Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Aki avro una paranteza: por la primera vez desde diez anyos, en vez de dizir saludos a todos, dishe saludes a todos. Miri ande Nehama: en vedra los dos byervos egzisten en muestra lingua, i los dos kyeren dizir salutasyones, ama agora me parese ke saludo es mas al singular: un saludo, i saludes se dize solo al plural kon el sentido de salutasyon. Dunke dechidi de trokar, i agora, para los diez anyos a venir, vo dizir saludes. Despues veremos.
Esto dicho, vos akodro ke el proksimo atelye de konversasyon de Vidas Largas se tendra el lunes 4 de mayo, de las tres a las sinko, en el Centre Communautaire.
Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.
No ize emisyon aki, ni el djueves 9 de avril por modo de Pesah, ni tampoko el djueves 16 por modo del yom ashoa, las dos vezes la radyo tenyendo menester de mi tyempo de avla. De toda manera, sino uvyera sido yo ke vos uvyera avlado de la shoa, komo lo ago en jeneral kada anyo por esta okazyon, i munchas vezes mismo sin esta okazyon. No ay un atelye de konversasyon de Vidas Largas ande no se avle, a un momento o a un otro, de la gerra i de la deportasyon. En kuanto a mi mujer lehliya, ke eya se va kada djueves, en mismo tyempo ande yo ago mi emisyon, a un atelye de konversasyon en yidisch, me disho ke aya es proibido de avlar de la shoa, sino a kada atelye de kada djueves se avlariya solo de esto. Muestra jenerasyon de djudyos de Fransya, kon la edad ke tenemos, somos todos markados por muestra chikez, i dunke por la gerra i, sino la shoa eya misma kuando mato al padre o a la madre de tal i tal, a lo manko por el espanto de la shoa.
A propozito de la shoa, kale ke sepash ke el vyernes pasado se tuvo la asamblea jeneral de la asosyasyon Muestros Dezaparesidos, dirijida por Alain de Toledo, para la memorya de los djudeo-espanyoles de Fransya ke izyeron parte de los 76.000 djudyos deportados de Fransya. Es vedra ke lo mas fueron lehlis, ama yene fueron munchos miles los djudeo-espanyoles (selaniklis, bulgaros, yugoslavos, i turkos tambyen) aferrados en Fransya i matados. La asosyasyon esta preparando un livro memoryal ke, si kyere el Dyo, va salir al kavo de este anyo, kon la lista de muestros muertos i varyos testimonyos. Por siguro vos avlaré de este livro kuando va salir.
Para oy, mi amigo José Molho, ke komo ya lo savesh me bushka kozas de dizir, vino a mi kaza maksus para traerme un egzemplaryo de la gazetta Le Crapouillot konsagrado a los Djudyos, dizyendome ke puediya interesarvos, keridos oyentes. En vedra no se si vos va interesar syendo que esta gazetta ya no egziste mas desde 1996, i ke el numero 80 de la gazetta, konsagrado a los Djudyos, fue por su parte eskrito en 1985, ya aze dunke trenta anyos.
Ama al kavo yene pensi ke puediya interesarvos, porke las kozas, sea por byen, sea por mal, no trokaron tanto para los djudyos i sovre los djudyos en estos ultimos 30 anyos, i ke lo ke meldi en esta gazeta, sin ke sea revolusyonaryo, dava yene de pensar.
En primero de todo, kualo es un crapouillot en franses? Un crapouillot es un chiko crapaud, el sapo, esta godra rana de la kuala vos avli ay un mes de esto kuando vos meldi una poeziya de Victor Hugo. Ama el titolo de la gazeta no tyene en vedra nada de ver kon este animaliko. Los askeres fransezes de la primera gerra mundyal yamaron crapouillot, por modo de su forma, a un chiko kanon, mortier en buen franses, ke los ayudava muncho.
El primer numero del Crapouillot sale en agosto 1915, kuando los askeres ya tyenen empesado de enterarse en las famozas trincheras, en el lodo i los piyojos, ande se van a kedar kuatro anyos, bombardados kadal diya por los “crapouillots” del enemigo.
Esta gazeta va ser, al empesijo, destinada a mantener el koraje de los askeres en trokandolos un poko de la fealdad de la gerra i avlandolos de arte i de literatura.
Kuando la gerra se eskapa, la gazeta kontinua, kedandose literarya i artistika, kon una forma moderna i satirika. Resive eskrivanos non konformistos, komo Francis Carco o Pierre Mac Orlan, o desinatores modernos, komo Dunoyer de Segonzac o Touchagues. Dishe ke fue una gazeta satirika: fue, antes de la gerra, travada mas de kuarenta vezes delantre los Tribunales.
I, en septyembre 1936 (vos akodro ke es el anyo ande las eleksyones son ganadas por la frente popular ke mete al poder un kapo de governo sosyalisto i djudyo: Léon Blum) el Crapouillot sale un numero enteramente konsagrado a los Djudyos. No es el numero ke me trusho Jose Molho, ke es de 1985. Aki estamos avlando de un numero de 1936, kaji 50 anyos antes.
Este numero, lo bushki sovre internet i lo topi grasyas al sityo de un profesor, Jean-François Bradu, ke lo publiko enteramente.
El numero, ke aze 72 pajinas, fue enteramente eskrito – a la diferensya de lo ke se paso en 1985 – por un solo gazetero, un syerto Raymond A. Dior, nasido en 1900 en una famiya kristyana de industriales ke eran proprietaryos de la muy konosida agua de Javel Saint-Marc . Raymond Dior teniya un ermano ke fue muy famozo despues de la gerra, el kuzendero Christian Dior (ke durante la gerra kuziya fostanes para las mujeres de los zabites nazis kuando lavorava para el kuzendero Lucien Lelong, lo ke, para ser djusto, no abasta para azer de Christian Dior un nazi el mismo). Raymond Dior teniya tambyen una ermana mas chika, Catherine, ke eya durante la gerra va entrar en la Rezistansya, ser denunsyada, aferrada por la Gestapo, embiyada en Ravensbruck en junyo 1944 i liberada en mayo 1945.
Deke vos avlo de la ermana de Raymond Dior? Porke kale saver ke si Catherine, ermana de Raymond, entro en la Rezistansya, la ija de Raymond, Françoise, nasida en 1932, se izo konoser en los anyos 60 komo militante del partido nasyonal sosyalisto, i se kazo en 1963 kon Colin Jordan, famozo nazi ingles. Los ke son interesados la pueden ver sovre internet respondyendo kon su espozo en una entrevista ande mos dize (estamos en 1963) ke eya i su espozo veneran al fuhrer Adolf Hitler, i ke se van a kazar mesklando la sangre de sus dedos arriva de una pajina de Mein Kampf.
Los ke son interesados por ver a Françoise Dior, ermoza mujer kale dizir, la veran azyendo el saludo nazi. I la veran tambyen en esta entrevista ke vos dishe:
Esto todo no mos dize kualo eran las ideas de Raymond Dior el mismo, ama lo mijor para saverlo es de meldar lo ke eskrivyo el mismo. Vos diré ke mi primera impresyon fue muy negativa, syendo la foto de la kuvyertura de la gazeta, ke mos amostra un djudyo karikatural, kon barba, peyes, chapeo i nariz. Syerto, es una foto, ama se puediya amostrar otra koza, por egzemplo la foto de kuvyertura del numero de 1985 amostra un chiko simpatiko meldando su livro de orasyon.
Mi impresyon fue indimas negativa vyendo una karikatura de Gustave Doré ke empesa el numero, esta vez komo travada del Sturmer de Goebbels.
Esto dicho, el teksto, al meldarlo, no vyene konfirmar enteramente esta negra impresyon. Dior mos deskrive a su manera el djudezmo tal ke era en Fransya, en Palestina i en el mundo unos sinko anyos antes de la Shoah.
En vedra su simpatiya va solo verso los djudyos liberales, asimilados, i ke no lavoran en la banka.
Todo en kondenando, es vedra, el antisemitismo, Dior kondena en el mismo tyempo los djudyos ortodoksos, los djudyos bankeros, los djudyos syonistos.
Se ve presto ke Dior eskrivyo su artikolo vyendo los djudyos de leshos, sin konoser el korason de lo ke kyere deskrivir. Por egzemplo, mos da la lista de los “livros relijyozos” de los djudyos. Empesa por el Tanah i despues el Talmud, ke sea yerushalmi o bavli. Muy byen. (Kuando digo muy byen, es manera de avlar: para Dior, “el Talmud fue el prezo espiritual de Israel, un modo de sirko a penseryos ande tornava sin fin”.) Ama despues, en tresera pozisyon, mos sita “la sigunda ley (Mishna)” De la misma manera, un poko mas leshos, despues del Shulhan Aruh, ke yama “Schilkhan Arasch”, topa la Gemara, ke, mos dize, “konstituye, kon la sigunda ley sitada mas arriva, el komentaryo del Talmud el mas utilizado”. Se ve de esto ke Dior no save ke Mishna i Gemara no son komentaryos ajenos del Talmud, son el Talmud el mismo. Para salir una tala bovedad, es ke avlo de la relijyon djudiya sin tener peshkuzado kualkyer haham.
Asigun Dior, los djudyos no son una rasa, i kondena muy byen el rasismo de los antisemites. Ama asigun el, los djudyos no son tampoko un puevlo. No kree del todo al syonismo, en ke el ve un nasyonalismo rasisto, i konkluye: “Krear una nasyon? Es imposivle, todo va a la kontra, los djudyos no lo kereriyan. Un puevlo? No ay un puevlo djudyo.”
Asigun lo ke entendi de este artikolo, los djudyos reprezentan una forma de bivir i de ser ke por syerto tuvyeron su epoka de glorya, ama ke en vedra no tyene mas de sovrebivir agora, en 1936.
Solo kuatro anyos despues, vino Hitler ke aprovo de ayudar a la dezaparisyon de los djudyos, i malorozamente logro en grande parte por lo ke es de los djudyos de Evropa.
No se kualo penso Raymond Dior despues ke vido la shoa i el nasimyento del estado de Israel, todo lo ke se es ke se muryo en 1967, el anyo de la gerra de los sesh diyas.
Desharemos agora el Crapouillot de 1936, i avlaremos agora del Crapouillot de 1985, el tambyen enteramente konsagrado a los Djudyos, ama esta vez no fue eskrito por un solo gazetero, ama por 18: 5 djudyos i 13 non djudyos, ke eskrivyeron en todo 21 artikolos, syendo ke syertos eskrivyeron mas de un solo artikolo.
Primera konstatasyon: sovre la kuvyertura no se amostra un djudyo feo i kon peyes, ama un manseviko ermoziko orando kon tefilin, deve ser kumplyendo minyan. No leshos de el, un djudyo kon taleth ke kreo konoser: un avokato de mis amigos!
La primera impresyon es muncho mijor ke para el numero de 1936.
Ama esto no abasta: despues kale entrar en la gazeta i meldar lo ke se dize en eya. Komo no vo tener tyempo de avlarvos de kada uno de los 21 artikolos de la gazeta, vos vo avlar solo de los sesh primeros, i despues de solo dos otros; un artikolo antisemit i uno syonisto.
El primer artikolo, del istoryano Pierre Chaunu, mos amostra komo los djudyos kijeron ser mas fransezes ke los otros i komo fueron mal tratados. Los djudyos de Fransya tyenen derecho, dize Chaunu para konkluir, a un poko mas de tino, a un poko mas de amor. “Los de mi edad i ke se akodran, dize Chaunu por eskapar, seran d’akodro kon mi”.
El sigundo artikolo es del haham Jacquot Grunewald, ke fue munchos anyos el direktor de la revista “Tribune Juive” (i ke lo era en 1985). El titolo de su artikolo es “El djudyo deskonosido”, la idea jenerala del artikolo syendo ke grasyas al estado de Israel, el djudyo se troko de manera de verse el mismo.
El treser artikolo, eskrito por François Faverolles, mos konta komo, en la istorya de la Fransya, los djudyos ajenos fueron resividos en Fransya, sea por los fransezes kristyanos, sea por los djudyos fransezes. No fue kolay, i Faverolles amostra komo esto se eskapo por las leyes rasistas de Vichy i la muerte de los djudyos.
El kuatren artikolo, intitolado “Las estreyas de David”, i eskrito por Emmanuel Haymann, mos avla de todos los djudyos famozos azyendo parte de la sosyedad franseza. I es vedra ke son munchos los djudyos famozos.
El sinken artikolo es eskrito por el famozo eskrivano François Nourrissier, ke fue munchos anyos prezidente de la Akademia Goncourt, i ke se muryo en 2011. El titolo de su artikolo:”Tenemos menester de la elektrisita djudiya”. Mos dize ke syempre tuvo amistad i admirasyon para los djudyos, i ke se kazo kon una djudiya de la famiya de Rothschild. Asigun el, los djudyos son nesesaryos para azer bivir, a lo manko de un punto de vista intellektual, una sosyeta.
El sejen artikolo, eskrito por Marc Dem, katoliko tradisyonalisto, es intitolado “Un kuadrado redondo?” Es un artikolo kontra el ovispo (i mismo kardinal, lo ke no dize) Jean-Marie (Aaron de nasimyento) Lustiger. Lustiger syempre se disho djudyo , lo ke keda en el garon de Dem. Indimas kuando Lustiger dize ke son los Romanos i no los Djudyos ke mataron a Jesus. Esto, Dem el ointegristo no lo puede achetar. Kale dizir ke los hahamim tampoko no admeten ke Lustiger se diga djudyo. “Un djudyo kristyano es komo dizir un kuadrado redondo”, disho el haham bashi Meyer Jais, i por una vez Dem es d’akodro!
Komo vos dishe al empesijo, no me keda bastante tyempo para avlarvos de kada uno de los 15 otros artikolos. Dunke, para eskapar, eskoji de avlarvos solo de dos de eyos: el uno del antisemit Philippe de Saint Robert, el otro del syonisto Paul Giniewski, ke malorozamente mos desho la vida en 2011, a la edad de 85.
Philippe de Saint Robert se pretendyo gaulisto de syedra. kuryozo ombre de syedra ke entro komo kapo de gazeta en Radio Courtoisie, ke se dize “la radyo de todas las derechas” i en vedra es la radio de la derecha ekstrema. i Saint Robert fue syempre antisemit i syempre eskrivyo kontra los djudyos i Israel. Aki su artikolo se yama “El Dyo se kaya sovre esto todo” . Aya mos eskrive ke el estado de Israel es “un fakto kolonyal”, i el syonismo kyere el antisemitismo komo justifikasyon, ets.
En kuanto al maraviyozo i regretado Paul Giniewski, su artikolo es intitolado “Afuera de Israel no salvasyon”. Su idea, muy byen argumentada – puede ser ke un diya vos daré su traduksyon entera al djudeo-espanyol – es ke los djudyos de la Diaspora sovrebiviran solo si se kedan serka de Israel. Los ke se alesharan de Israel dezapareseran a poko a poko komo djudyos.
Artículos Relacionados: