Mismo si kayo a tus kaveyos unas blankuras
I ke tu frente kon tu kara son yenas de rugas
No te aravyes kon tu vida,ni kon tu ventura,
Bive kon alegriya ,es la ley de la natura.
Mismo si pasates tu manseves kon vida dura,
Olvida lo pasado,sonrizas seran tu kura,
Para estar feliz kon tu persona i tu famiya
I ke tus keridos esten alegres kada diya,
Deves ser optimisto,mira a tu sol ke briya,
Dales kerensya para k’esten yenos d’alegriya .
Tu salud i un buen entorno ke seyan tu gozo
Bive alegre en este mundo maraviyozo.
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Artículos Relacionados: