MASADA
66 AD es el anyo del primer revolto. Los eskritos sovre esta epizoda de la Historya se puede topar en LA GUERRA KON LOS JUDYOS de Flavius Josephus. Asigun Josephus un grup de Judyos (zealots), los “Sicarii” puedyeron konkistar Masada de las manos de los Romanos en el invierno de 66 AD.
Dospues de la kayida de Yerushalayim en 70 AD, Masada se incho de refujiyados ke fuyeron ma ke estavan determinados de kontinuar sus kombatos kon los Romanos. Es alora ke Masada se izo el lugar fortifikado por los atakos durante los siguientes dos anyos. En el invyerno de 73/74, el governador Flavius Silva se metyo en tino de absolutamente tomar Masada i derrokar la rezistensya una vez por todas…..
Grasyas a las kondisyones del dezierto, las installasyones de los Romanos, komo el kampamiento, los refujyos, las muralyas i las baryeras kedaron intaktos lo ke dyo a los arkeolojistos la posibilitad de entender i ver komo Masada fue asedada. Kuando las muralyas de Masada empesaron a derrokarsen por los atakos de los enemigos los “Sicarii” entendyeron ke sus forteressa kayeriya i les kedava poko tiempo. Kayeriyan entre las manos de los Romanos…. Es ansina ke endjuntos desideron un akto ke ni se puediya pensar…. Josephus disho ke uno de sus liders, Eliezer, tomo la palavra i se adreso a sus hombres dizyendoles :
“Ke muestras mujeres mueran antes de ser violadas i ke muestras kreaturas no konoskan la amargura de ser los servios de los enemigos. Dospues ke los mataremos, mozotros tambien mos ayudaremos a kedar liberos por siempre. Antes kemaremos todo para no darles el gusto de appropriarsen de muestros bienes. on.Preferemos la muerte a ser sus esklavos….”
Es ansina ke los ke guadraron Masada fueron nombrados komo los heros de la nasyon i siempre tendran sus lugares en muestro korason.
POR UN PUNYADO DE MI TIERRA
I mismo si me dan todos los derritos
La korona de un otro payis i tronos
Se oyen de muy muy leshos
Mi korason i sus batimientos
Solo por mi punyado de tierra,
Por mis deziertos
I la vedre Galil ke es mi alma
Kada gota de su agua
Es sakrada
Mis venas se sekan
Si sus luvyas no yegan
Mis manos verso los Sielos imploran
Paz para mi puevlo
Los guerfanos i las bivdas ke yoran
Porke ay un solo payis en el mundo
Ke me da respekto i me kovre d’orgulyo
la Tierra Prometida, el Payis de Canaan
Miel de mis lavios i leche de mi pecho
Sharope blanco
Istanbul
Artículos Relacionados: