LAS FIESTAS JUDIYAS
Asigun la tradsion judiya, es defendido de invokar el nombre del Todo Podorozo en vano. Es por esta razon ke se uza el nombre de Di-o en un mizmo biervo ma aunandoLo kon un punto o una chika riga, a la eksepsyon de los livros de orasyones. Por respekto, el esktritor prefero esta forma de ekskrivirLo.
Las rikezas de la kultura i del patrimonyo judyo no son konosidos por todos. Para dar a enetender mijor, pensimos ke seriya bueno de dar una kurta eksplikasyon sovre las fiestas relijyozas asigun se selebran kronolojikamente.
El judyo observante roga tres vezes al diya. Los savyos afirman ke las orasyones de la demanyana fueron establesidas por Abraham, las del dospues de midi por Isaak i las de la tadre por Yaakov.
SHABAT
Este diya mensyonado en los Diez Komandamientos, es el mas importante del kalendaryo judyo. Empesa el Viernes a la tadre kon la mujer de kaza ke asyende las kandelas i termina el diya siguiente fina
kuando apareseran en el sielo tres estreyas…. No es permetido de azer dingun echo kreador durante este tiempo.
En el ofisyo de la demanyana del Shabat se melda un kapitulo de la Sefer Tora (La Ley) ke es kompozada de sinkuenta i kuatro kapitulos. Este kapitulo es yamado la Parasha de akeya semana.
ROSH HASHANA – EL ANYO MUEVO
Rosh Hashana, el empesijo del anyo muevo kaye en el primer i en el segundo diya del mes de Tishri. Se oye el Shofar ke se suona para despiertar el korason endurmesido del hombre i es una karakteristika de la solamnitad de este diya. Auna la persona a la komunitad .
TSOM GEDALYA – EL AYUNO
El 3 de Tishri, al segundo diya de Rosh Hashana se ayuna. Es el Tsom |Gedalya, uno de los kuatro ayunos para akodrarse de la destruksyon del Primer templo.
YOM KIPUR – EL DIYA DEL GRANDE PERDON
El 10 de Tishri es el Diya de Ayuno i de Abstienimento ke los Judyos son ovligados de respektar asigun lo ke esta eskrito en la Tora. El Judyo se apareja a arrepintirse a la tadre mizmo de un diya de antes. El khal entero resita la orasyon del Kol Nidre, los membros de la komunitad kaminan los rolos de la Tora para el Vidui, la emosyonante konfesyon kollektiva de los pekados. Se roga el diya entero. Yom Kipur se termina en meldando la Neila, ke se repeta lo mas del tiempo en Judeo-Espanyol, i en suonando el Shofar.
SUKOT – LAS KABANAS
Es la tresera fiesta de remembrensa. Durante ocho diyas se konmemora de los Ijos de Israel ke erraron en el dezyerto i bivyeron en kabanas ke son moradas muy prekarias por kuarenta anyos. La semana entera los Judyos biven en estas moradas ke eran las suyas un tiempo… La demanyana se roga kon el lulav en la mano (un buketo kon el ramo de la palma, el ramo del sauce, el ramo del eucalipto i el etrog komo el fruto del limonero).
HOSHANA RABA – LA GRANDE HOSANNA
Esta solemnitad del sieten diya de Sukot marka la fin de la miserikordia (de la piadad) empesada en Rosh Hashana.
SHEMINI ATSERET – EL OCHEN DIYA PARA TERMINAR
SIMHAT TORA – LA ALEGRIYA DE LA TORA
Estas dos fiestas se selebran en el mizmo diya en Israel alora ke en la diaspora el Shemini Atseret se fiesta el 22 de Tishri i el Simhat Tora ke es la fiesta la mas alegre de todas, un diya dospues.
La d’alkavo Parasha de la semana termina la lektura de las parashot del anyo entero i se empesa a meldar immediatamente dospues el primer kapitulo kon la Kreasyon del Mundo, porke nunka se puede interrumpir el estudyo de la Tora.
HANUKA – LA FIESTA DE LAS LUZIZIKAS
Hanuka empesa el 25 de Kislev (en Disembre) i termina dospues de ocho diyas.
Se empeso a selebrar dospues ke Judas Makkabi i los Savyos la instauraron en komemorasyon de la revolta judiya kontra la armada syriana hellenizada de Antiokus Epifano i de la liberasyon del Templo de Yerushalayim de las manos de los Seleusides, en 164 antes de la era komun.
La yaman tambien la Fiesta de las Luzizikas en memorya del bokaliko de azeyte pura ke, malgrado ke no konteniya azeyte por mas de un diya, turo durante ocho diyas, fina el tiempo nesesaryo para ke se pueda produizir la mueva azeyte.
Es una ovligasyon relijyoza de asyender las kandelikas de Hanuka, en un lugar ke todos puedran ver, para divulgar el mirakolo. En la tradisyon sefaradi, el kandelabro se yama tambien la hanukiya.
EL AYUNO DEL 10 DE TEVET
Es uno de los kuatro ayunos para konmemorar el derrokamiento del Templo de Yerushalayim dospues de diziocho mezes de sitio i de la konkista de la sivdad por Nabuchodonosor en 586 antes de la era komun.
TU BISHAVAT – 15 de SHEVAT
Es la data (en Febrero) de la fin de las luvyas de invyerno en Israel. Des de la antikitad los Judyos plantaron arvoles. Tu Bishvat signifika tambien el anyo muevo para los arvoles. La Tora kompara el hombre a un arvole i konsidera ke este diya, se desida el destino del arvole komo en Rosh Hashana se desida el destino del hombre.
PURIM – LA FIESTA DEL DESTINO
El tredje de Adar es el diya ke Esther ayuno. Purim se fiesta un diya dospues.
Al siglo 5 antes de la Era Komun, Aman, el primer ministro de Ahashverosh (Assuerus), aviya echado los dados del destino (purim) para saver en ke diya se deviyan matar los Judyos ke biviyan en la Persya. Mordohay i Esther desbarataron (bozdeyaron) el plano.
El Judyo, tiene la ovligasyon de oyir la lektura de la Meguila, (el rolo de pergamino de Esther) ke konta los faktos, de dar sadaka, de dar i arresivir regalos, de bever vino i mostrar su alegriya.
PESAH
Es la primera fiesta de konmemorasyon.
La historia de Israel empesa el 15 de Nissan en Pesah i se selebra la salida de Egypto. Se nombra tambien La Fiesta de las Matzot, la Fiesta de la Libertad (Hag Haherut).
Es defendido de guadrar en kaaza i komer el hametz (la levadura) durante PESAH. La tadre de un diya de antes se yama la Noche del Seder. Los Judyos tienen el dover de transmeter a sus ijos el kuento de la salida de Egypto en meldando la HAGGADA.
La primera noche de PESAH se empesa a kontar los diyas del OMER i se akodra de la ofrenda del primer ramo de la sevada mueva. Se kontan siyete semanas de dolyo i el sinkuenten diya se termina kon SHAVUOT, las semanas…
La MIMOUNA es una tradisyon de las komunitades marokanas ke meten fin a la fiesta de Pesah.
LAG BA OMER
EL TRENTA I TRESER DIYA DEL DESKUENTO DEL OMER
Es un diya de alegriya ke se selebra el 18 de Iyar i ke mos akodra la fin de una epidemiya ke mato a ventikuatro mil disiplos del Rabi Akiva en tiempo de la revolta de Bar Kohba kontra Roma.
YOM HASHOA, el diya de la Shoa
El Estado de Israel desidyo ke el 27 de Nissan sera la data del Diya de Rememorasyon del Holocausto para la memorya de los sesh milliones de Judyos ke fueron assasinados por los nazis i sus kollaborantes en los payizes konkistados de Europa i del Norte de Afrika durante la Segunda Guerra Mundial.
YOM HAZIKARON –
EL DIYA DE LA REMEMORASYON
YOM HA ATSMAUT –
EL DIYA DE LA INDEPENDENSYA DE ISRAEL
EL 5 de Iyar (El 14 de May 1948) David Ben Gourion proklamo la Independensya del Estado de Israel en Tel Aviv. El YOM HATSMAUT es una fiesta relijyoza i nasyonala en mizmo tiempo.
Un diya antes, EL YOM HA ZIKARON, es un diya de dolyo para akodrarse de todos ke kayeron para ke egziste ISRAEL. Se oyen las sirenas en el payis entero i se observa un minuto de silensyo
SHAVUOT, LAS SEMANAS
Es la segunda fiesta de konmemorasyon.
La Fiesta de la arresivida de los DIEZ KOMANDAMIENTOS se selebra el 6 de Sivan i se melda el Livro de Ruth. En las Komunitades de RHODES se resita la Ketuba de la Ley ke es un kontrato de kazamiento entre Israel i la Ley.
TISHA BE AV
Los dos Templos de Yerushalayim fueron derrokados el 9 de Av. El Primer por Nabuchodonosor i el Segundo por Titus en 70. Es el diya el mas triste del Kalendaryo Judyo. Esta data korresponde tambien a la Expulsyon de los Judios de Espanya en 1492,
El ayuno empesa a la tadre de un diya de antes i termina dospues de ventikuatro horas. Se melda el Livro de las Lamentasyones de Yermiyahu.
La komemorasyon de la deportasyon de los Judios de Rhodes, de Kos i de Gresya se aze en Bruksel, en Cape Town i en Buenos Aires ande biven Judyos orijinaryos de la Isla de las Rozas.
El 23 de Julio 1944, mil i ochosientos Judios de Rhodes i de Kos fueron deportados por los nazis i embiyados a Auschwitz, Kuando yegaron, el 16 de Augusto, el 28 de Av 5704, milikinyetos de eyos fueron immediatamente matados kon gaz.
Se akodra tambien de la eksterminasyon de los sinkuenta i siete mil Judyos de Salonika, de Athena i de toda la Gresya.
(a kontinuasyon) ….. [email protected]
Artículos Relacionados: