No es una mujer ma una una estreya ke viene de amatarse a sus 99 anyos dospues ke fue alimentada por su naris durante 5 anyos i tuvo suporto medikal…. Portanto, deklararon ke fayesyo pormodo de un enfarkto del korason..
Sari (zsa Zsa) Gabor nasyo en Budapest en 1917 . Su padre era un militar i su madre aviya heritado una joyeria. Se egrandesyo en la rikeza kon sus dos ermanas Eva i Magda. A sus 13 anyos la metyeron en una eskola en Suissa i es aya ke empeso su karyera en la scena kon una operetta. En 1936 fue elejida Miss Hongria. Konosyo intimamente munchos personajes illustros, entre otros Ataturk, Sean Connery, diktatores LatinoAmerikanos …
Su primer marido a sus 18 anyos era un intellektual Turko, architekto diplomado de Alemanya, jurnalisto, Burhan Asaf Belge, kon ken estuvyeron kazados entre 1937-41. (Ministro del Partido Demokrato en 1957 – Lavoro en la Radio Alemana de 1963 fina 1967, anyo ke se muryo. Burhan Asaf Belge fue metido en prezo a vida des del anyo 1961 ma fue liberado en 1963).
Zsa Zsa i George Sanders
Zsa zsa emigro a los Estados Unidos en 1941 pormodo de la Segunda Guerra ke kemava la Europa. Su madre puido fuyir tambien de los Nazis kon su marido Sueduazo i vino a su lado en 1944. La sosyetad Amerikana resivyo las tres ermanas de grande belleza kon muncho plazer. Assistiyan a las fiestas de los rikos i de gente selebre.
El segundo marido de Zsa Zsa era Conrad Hilton en 1942. Les nasyo una ija, Franseska en 1947 ke fue su unika kreatura. Dospues de su divorsyo se kazo por la tresera vez kon George Sanders en 1949. Jugo en el filmo “Moulin Rouge” en 1952. Siendo kazada kon George Sanders teniya por amante a Porfirio Rubirosa, un playboy diplomat Domenikano ke fue kazado en un primer matrimonio kon la ija del diktador Trujillo.
Zsa Zsa tuvo roles kon los mas grandes aktores de Hollywood i jugo en 38 filmos i muy munchos programas televizadas. Eva i Magda tambien eran aktrisas ma manko famozas.
Zsa Zsa era una mijer ekstravagante i no teniya dingun espanto de emleskarse kon las Leyes, La ven chaketonando un polis en Espanya i trayendo su perro a Inglaterra malgrado ke esto era defendido…
En 1975-76 estuvo kazada kon Jack Ryan, el kreador de la las kuklas “Barbie”. Despues se kazo kon su avokado Michael O’Hara ke le aviya logrado el divorsyo . Le gustava dizir ” Nunka odyi un hombre al punto de darle atras los diamantes… ” i ” So una buena mujer de kaza.. Nunka desho mi kaza mizmo dospues de separarme de mi marido ! ” Kedaron kazados durante 7 anyos kon Michael.. En 1983 se namoro d’ un otro avokado i aktor Felipe de Alba ma esta union fue anulada kuando salyo ke no fue divorsada de Michael O’Hara de manera legal…
Zsa Zsa se kazo 9 vezes i era una mujer ke le plaziya estar en familya, kon sus keridos i era una buena nikochera. Su matrimonio kon su d’alkavo marido a la edad de 69 anyos, Frederic Prinz von Anhalt, 30 anyos mas chiko de eya, duro fina ke eya se muryo. Tuvo pletos kon su ija pormodo de el i no es seguro si se entrego de la muerte de su ija ke se keshava ke estavan espartidas kon su madre pormodo de el…
Se dize ke la senyora de la luxuoza villa de Bel Air en California peryo milyones de Dolares pormodo del grande estafador del Wall Street, Bernie Madoff !
Penso ke tanta rikeza, i sovre todo tanto belleza ke kita lokos a todos los hombres, nunka trayeriya felisitad i una vida repozada i stabilizada a la mujer, porke siempre se infrentara a los avanses de los ke la dezeyaran i la desharan dospues ke no es mas ke una roza ke peryo su briyo o no los atrayeriya mas… Una ermoza mujer nunka pensa ke kale ke se esfuerse para guadrar el interes i el amor de su marido. Al kontraryo siempre va kerer mas i mas adulasyones i la sola koza ke le importariya seriya su belleza….Es por esto ke vemos las artistas, los modelos i las muy ermozas mujeres siempre divorsyando i nunka siendo satisfechas, felises i kon una vida organizada……Ma fina kuando se puede esperar una vida de fiestas kada diya ? Kon todo esto a parte, no egziste mujer ke no kijyera ser la mas ermoza de todas…. I, hombre ke no kijyera lograr una de estas…. Horozamente para eyos, no es lo ke afita en la vida de kada diya ! El kontraryo es muncho mas triste porke las mujeres no deshan repozado el hombre ermozo, ademas si tiene una buena karyera i muncho dinero en banka ! Por seguro ke eksepsyones no azen partido de la regla i no todo es pudrido i sin valor…
Zsa Zsa se fue ma su leyenda sera akodrada para las ke sonyan de ser komo eya…Dezeyada, amada, famoza, rika, kuvyerta de joyas, logrando todo lo ke kere, fiestas kada diya, ermozas moradas i koches, vakansya enkantadoras, viajes, amigos i pedasikos de felisitad aki, aya i mas aya…
Interesante de saver ke Zsa Zsa era djudiya i ke el primer hombre en su vida fue Kemal Ataturk…
Diyas de luz i amor
[email protected]
Artículos Relacionados: