Diario Judío México - PRIMERA PARTIDA
Kirecburnu – Bosforo 26.5.2008 -De mi diario-

Ayer la noche me telefono Esther Ferera i me disho ke ya yegaron de , eya, su amiga Pnina Katan, Mazal, la amiga de Pnina i la ija de Mazal la dulse Lili (pensiyonera de Tsahal, la armada israeliana). Las estava asperando i mos dishimos ke mos ivamos a topar en la eskala de Sariyer porke ivan a vinir kon el vaporiko ke aze el tur del Bosfor lo mas para los turistos (kon la posibilitad de desharlos en las eskalas ke keren para kaminar, komer, ets. i kontinuar el tur para tornar a ande los tomo.

Esther Ferera (USA) / Pnina Katan – Mazal – Lili () / Sharope blanko – Daniel Benbanaste (Istanbul)

A mi sorpreza Daniel Benbanaste estava kon eyos i el ke es un guiya muy konosido i enfluensiyozo en la Turkiya, siyendo un buen amigo de Esther Ferera, se aviya proposado de akompanyarlas amistozamente.

Los tomi a todos dospues de abrasos de bienvinida i los invitii a un restaurant ke konosko bien i nombrado por la freskura i la savor de sus komidas i su vista enkomparavle ensima del Bosfor.

Fuimos del empesijo un grupo muy amistozo i no kedimos de riyir, de divertirmos i de gozar de las komidas savrozas, del sufle de shokolad a la fin i del kafe final del kual mos aviyamos olvidado i mos disheron de tornar atras para beverlo ande mos aviyamos asentado ! Topimos kon difikultades un lugariko ande abashar el kafiko i salimos de eya kon los ojos mirando atras…

Otra ves kon dos taxis tornimos a la eskala de Sariyer para tomar el vaporiko del tur i kompletar el torno en azyendo zigzages en el Bosfor para abashar en Eminonu, la d’alkava eskala.

El D-io mos regalo el mijor tiempo ke puediya ser. Ni kayente ni yelado, ideal para gozar kon bluzikas a mangas kurtas ! Djusto kuando esatavamos asperando el vapor vide un vendedor de shales. Al fondo, el uniko shaliziko korolado diferente de los otros me izo un ojiko. Estava muy espesiyal i me plazyo muncho. Ni pensi dos vezes…. Presto se lo regali a Esther.

Ni kijimos entrar en el salon del vapo o asuvir a las terasas arriva…. Metimos los brasos a la pasarela, djusto a un metro ensima de la mar i komo si mos estavamos arezvalando ensima de las aguas de un blu enkreyivle de dulsura ande los rayos del sol estavan baylando, en frente de las kazas unas mas ermozas de las otras, del vedre fresko de la primavera a su mas ermozo dia i debasho de un sielo un poko mas klaro de las aguas de kristal ensima de las kualas mos estavamos arezvalando. Avlimos de todo i de nada, lo mas riyendomos i todas namorozas las unas de las otras…. Lili no estava kedando do tomar fotos por siguro !

Abashimos en Eminonu dospues de una ora i medya i mos maraviyimos delantre de un grande barko preto i oro ke izyeron komo estos kalyones del tiempo del Imperyo Otomano

Al lado de la mar mezikas bashetikas kon siyas komo las de del tiempo estavan yennas de gente komyendo el famozo “balik ekmek” pishkado frito dentro del pan fresko, sevoya i prishil servido de la parte de los mansevos kon vistimyenta preta i oro komo en el tiempo del Otomano ! Muy turistiko i atraktivo por siguro ! Ayde fotos mas i mas para Lilika ! Noooooo no teniyamos lugar para gostar de este pishkado !

Kontinuimos todos endjustos muestro kamino en las kayes i los suteranos yennos de miles de personas merkando mil i unas kozas de todas las kolores…Yo no salgo muncho de mis kantones…. So un gatiko de kaza ! Me mareyi de tantas kozas ke estava viyendo komo la primera vez de mi vida ! Estava enkantada…No saviya ke ay tanta vida afuera del repozo, del kalmo i del konfor de mi kazika ! De ande aviyan salido tanta gente ?!!!

Entrimos al Misir Charshisi – el Spice Market – famozo de Eminonu. (Konstruido en 1664) enteramente serrado, en mas chiko del Kapalicharshi – Covered Bazaar –

(Lili kedo de travar fotografias ? Noooooo! Las golores, las savores, las kolores i las luzes formavan el egzotiko oryental, una vista ke la persona nunka se puede olvidar en su vida ! La ermozura de las butikas i las ropas ke se vendiyan aya puediyan travar los ke son los mas eskojadores ke pueden ser sus kompras. Los magazenes ande se vendiyan los maraviyozos ashueres de las novyas me kitaron de mi (!) kon los lavoros de mano, las sedas brodadas i los manteles ke ni puediya ni entender komo los aviyan echo ! Merkimos siertas kozas e el Misir Charshi

Estava 5 de la tadre.. Mis amigitas kontinuaron i se fueron al Kapalicharshi, el Covered Bazaar. Yo no puide mas kaminar i torni kon Daniel ke no saviya ke morava muy serka de mi kaza. Tomimos el motorboat. El abasho en Haydarpasha i yo arivi a Kadikoy para irme presto a mi kaza ande me estava asperando una studente miya…. Kansada…. kansada estava ma mi korason estava kantando de allegriya.

27 de Mayo 2008

Komo kedimos de akordo a la demanyana mis amigitas Esther Ferrara, Pnina Katan, Mazal i Lili tomaron un taxi i vinyeron ande mi. Mazal i Lili saviyan avlar solo en Hebreo , muestras linguas en estos enkuentros eran ebreo lo mas kon muncho Judeo Espanyol por sierto. Se namoraron de mi balkoniko i de mis keridos kantonikos ! Estavamos komo lokitas i muertas de plazer de estar endjuntas, riirmos i komer las frutas de mi guerta i del supermerkado. Les plazyo muncho tambiyen el “Imperial Spice Tea” ke yo merko en Londres porke no egziste en otro lugar malhorozamente ! Yo me namori de los biskochikos ke Mazal izo kon sus manos.

Vos va eskrivir la kontinuasyon amanyana ! Chamlidja – Kuzgundjuk !

Kon karinyo
[email protected],com

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorPerspectiva Económica de octubre. Análisis completo de Gabriel Casillas
Artículo siguienteDe los cuatro elementos de la vida judía a las tres palabras que definen “Yad Lakala”
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.