Diario Judío México - So Israeliana tambien i no solo kon mi pasaporto !

Malgrado ke no egziste komidas tipikamentes Israelis pormodo de la Aliah permanente i muy variada, el simbolo de la gastronomia de mi payis es el FALAFEL.

Muestras komidas tyenen un stilo kosmopolito ke inkorporaron savores diferentes de todas las partes del mundo. Egzisten para todos los paladares : SEFARADI, ASHKENAZI i MIZRAHI (Oriental)


Las mufletas, la shakshuka, el kuskus MAROKANO, TUNISIANO, ALJERIANO, el hrayme (pishkado kon sos tomat, muncha pimyenta, prishil i ajo) TRIPOLITANO (Libya), la malawah, el djahnun YEMANI, el bortch RUSSO, la pita i el mucadarra ARABO, el gefiltefish ASHKENAZI, el asado i el choriso ARGENTINO,
la baguette FRANSEZA, el Tandoori INDIANO, el SHAWARMA (doner) TURKO el wafel BELGIO, el steak AMERIKANO, la pizza i el spagetti ITALIANO, la fondue SUISSA, el haringo salado HOLLANDEZE, los blintzes HUNGAROS, los mezes GREGOS, TURKOS, SERBIOS, BULGAROS i IZRAELYANOS son i deven
ser rekonosidos komo komidas IZRAELYANAS….

I no es ke mankan restaurantes ASIATIKOS i del EXTREMO ORIENTE kon todo lo sharonfonfon sin mankura !

El dezayuno Izraeli es el mas abundante i el mas variado del mundo. Una fiesta para los ojos i los paladares de personas kon los gustos los mas difisiles. Ay kuaji de todo!
Chay, kafe, leche, esprimido de frutas naturales, frutas, sereales, guevos, kezos, olivas, tomat, pimientones, piperushkas, pipino, avokado, pishkados salados, yogurt, dulses, marmeladas i miel, manteka, kruasanes, panes i begale a la exsepsyon de karne
(salami, chorizos pastramis ets) pormodo de los produktos kon leche.

La komida la mas importante es el del medyodiya. Lo mas se kome karne. Los famozos kababs, pishkado o poyo, aroz, patatas, platos de verdura i salatas.


La pita es el alimento el mas konosido i merkado del payis. Sus origines son arabas. Es muy praktiko para aparejar sandviches porke se aunfla de la dos vandas i es vaziyo
aryento. Lo mas de los Israelyanos komen sus komidas inchidas en la pita. Kon karne, kon poyo se inchen tambiende patatas fritas, kuaji siempre la sos thina i humus i el harif pikante, verdura i tomat, olivas, shakshuka ke es omlet kon pimyenton i tomat.

El Falafel es siempre una opsyon i es muy popular. Es una pasta de garvansos mesklada kon yervas i espesyas en forma de bulas ke se echan al azeyte kaynte para friyirlas. Se korta la grande pita (komo 2 manos) para inchirla de 6 bulas de falafel o la chika pita de 4 bulas de falafel, ojas de salata, tomat, sevoya, kaldo de thina i de
humus, salsa de pimyenta korolada muy pikante, i pimyentikos chikos en turshi (pickles)

La pita es el alimento el mas konosido i merkado del payis. Sus origines son arabas. Es muy praktiko para aparejar sandviches porke se aunfla de la dos vandas i es vaziyo
aryento. Lo mas de los Israelyanos komen sus komidas inchidas en la pita. Kon karne, kon poyo se inchen tambiende patatas fritas, kuaji siempre la sos thina i humus i el harif pikante, verdura i tomat, olivas, shakshuka ke es omlet kon pimyenton i tomat.

Se kome muncho tambien Salatas de berendjena i berendjena frita kon soses o sin sos.

La lifa ke es un pan Siriyano i Kurdo, muy delgado, komo un papel godro para emburujar los asados, el shawarma muy popular en el oryente medyo i echo
de karne de vaka, de kodrero, de gayna o de pavo ke se pasan a un shish (un palo delgado de metal) i se asan vertikalamente a la lumbre. Estas karnes se kortan
vertikalamente kuando se asan de manera delgada i son inchidas en la lifa o en la pita kon salatas soses i verduras.

Restorantes populares vana servir siempre azetunas, hamutzim (verduras pipino asentadosen la sal i el vinagre), salata de berendjena, thina i humus kon harif (salsa de pimyenta). (El humus es la komida tradisyonal araba echa de un pure de garvanos kon ajo, limon /vinagre i sesamo en medyo, arozado de azeyte de oliva ).


Dospues viendran las karnes asadas o el pishkado asado. El kafe turko es preferido dospues de komer.

Egzisten tambien munchos restorantes kinezos, italianos, indios, fransezes,
amerikanos, rumanos, gregos, espanyoles, argentinos, turkos, taylandezos kada uno kon sus komidas lokales.

No kale olvidarse de los bruidos ke azen el McDonalds, el BurgerKing el KFC, el Pizza Hut komo en kualker otro payis !

Syendo un payis muy kaynte la djente tienen de menester de bever muy muncho. Los sumos naturales de fruta son delisyozos. Agua mineral se vende muncho. Maccabi, Goldstar son las markas de las biras populares. Los vinos del Golan i del Carmel pueden azer konkurensya a los mijores vinos del mundo. El Sabra de naranja i de shokola es un likor alavado i muy savrozo.

Munchos Izraelyanos beveran el Arak ke tiyene la savor del anis i muy asemejado al RAKI Turko o al OUZO Grego. Los ke vinyeron kon la Aliah rusa vana preferir las votkas suyas.

En los dalkavo anyos la narguila se izo muy popular entre los mansevos. Es una pipa muy larga kon filtro de agua para fumar kolektivamente o no, akompanyado del fuerte te aromatiko del oryente o del kafe chikitiko arabo muy fuerte tambien.

La kadena de dulserias Kapulsky aze gatos pasteles, dulsuryas una lokura ! Sus kafes son nombrados i bastante sharonfonfon. (A lo manko antes 10 anyos !) No se deke la krem bavarya es muy popular komo si no aviya otra savor de boka ! Los baklavas son pezgados i la kunefa araba mmmmmmmm super !

Kapulsky era el lugar ande munchos azen ojikos a munchas ojikas ! Por esto todos se ivan ayi vistidos komo salidos de las ojas de los magazines ! Keif es de ir i de observar komo las kozas estan tornando en el mundo grande ! Solo ke no kale ir solo o sola porke, ke van a dizir todos ??? Se esta riyendo sola ? ES loka/ loko ?
Madre miya bendicha !

Borekitas arriva komo Olive de Poppey ! Me namoro de Olive !
Esto es ser mujer !

Fina las dulsuryas ya estava seryozika i komo se deve.
Son las dulsuryas ke me kitaron loka. ayayayayyyyyyyyyy

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorCDIJUM México y el Rosh Hashaná de 1958
Artículo siguiente¡Shaná Tová Israel!
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.