“El Sonido De Tus Pasos”
Te huites en deshando el korason asolado,
De tu ombre ke kreyiya ke era tu amado.
Estava oroso i a tu kerensia atado,
Era feliz, kon la konviksion ke so adorado.
Tu figura en mis ojos, tu boz en mis oidos,
Los mijores kantes se kambiaron en bruidos,
Tu alesho me mata, esta de grande largia,
Mis visyos se amataron, piedri mi alegria.
Kamino en las kayes kon miradas vazias,
Akodrandome tu rizas i lo ke me dizias.
El kontakto amoroso de tus lavyos de seda
No puedo olvidarlo, en mi memorya keda.
Siento la ambiertura de tus ermozos kantes
Kero bivir akeos tiempos amorozos de antes.
Mi alma te dezeya i kon suspiros te nombra,
Mis ojos bushkando en los kaminos tu solombra.
Kon despasensya espero los sonidos de tus
pasos,
Deseo tus kaveos sedozos por karesarlos.
****
“Una Mujer en Dezespero”
Le avia dado mi korason i mi afekto,
Lo avia adorado kon un grande respekto,
Esta tadre topi la kaza triste, asolada,
No estava akeya alma tanto adorada.
Asperi kon despasensya hasta la madrugada,
Bivyendo desgustosa kon mi puerta entornada.
Mi oido en sus pasos yo kon un dezespero
Komo si fuera disde un sieklo ke lo aspero.
Se espartyo deshandome la buyor de su boka,
Tengo los plaseres de sus bezos ke me aloka.
Ande kedaron sus karesos i todas sus djuras?
Sus planos por el futuro, sus promesas siguras.
Esto abatida komo un pasharo sin alas,
Kon un korason ferido i kon pensadas malas.
Non puedre bivir kon la falta de mi kerido,
Piedri mi salud i mi alegriya…mas no riyo.
Me veyo en una vida de grande desolasion,
Bivo kon ilusiones para topar konsolasion.
Espero serkamente retorna a su morada
I sekara las lagrimas de mi kara mojada.
Artículos Relacionados: