La kriatura viene al mundo kon su destino,
Kaye en familia rika,prove o sin arimo,
Estuvimos rondjados a este mundo de suertes
Komo plantas sembradas en lugares diferentes.
****
Todos tuvimos diferentes suertes,kada uno,
Ken hazino,ken arto i munchos sin dezayuno.
Los anyos pasan,todos toman un otro kamino,
Unos komo reyes i otros biven sin arimo.
****
A ken toko mas el sol, a ken toko mas la luvya,
Unos kayeron en kampos,otros en tierra ruvya.
Siertos gozaron de los regalos de la natura,
Otros son harvados del frio en tierra dura.
****
Akeos de buenas suertes ke dieron sus flores
Gloriozos,felizes de sus vidas in golores.
Rieron de alegria mostrando sus kolores,
Se burlaron de las plantas flakas i sus dolores.
****
Hay munchos ke sin tener una sufiziente sensya,
Sin tener un buto,sin obtener una herensya
Alkansan suvir a las alturas del universo
Borrachos de sus plaseres kon orgolyo diverso.
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Artículos Relacionados: