Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la asosyasyon Vidas Largas se tendra el djueves 5 de mayo, de las dos a las kuatro i medya-sinko, en el Centre Communautaire, 119 rue Lafayette Paris (10°) métro Gare du Nord o Poissonnière.
El djueves pasado, empesi de kontarvos la istorya de la okupasyon italyana en Fransya durante los diez mezes de novyembre 1942 a septyembre 1943, i vos deshi en julyo 1943, kuando dainda todo esta bueno para los djudyos. Ama las kozas van a trokar en julyo.
Despues ke los Amerikanos an debarkado en Sisilya el 10 de julyo, los Italyanos, i entre eyos Bastianini, echan a basho a Mussolini el 25 de julyo.
El rey de Italia toma el Marechal Badoglio komo primo ministro. En Agosto, Badoglio empesa negosyasyones sekretas kon los Amerikanos para eskapar la gerra.
En Nice ay un djudyo italyano nasido en Modena, yamado Angelo Donati, direktor de la Banque de crédit franco-italienne ke konose muncha djente tan en Fransya komo en Italya. Este ombre izo un lavoro ekstraordinaryo para los djudyos, ke empeso a ayudar desde 1933, kuando Hitler vino al poder en Almanya. En 1942, el es ke aviya demandado al Consul Calisse de opozarse a los ordenes del prefeto Ribiere, komo lo konti aki la semana pasada. En agosto 1943 Angelo Donati se va al Vaticano i aya empesa diskusyones kon Sir Osborn, ministro de Ingletyerra i el Senyor Titman, ministro de Amerika. Les da a konoser su plano, ke es de yevar 20.000 a 30.000 djudyos de la zona italyana de Fransya a Italia, i de aya, kon kuatro vapores ke Donati alkilo, yevarlos de Italia a Afrika del Norte, ande seran salvos. Ama kale azer presto, porke el tyempo manka. I malorozamente, Donati se topa en frente de la lentor de las administrasyones.
Los Italyanos son d’akodro para este plano, ama los Amerikanos meten tyempo para responder. Entremyentres, Badoglio firma el armistisyo kon los Amerikanos el 3 de septyembre 1943, ama kale ke kede sekreto un tyempo, sino los Almanes van a vinir okupar la Italya i la zona franseza. Se meten d’akodro por asperar entre el 10 i el 15 de septyembre antes de publikar ofisyalmente el armistisyo. Esto deshariya un poko de tyempo a Donati para organizar la evakuasyon de los djudyos. Los Italyanos arrekojen los djudyos de sus zona en Nice, para yevarlos todos en djuntos en Italya. Los djudyos yenan los oteles i las pensyones de Nice.
Malorozamente, no se deke, los Amerikanos publikan el Armistisyo el 8 de septyembre. El 9 de septiembre los Almanes, ke se espantavan muncho de esto, entran en Nice antes ke el plano Donati pueda empesar. Solo unos kuantos djudyos pueden fuirse kon la armada italyana. Otros pueden eskonderse ande kristyanos fransezes. El prefeto Jean Chaigneau kema syenes de tefteres de djudyos para ke no kaygan en las manos de los Almanes, ama yene keda muy kolay para los Almanes de aferrar a miles de djudyos enserrados en Nice sin salida ni eskapasyon.
El ayudo de los Italyanos no salvo a los djudyos, ama no es la kulpa de los Italyanos, ke, en Fransya, izyeron lo ke pudyeron para los djudyos. Puede ser es la kulpa de los Amerikanos, lentos demaziya para achetar a los djudyos en Afrika, i al kontraryo prestos demaziya para azer konoser el armistisyo.
Lo kuryozo de esta istorya es ke kuando los djudyos eran protejados en Fransya por los Italyanos, los djudyos italyanos no teniyan el mismo mazal en Italya. Ama empesaremos en Italya por el empesijo, kijo dizir la venida al poder de Mussolini en 1922.
Se puede dizir ke, de 1922 a 1933, kijo dizir durante los onze primeros anyos del governo fascista de Mussolini, no uvo antisemitismo en Italya. Es lo ke diziya Mussolini el mismo en 1932: « El antisemitismo no egziste en Italya ».
De tal manera ke unos 5.000 djudyos, mas o menos 10% de los djudyos de Italya en estos tyempos, eran inskritos al partido fascista,, entre eyos Margherita Sarfatti, ke fue muncho tyempo la amante de Mussolini, ke kodirijiya kon el la revista fascista « Gerarchia » i ke eskrivyo la primera biografiya de Mussolini, trasladada en todas las linguas, i ke kontribuo muncho a la propaganda fascista en el mundo.
Las kozas empesaron de trokar entre 1933, kuando Hitler tomo el poder en Almanya, i 1938, el anyo kuando Hitler vino a vijitar a Mussolini.
Sin ke ayga una politika avyertamente antisemit del governo, empesaron desde 1933 las gazetas fasistas de maldizir mas i mas sovre los djudyos. I en 1938, empesaron las negriguras del governo fasista kontra los djudyos. Hitler vyene a vijitar a Mussolini en mayo 1938, i el mes despues vyene en Italya una delegasyon de ekspertos almanes del rasismo para ambezar la syensa rasista a los fonksyonaryos italyanos. Otrun mes despues, en julyo, profesores italyanos salen un « Manifesto della rasa », sovre la limpyesa de la rasa italyana, i la sekana de su kontaminasyon por los djudyos.
I el primo de septyembre 1938, sale la primera ley dicha para la defensa de la rasa, kontra los djudyos, serrandoles la puerta de las eskolas, i el 10 de novyembre la puerta de todos los empleos publikos, inkluyendo la armada.
El 10 de junyo 1940, Italya entra en gerra, i empesan arrestasyones de djudyos ; en 1942 son embiyados en kampos de lavoro, i en mayo-djunyo 1943, en el mismo tyempo ande la armada italyana protejava a los djudyos en Fransya, en Italya eran embiyados en kampos de lavoros de fuersa.
En julyo 1943, komo vos dishe, kuando los Amerikanos debarkan en Sisilya, Mussolini pyedre el poder i es aferrado i guadrado en prezo. En septyembre 1943 los Almanes vyenen i lo salen de prezo, okupan Italya i empesan a aferrar i a matar a los djudyos.
Los solos djudyos ke pueden salvarse son los ke pueden fuir en Suisa, o en la zona del sud de Italya liberada a poko a poko, muy avagar, por los Amerikanos. Los otros bushkan ayudo en el puevlo italyano, ke eskonde unos trenta mil djudyos en los kazales i las kampanyas.
Los Almanes meten Mussolini a la kavesa de un governo fasisto yamado Republica Sosyala Italyana, o Republika de Salo (Salo syendo la kapitala de esta sözde Republika).
El 16 de oktobre 1943, los Almanes aferran a mas de mil djudyos en la sivdad de Roma, ke dos diyas despues son embiyados a Auschwitz (entre eyos un bebiko nasido despues la arrestasyon de su madre).
En desyembre 1943, son los Italyanos eyos mismos ke tambyen aferran a djudyos, embiyados en kampos italyanos. En janvier 1944, estos djudyos son tomados por los almanes – o dados a eyos por los italyanos, no ay prova eskrita –i embiyados en deportasyon.
Rekomendo a los ke no vyeron a este kapolavoro de Vittorio de Sica, el filmo intitulado « La uerta de los Finzi Contini » ke a partir de un livro de Giorgio Bassani mos konta la estruisyon de una famiya djudiya italyana (antes de ser aferrados los vemos azer el seder de Pesah, i alevantar un dedo kantando kualos son los uno ?)
Asigun los shifros ke meldi sovre internet, fueron serka de 6.800 los ke fueron deportados, i entre eyos unos 5.800 se muryeron, asasinados pishin o a poko a poko. Entre los 1.000 ke aboltaron, el famozo Primo Levi.
Unos 35.000 djudyos s’eskabuyeron de la deportasyon, unos 29.000 eskondyendosen en sivdades i kampanyas ( i para esto el ayudo de kristyanos italyanos era nesesaryo) unos 500 fuyendosen en Italia del sud, ande ya estavan los Amerikanos, i unos 5.500 fuyendosen en Suisa. Entre eyos todos uvo unos 2.000 djudyos ke partisiparon a los kombates de la Rezistansya.
Por esto, es siguro ke Mussolini i los fasistas no eran andjeles. Ama, andjeles o no, es un fakto istoriko ke entre el 11 de novyembre 1942 i el 9 de septyembre 1943, kijo dizir estos diez mezes en ke los Italyanos okuparon a una parte de la Fransya, no solamente no tokaron a djudyos, ama mijor los protejaron kontra la polisiya franseza. Esto es una vedra ke kaliya dizir.
I komo lo dishe al empesijo, esto mos da malorozamente la prova ke el Governo de Vichy no toko a los djudyos porke era ovligado por los almanes, komo unos aprovan de enkasharmolo. Vichy aharvo a los djudyos porke lo keriya de si para si. I lucho kontra los Italyanos para pueder aferrar a los djudyos i darlos a los almanes. I son los italyanos ke no los desharon. Esto es un fakto istoriko.
Antes de eskapar sovre esta kuestyon, kyero dizir ke lavori a partir de lo ke topi sovre internet, sovre todo un lavoro (mémoire de maîtrise) de Céline Marrot-Fellague Ariouet publikado en el sityo la maisondesevres.org: « Les enfants cachés pendant la seconde guerre mondiale – aux sources d’une histoire clandestine ». Aya avla del réseau Marcel, dirijido por un djudyo, Moussa Abadi, i su mujer Odette Rosenstock, ke salvaron a mas de 500 kriaturas en Nice, i a esta okazyon konta la istorya de la okupasyon italyana.
Meldi tambyen un artikolo de Serge Klarsfeld en la gazeta Le Monde del 17 de mayo 1987.
Egziste sovre todo un livro, ama no lavori sovre el porke no tomi el tyempo de toparlo i meldarlo, es un livro de Léon Poliakov de 174 pajinas, eskrito en 1946, intitulado « la condition des juifs en France sous l’occupation italienne ».
Para los ke entyenden el italyano se puede tambyen meldar sovre internet, sovre un sityo de la armada italyana, un estudyo de Salvatore Orlando: « La presenza ed il ruolo della 4′ armata italiana in Francia meridionale prima e doppo l’8 settembre 1943 ».
Kale tambyen ke vos diga ke muestro amigo Robert Cohen, ke bive en Nice, i ke eskrive en Ladinokomunita kon el nombre Cobert Rohen, me eskrivyo en Ladinokomunita un mesaj ke vos vo meldar tal i komo me lo eskrivyo:
« Buendad italiana
« Kerido Edmond, no ulvides de dezir ke la proteksion italiana turo de Novenbre 1942 a Septembre 1943, i ke, en estos diez mezes, fueron ekstorkadas godras sumas de denero a los rikos jidios de la Cote d’Azur i a las organizasiones amerikanas enganiadas. Solo por entrar en Italia, kostava l’ekivalente de 600 euros por kada kavesa. I sin garantia de sorvever, porke los Almanes estavan tambien en Italia. El desdichado Donati se maneo mucho, sin pueder azer nada. El projekto « faraoniko » de uzar de kuatro vapores por
evakuar los jidios fino a la Palestina fue una bavajada por yerrar i azer pagar el JOINT. Ninguno keria ke miles de djudios vaygan a Palestina, ni Inglezes, ni Arabos. Italia teniya (i tiene dainda) una frontera terestra komuna kon la Svizzera. En pokos oras, los Italyanos puediyan azer fuyir todos los jidios del Sud de la Fransia (i del Norde de Italia) i no lo izieron.
« Ay tambyen de akodrarse de la responsabilidad istorika de los Italianos. Sin Titus Vespasianus ke destruyo Jerusalem (i Massada) i mos mando por dos mil anyos en los kaminos del mundo, no puediya aver ni Inkizision, ni pogromes, ni Schoah. Los antepasados de los Italianos tienen la premera kulpa de todo lo ke akontesio a muestros antepasados. Ke esto tambien sea dicho.
« Amistad. Cobert Nice France »
Vos meldi el mesaj de muestro amigo sin trokar un byervo, es a vozotros, keridos oyentes, de azervos vuestra opinyon.
Yo no so istoryano, i mismo si fui avokato 45 nyos, aki no so el avokato de los italyanos.
Sovre la kuestyon del presyo de la libertad, no puedo dizir nada porke no se. Solo me akodro de una shaka de Robert Roca, ke diziya: « A mi me plazen las mujeres ke vos kyeren por vuestra para. Eyas, a lo manko, se save kualo azer para guadrarlas »…Makari estuvyera bastante de pagar para salvarse en estos tyempos.
Sovre la Suisa, solo kyero dizir ke unos 5.500 djudyos pudyeron fuirse en Suisa, ama no kale olvidar ke es la Suisa ke arrondjava a los djudyos ke no achetava.
Sovre el plano de Donati, asigun lo ke meldi yo, no era en Palestina, ama solo en Afrika del Norte ke Donati keriya embiyar a los djudyos, i por esto es ke teniya menester del akodro de los Amerikanos. I por lo ke meldi, no fue la kulpa de los Italyanos si no alkanso.
Enfin, sovre la kulpa de los Romanos, es koza sigura. Ama yo avlo solo de la okupasyon de la zona italyana en Fransya en 42-43.
El ke estudya, mismo djusto un poko, la istorya, save ke kale mirar kada lado. Ay la armada deTitus de 70, i ay la kuatrena armada italyana de 1943 ;ay Torquemada, i ay Angel Sanz Bris ; ay Petain, i ay Jean Moulin ; ay Hitler, i ay los de la Roza Blanka: Sophie i Hans Scholl, ets. Es siguro ke muy pokos fueron los almanes del lado de la Roza Blanka…i es vedra tambyen ke no era kolay. Indimas es una razon por avlar de estos pokos.
Ama agora ya se eskapo esta emisyon, i vos digo al djueves ke vyene, si kyere el Dyo!
Artículos Relacionados: