente i de manera muy fuerte averguensar los patrones de esta dezgrasyada i mintiroza rezolusyon.
Artículos Relacionados: