Mi sovrina Fortune Melamed, ke yego en 1948 a venir kon la aliya de Bulgaria a Israel, tuvo tres ijas, Lea, Malka i Irit. Después ke bivio en un kibuts, eyos todos se establesieron en Petah Tikva i bivieron ayi. Las kondisiones de vida después del kibuts, en la sivdad, fueron muy duras i todos lavoravan para ganar una vida desente, ma las ijas estavan felises ke sus madre estava en sus vizindado i siempre dispuesta a ayudarlos. Fortune, ke se ambezo el ebreo, topo i enkontro algunos empiegos komo ninyera, komo vendedora en la sarsicheria al lado de su kaza, o komo kozinera en el restaurante en la kaye Florentin.

Pasa punto, pasa mundo. Un día Lea se aserkó de su madre, diziéndole ke kería irse a Florida, en los Estados Unidos, donde su marido avía topado un lavoro lukrativo en la Universidad de Miami. Su madre entro en un shock, fue una koza inesperada, por modo ke eya tanto dependia de su ija, ke no sólo bivia endjuntos kon eya, pero también era muy adoravle, enérjika, intelijente i amostrava kara i un grande amor a su madre.

Apenas Fortune se akostumbro a este estado i a la idea ke Lea partio al estranjero, kuando un día Malka, ke se avía kazado kon un injeniero franséz, fue invitada por su famiya en Grasse (Fransia) a asumir el lavoro komo un ekperto de perfumes, en una de las fabrikas ayi. Grasse es el sentro de la industria de perfume fransez i es konosida i renomada komo la kapital del mundo de perfume. Los ekspertos ke golen los aromas diferentes se yaman la “nariz”.

Después de la partensia de Lea i Malka, Irit, la más joven entre las ermanas, sentía kompasión por su madre i la invitó a venir bivir kon eya en su kaza. Fortune estava triste i amargada ma naturalmente por siguro estava feliz de ver a sus ijas bien establesidas en el ajeno. Ma kualo akontesio después de unos kuantos anyos? Fortune tuvo ke sostener otro bokado amargo, kuando también Irit acheto a un lavoro manyifiko en la Embasada de Israel en Berlín. Esto fue un movimiento insospechado, ke Fortuna nunka imajinava ke le iva akonteser a eya. No savia si tenia de alegrarse o yorar, te tomar sufiziente fuersa para sovrebivir esta aharvada o de ser en akordo kon su ija.

Lo úniko ke kosolava a Fortune fueron las promesas de sus ijas de venir de vez en kuando a vijitarla en Israel. En konkluzion, las vijitas eran aresentadas bien, para el inverno, para las fiestas, o para okaziones espesiales. En otras palavras i en kurto, todos vinieron a vijitar a sus madre. En realidad, los dias de la vijitas fueron enregistrados ermozo en los kalendarios de todos en kolor kolorada i se asperavan kon amor i alegria de Fortune, ke ya estava entrando en anyos i agora estuva solika, después de la muerte de Jonathan.

Sin duvda, kada una de las ermanas tenia kontakto una kon la otra, se komunikavan i savian sovre sus aktividades i ke se pasava. Komo ermanas, tenían una relasión saludable, karinyoza i interesante. Bien, ah! me olvidi de kontarles ke la madre Fortune, antes ke sus ijas deshen la kaza i salgan al ajeno, resivieron de eya una foto de eya misma, bien rodeada en un kuadro elegante i fino de plata.

La vida por Fortune, ke entremientes se akostumbro mas o menos solo a las vijitas de sus ijas, se adjusto poko a poko, ma profundo en su korasón eya se aresento kon la absensia de sus ijas i de su espozo. Ansi Fortune ampeso de muevo sus enkontros kon la djiente de su vizindado i sus amigas, malgrado ke se via una tristesa profunda en sus ojos, ke se alumbravan de alegria kuando eya savia ke van a venir a vijitarla. Su apartamento fue siempre bien kudiado, malgrado ke de vez en kuanto pensava de entrar en una kasa de viejos.

Kon el pasaje de los anyos, Lea, ke bivía en Florida, venia solo a grandes intervalos vijitar Israel, mientres ke Malka i Irit ke bivian en Evropa ,tuvieron mas posibilidades; les era mas fasil de venir a Israel por modo de las distansias mas kurtas de sus payises asta Israel.

Los ijos de las ermanas también kresieron, algunos de eyos entraron en echos, en universidades i más o menos la mueva jenerasion izieron sus proprios planos i preparasiones por el futuro. Dainda las relasiones de todos las famiyas se mantenian bivas, las muevas invensiones teknolójikas ambién ayudaron a este buto i kontribuyeron a las sanas relasiones entre eyos.

Komo a Lea se estava aziendo difísil de vijitar, todos se desidaron un día ke Uri, el ijo bohor de Malka, devia partir a Florida ir a ver a su tía. Kuando yegó Uri a Florida, esto fue una reunión muy enkantadora, i todos gozaron de la vijita de sus primo. Kuando Uri finalmente devia partir, Lea le amostró la foto de su madre, ke dainda tenía un lugar importante ensima del bufetiko en la grande sala. Uri, kon grande kudio, tomó la foto, se dio kuento kuanto su madre se avia envejesida en los anyos pasados i sus dedos tokaron kon finesa el kuadro i a su deredor. De mismo el amostro una kuriozidad de aboltar el kuadro para ver la parte posteriora. Kon sierta dekstreza i livianes, el avrio el kuadro i vido una nota chika entre el vidro i el kartón.

Kuando tomo la nota chika en su mano ampeso a meldarla en una boz basha.

“Yo, la afirmada Fortune Melamed, dezeo anunsiar ke Lea Serousy no es la verdadera ermana de Malka i Irit. Kuando yegi a Israel, me mandaron al Kibuts Neot Mordehai donde lavori kon las gainas. Ayi me enkontri kon Rafael, también un ole hadash desde Bulgaria i me enamori de él, en pasando algún tiempo endjuntos

“Kuando se oyo ke su esposa iva venir al kibuts, yo, amargada, lo deshi a Rafael. Después de un tiempo muy kurto, enkontri a Jonathan i komo era en estos tiempos, kompartimos la misma kamareta i rápidamente mos desidimos de kazarmos, malgrado ke le konti ke yo estava prenyada de un otro ombre. Jonathan me amo muncho i me aksepto tal ke so. El fue un marido enkantador, él adorava a Lea, la kudiava i la engrandesio komo su propia ija. Yo le di a Jonathan dos otros ijas, Malka i Irit. Dinguno supo mi sekreto, ke no fue divulgado pormodo ke Jonathan yevo este sekreto mio kon si en su tomba.

“Mi último dezeo es demandar al lektor de esta nota de no deskuvrir su kontenido, ma yo kero darle a entender ke tiene dos posibilidades. Meter la nota ande la topo, o desbaraserse de eya en kemandola. Yo desho a ti, kerido lektor, de desidar lo ke tu kreaa ser la mijor solusion. Aze lo ke pensas!!! Puede ser seria de akordo kon ti.

No hay comentarios

Leave a Reply