La Vendida de Yosef

Tomado del livro Daat le-Navon.
Seleksion de tesktos del Meam Loez Bereshit, Paj. 131-132

“I alsaron sus ojos i vieron ke una karavana de yishmeelim vinien del Gil’ad, i sus gameyos kargantes modos de espesyas, i ser, i altriaka i alvyote, andantes para abashar a Mitsrayim”, ke aun ke no es uzansa de los de kargar otro ke pes i alkitran i kueros, ma por kavod de Yosef ha-tsadik se le aparejo, dita karavana de sakos yenos de espesias, ke no se tome tsaar de goler guezmo negro. I lo ke tuvo ‘hehreah el pasuk de dizir ke se aresentaron a komer es avizo ke de este yerro ke izieron los shevatim se rekresio provecho grande al mundo, ke achakes ke lo vendieron i se fue a Mitsrayim supo rijir los siete anyos de artura i governar la djente en tiempo de la ambre, segun veresh en la perasha de Mikets. Kon ke los shevatim fueron kavza ke se mantuvo el mundo. I siendo eyos eran tsadikim, vino este bien al mundo por su mano, asegun dizen hahamim: “megalgelim zehut al yede zakay”.

I disho Ye’huda a sus ermanos: “Ke provecho de dinero ternemos kuando mataremos a muestro ermano i kovijaremos a su sangre de enkuvrir su muerte?” Kere dizir ke uzansa del mundo es de matarse uno al otro por 3 kavzos: si por tomarle su azienda; i si por tener muncha enemistad kon el; i si para ke se puvlike su fama por el mundo ke es ombre valiente. Por esto les dezia Ye’huda:-Aki en este metsiut no ay ningun kavzo de los ditos, ke si es por azienda, ma betsa? Kere dizir: -”Ya lo vesh ke no tiene ningun bien. I si es por enemistad, alkavo kavo muestro ermano es. I si es por kovrar fama, no es koza posivle, ke sierto devesh de enkuvrir su muerte. I siendo ke ningun provecho tenesh de matarlo, lo derecho es de azer asegun izo Noah de maldizir a Kenaan ke sea esklavo por el dezastre ke el izo, segun kontimos en su lugar. Lo mizmo agamos nozotros: Veni i lo venderemos a los yishmeelim i nuestra mano no sea en el para matarlo, siendo ke nuestro ermano nuestra karne el.I resivieron sus ermanos de Ye’huda dito konsejo, ke les dio a entender Ye’huda ke el konsejo de Reuven no era derecho, ke sierto estando en akel pozo deve de morirse i no ay muncha diferensia de matarlo kon la mano a azer modo ke se muera de suyo.