La antika sivilizasyon de la fertila mesopotamya entre los dos rios biblikos : el euphrat i el dekel
Devemos las informasyones ke me preparo a sometervos a los famozos Sumerologos, multiples fuentes, eskritores i autores ke estudyaron la sivilizasyon Sumeriana a traves los lavores arkeologikos, las famozas tabletas gravadas ke se deshifraron i entre estos la persona de siensya, historyana i autora de munchas ovras Muazzez Ilmiye Cig, fiestando oy sus 107 anyos…
Los Sumerianos yegaron a Mesopotamya de las montanyas del HINDIKUSH (Oy en el Turkmenistan) el payis del LAPIS LAZULI. Una splendida kolleksyon de estas piedras presyozas se topa en el Ashmolean Museum en Oxford Inglaterra.
La justisya moderna, las relijyones, la eskriturya, la sosyolojiya tienen sus raises ekstendidas fina SUMER. Por seguro ke se deven a la manera ke los Sumerios biviyan, a sus rituales i a sus kreensyas.
Nunka en la historia se aviya fraguado un monumento tan kolosal por el dio i el rey de los Sumerianos… La vida se konsentrava en las sivdades de Uruk i Ur al deredor de sus templo i el palasyo del rey, el “Lugal”, una kuaji divinitad entre los dios i el puevlo. Es Innana, la diosa de la fertilitad, una de las figuras las mas importantes de esta sivilizasyon.. Uruk fue la primera sivdad de la antikuitad.
Sus muralyas eran epesas de 4-5 metros i altas de 6 metros, Entornavan la sivdad kon 9.5 kilometros.
Hans Nissen kalkulo ke 1500 ovreros fueron lavorando diez horas al diya durante sinko anyos para realizar el grande ZIGGURAT de Uruk, la sivdad kon una poblasyon de 80.000 personas.
De los Sumerios mos keda una ovra epika del legendaryo rey GILGAMESH, munchas kolumnas de piedra (estelas – monumentos) deskrivyendo sus guerras i sus viktoryas, el heroizmo de sus rey Eannatum de Lagash derrotando la sivdad Umma, la litografya del buitre (vulture) kon dos kavesas komyendo sus enimigos. Una otra ovra importante es la plaka de piedra gravada de Ur-Nanshe (2500BC) kontrolando los lavores del templo Ningirsu el dio patron de Lagash. Se deve de mensyonar tambien la Victorya de Naram-sin un monumento ke deskrive la guerra kon sus enimigos Lullubi de las montanyas Zagros. Lo vemos en este monumento kon una kaska kon kuernos (komo los de los vikingos) ke reprezenta un motivo divino.
Los artistos del mundo viejo i los sientistos kontemporanos, por seguro ke kontribuaron muncho a azermos sintir un poko la vida antes miles de anyos.
Solo de gastar vidas enteras para pueder meldar las gravasyones a la piedra de la eskritura kuneiforma, los ganchos i las figuras bastan para respirar akeyos tiempos kon sus allegriyas, sus fiestas, sus viktoryas i sus derrotas, sus esklavos lavorando en los mas duros lavoros, las famiyas, los soldados ke no retornaran de las batalyas, los firyidos i la sivilizasyon ke avansa sin tener kuento de nada fina muestros diyas….
Artículos Relacionados: