Diario Judío México-
Savemos ke los liones i los tigros son salvajes, predatores (depredadores) ke pueden englutir kon keyf las personas si tienen ambre i la oportunitad… Porke es el instinkto de la natura ! Lo ke les ambezo sus madres… Es por esto ke vamos a sus enkontro tomando prekosyones, armados, i savyendo lo ke mos aspera en kavzo de…. Kon esto los amamos ! Muncho ! Dezeamos karesarlos, pasar tiempo kon eyos, mizmo tenerlos en muestras kazas si esto era posivle..
Espanyoles se estan ambezando a amarmos por tener la mizmo kultura, la mizmo lingua.. Se sienten “en famiya” kon mozotros, komo mozotros lo sintimos kon eyos… Espanyoles latinos i mozotros es una atadura, un laso, una relasyon ke no asemeja a dinguno otro en el mundo ! Des de mi primer viaje a Espanya, tenyendo muy pokas nosyones de la inkizisyon, puedeser savyendo ke eramos orijinaryos de Espanya solo, me sinti Espanyola, de la gente ke vide komo mis ermanos, de la lingua ke me namori, de esta tierra ke keriya abrasar….
Ke me importa la relijyon ? Ke me importa si eyos son Kristianos i yo so Judiya ? So what ? La relijyon no es i no deve de ser una baryera entre las personas… Es una koza muy personal.. La persona SIEMPRE tiene su propria relijyon (o no kreensya en Di-o, has ve shalom,) ke renya en su korason, dospues de pasar por variyos tipos de filtros, de mentalitad, de ideyas, de kultura, de “brain washing”, de estudyos….
Un diya va vinir ke los seres humanos van a pensar komo mi ! Akel diya no avra guerras, las personas se van a amar entre eyos i munchas kozas trokaran por el bien.. Yo no lo vere ma tengo fe ke esto va vinir, seya kualo seya el nombre… 
Oyi munchas vezes i por diversos personas ke la sivilizasion Judeo-Espanyola no egziste mas.. Aze partido de la historya ! . En muestros debatos dizen ke los sefardis fueron assimilados por los payizes ke les dieron azilyo, otros peryeron sus vidas en la Shoa, i los ke kedaron, azen partido de la populasyon de Israel a lakuala emigraron dospues ke se kriyo el Estado Judyo.
Ma estos illustres personajes no dizen nada i se kedan silensyozos sovre los muy nombrozos desendientes ke biven oy en diya en Espanya i ke pensan i se deklaran kristianos, porke ni saven i ni bushkaron kualas son sus raises… I lo aksepto ke no es koza fasil, mizmo si los rejistros espanyoles fueron muncho mijor guadrados ke lo fueron en Turkiya. Las komunidades sefardis se repartieron en las diversas rejyones del mundo .
Egzistiyan komunidades judias sefaradis en Konstantinopolis, la kapital del Emperyo Bizantino antes ke kaygan delantre de los Turkos. Eran los Romaniotes ke mas tadre fuzyonaron kon los Sefaradis ke se refujyaron al Emperyo Ottomano en tiempo del Sultan Beyazid II . Este aviya embiyado Kemal Reis i su flota a Espanya para transportar los muzulmanos de ENDULUS, (ANDALUZIYA) al Norte de Afrika, porke aviyan perdido la guerra delantre de los Kristyanos i aviyan demandado del Sultan Ottomano ke los ayude a salvarsen de aya. 
De la mizma manera, Kemal Reis aviya resivido ordenes del Sultan para transportar los Judyos de Espanya a Salonika i a Konstantiniye asigun sus dezeyos de refujyarsen en el Emperyo Ottomano.
150.000 Judyos fueron transportados i arresividos en la kapital i otras sivdades ande fueron installados i bien kudyados. Isak Abravanel asegura ke yegaron a Estambol 15,000 Judyos Espanyoles ma se pensa ke son muncho mas porke savemos ke eran mas nombrozos de los de Salonik ke kontavan approx. 70.000 almas en la Segunda Guerra Mundial.
Kon tiempo los Judyos prosperaron i asuvyeron a los mas altos grados del emperyo. Por seguro ke se pasaron evenimientos dezagreavles i mizmo bastante diffisiles de vezes en kuando, ma es un fakto tambien ke dospues de 500 anyos ay dayinda unos vente mil judyos en Estambol ke biven sin dingun mal, repozados kon echo i provecho, kazas i almenaras, mijor de la majoritad de los otros payizes ande se topan, en la diaspora.
No kale olvidar ke la Juderiya de Turkiya seya pormodo de la politika del payis seya porke los mallogrados no ayegaron a konkistar la Turkiya tambien, fueron salvados en la Shoa !
Munchos de los sovrebivientes de la Shoah emigraron a Israel o a los Estados Unidos i Kanada, kuando dezaparesyo la grande komunidad de Salonika.
Los Sefardim en la Serbya i los payizes vizinos se estimavan ser 100,000 miembros verso el anyo 1920. Despues ke la komunidad sufrio una eksterminasion de kuaji 70.000 almas, igual al kavzo de Salonika, los sovrebivientes emigraron tambien a Israel o a los otros payizes de Amerika. Las komunidades establesidas en Bulgaria o Rumania sufrieron las mizmas kozas.
La aminguasyon de la povlasion desplasada del Norte de Afrika no se devyo orozamente a la persekusion i a la eksterminasion de la parte de los nazis. En el anyo 1950 se kontavan 300.000 Judyos habitantes en el Marroko. Kedaron solo 20.000 en 1975, dospues de la Independensya del Marroko i la grande emigrasyon marokana a los Estados Unidos i a Israel.
Lo mas lamentable, yo penso, es ke las personas no se akodran muncho de sus linguas maternas, la dulse lingua Judeo-Espanyol ke era la lingua de los nonos, de los paryentes i de los amigos del kortijo.
Terroristos Iranianos attakaron kon vehikulos kargados de bombas la Embasada de Israel en Argentina (17.5.1992) i el Centro de la Assosiasyon de Mutuales Israelitas Argentinas (AMIA) en Buenos Aires. (18.7.1994) kavzando 22 muertos i 242 firyidos en el primer dezastre i 85 muertos i 300 firyidos en la segunda katastrofa….
La povlasion Sefardi en Amerika Latina se organiza en un mozaiko de grupos eterojenos, kon tradisiones kulturales diferentes dependiendo de los payizes de loskualos emigraron. Se deve de entender, ademas, ke la politika, la mentalitad i la vida sosyal en los payizes Ibero-Amerikanos son diferentes de los payizes de emigrasion de los Sefaradis. El nivel de adaptasyon a una mueva vida i a una mueva kultura bien enrasinada, es diferente entre los grupos ke yegaron de los payizes del Oueste o del Este de la Europa . En fakto, todos los Judyos de esta partida del mundo sufriyeron de las terrivles aksyones i sus konsekuensyas del treser Reich (Yemahshemo) i se ve, malhorozamente, ke a parte de la Inglaterra i la Italia ke guadran kehilas importantes, la poblasion Judiya aminguo de manera dramatika en los otros payizes de Europa.
Dizen ke los Judyos fueron siempre ovligados de defendersen para sobrebivir.
Por agora….. Por agora ! No va aver, primero el Di-o, un otro holocausto ! Israel no lo va permitir ! El Judyo no es mas el kodrero ke yevaran al degoyo. No avra mas salas de gas i muerte kollektiva! NO MAS! Muestros mansevos no son mas los chikos Judyos kayados ke se espantavan de sus solombras en la Europa salvaje. Se espyertaron los leones de Yehuda.
http://fr.israelvideonetwork.com/medley-des-meilleures-chansons-de-tsahal/
El Judyo ya se ambezo dospues de sieglos ke se deve de kombatir para egzistir, salvar su Puevlo i su Payis. No troko nada des de la Antikitad al Sieglo 21 ! Los mizmos odyos, los mizmos selos, la mizma ambisyon, los mizmos menesteres, enteresos mas interesos, sangre, violensya, el poder…. No ay remedyo ! Ansina es, ke pekado, i se deve de tomar pasos en konsekuensya…
Oy en diya la media es el soldado kon la mas grande habilitad de sembrar el odyo kon una propaganda de mas en mas elaborada ! Es ken merka los jornalistos, las gazetas, las kadenas de televizyon, los magazines, los senaristos i los produktores de filmos ke rekolta lo ke kere de la opinion publika. La guerra kayinte se bolto a ser una guerra de propaganda, de demonstrasyones, de mintiras senarizidas, de ser de dos karas i sembrar odyo todo lo ke se puede, en kaza, afuera i al etranjero.
Israel tiene de guerreyar kon los mizmos medyos.. No es en estando kayados kon disdenyo a las mintiras i kon altessa de karakter ke se puede surmontar ansina de juegos suzyos, baratos i sin honor….Sovre todo ekstremamente danjorozos !
ADELANTE ISRAEL !
AM ISRAEL HAY VE KAYAM AD HA NETSAH !
Artículos Relacionados: