En los serka de 30 anyos de publikasion de Aki Yerusalayim ya tuvimos munchas okaziones de alegria i kontentez i tambien munchos momentos de ansia i preokupasion frente a los ostakolos ke enkontrimos en muestro kamino; djuntos kon esto, el fakto ke ya mos topamos en el numero 83 de esta revista es un prova de su vitalidad, i tambien de la apresiasion de la kuala goza al seno de sus lektores ansi ke numerozos sirkolos i faktores kulturales, ke akuden a muestro ayudo kada vez ke semos enfrentados por graves problemas a los kualos mos parese ke no ay solusion.
No es un sekreto ke Aki Yerushalayim tiene graves difikultades finansiarias, entre otras porke se obstina a publikar solamente en ladino, lo ke mengua konsiderablamente el numero de muestros lektores, mizmo de entre los ke son interesados en la kultura sefaradi ma no konosen el ladino bastante bien para poder meldarlo fasilmente.
Kontinuamos en este kamino, en el kual empesimos en el anyo 1979, porke mos parese importante ke ayga a lo menos un periodiko (mos alegramos ke kon la kreasion de la revista El Amaneser, oydia ya ay dos) ke todos sus artikolos son en ladino, entre otras para servir de tribuna a los ke pueden eskrivir en esta lengua i mantener ansi biva la flama de la kreasion literaria i jurnalistika en esta lengua.
Es una grande satisfaksion para mozotros de ver ke ya no semos mas tan solos en este kampo de aktividad, i ke ainda antes de la revista El Amaneser se djunto al kampo de los ke eskriven solamente en ladino el sitio de internet LadinoKomunita tambien. Mos alegramos ainda mas de ver ke LadinoKomunita, i sovretodo su fondadora Rachel A. Bortnick, tienen a koro la kontinuasion i el enfuertesimieno de las publikasiones en ladino, i entre eyas Aki Yerushalayim. Una yamada a ayudarmos, ke fue echa en este sitio en Novembre 2007 ya mos trusho muevos abonados i ademas de esto, grasias a la intervension i apoyo de la Sra Bortnick, un dono de $ 3000, de la Foundation for the Advancement of Sephardic Studies and Culture, en New York, ke mos permetera de kuvrir los gastes de este numero de la revista. Para los ke vendran despues – El Dio es grande!
Aprovechamos la okazion de este chiko resfolgo, sin pensar demazia a komo sera la situasion otros 6 mezes, kuando vendra la ora de publikar el No. 84 de la revista, para detenermos un punto, examinar la situasion i demandarmos kualo alkansimos en este periodo i kualo keda ainda para azer.
Unos 40 anyos atras, todos pensavan ke el ladino i su kultura estavan agonizando. Avia mizmo ken pensava ke no kalia bushkar a detener este proseso sino ke, a la kontra, kalia akselerarlo mas afin ke los olim sefaradis puedan integrarsen lo mas rapidamente ke fuera posible a la kultura israeli.
Es ke deviamos akseptar esta opinion? Es ke mos yerrimos en opozandomos a eya kon toda muestra fuersa? O es ke tuvimos razon de kontinuar en muestros esforsos i muestra esperansa para una revitalizasion de la kultura djudeo-espanyola, malgrado ke la mayoria de los ekspertos pensavan ke esta no era una opsion realista!
Yo kreo ke no mos yerrimos i ke a la kontra, en las ultimas diezenas de anyos fueron logrados alkanses impresionantes, no solo en lo ke toka la konservasion de muestro foklor i sovre todo de muestros kantes ke se izieron populares en una eskala internasionala, sino ke tambien en lo ke toka el estudio i la investigsion de muestra lengua i literatura eskrita, en universidades i sentros ademikos, en la publikasion de sienes de livros i miles de artikolos sovre la istoria i la kultura de los sefaradis, ets.
Lo interesante es ke kuanto mas adelantamos en el estudio i investigasion de esta kultura, mas i mas mos damos kuento ke ay munchas kozas ke no konosemos ainda bien, o ke no konosemos del todo, i ke devrian ser investigadas kon la mas grande urjensia, siendo ke ya pedrimos demazia tiempo en este kampo.
Mozotros, los sefaradis ladinoavlantes del siglo 21, semos los ultimos guardianes de una lengua i una kultura ke se konservo durante mas de 5 siglos i es konsiderada oy dia komo un trezoro kultural no solo del puevlo djudio sino ke del mundo ispaniko tambien. Esta es una erensia de grande valor ke resivimos de muestros padres i ke devemos azer todo esforso posible afin de transmeterla a muestros ijos i inietos tambien, ma para kumplir esta tarea tenemos menester del ayudo jenerozo de todos los faktores kulturales i finansiarios ke tienen intereso en el mantenimiento de esta kultura.
Asta pokos anyos atras mos paresia ke no avia ninguna shans de poder konvenser a estos faktores, en Israel ansi ke en otras partes del mundo, a ayudar a una kultura ke ya estava desparesiendo; ma la kreasion de la Autoridad Nasionala del Ladino, de los Sentros al nombre de Naime i Yeoshua Salti en la Universidad Bar Ilan, i de Moshe David Gaon en la Universidad Ben Gurion, ansi ke de numerozos otros sentros i institusiones en Turkia, Gresia, Fransia, Espanya, Estados Unidos i otros paizes mas, es el sinyo de un proseso ke esta indo i enfuertesiendose, de lavoro i kolaborasion para adelantar en este kampo.
Es esto ke mos da la esperansa de reushir, malgrado todas las difikultades, a realizar los numerozos proyektos ke tenemos ainda para deskuvrir los trezoros de muestra kultura ke estan eskondidos entre las pajinas de los livros en muestros archivos i bibliotekas, traerlos a la konosensia del publiko, i tambien renovar i intensifikar ainda mas la kreasion literaria i jurnalistika en ladino, sigun ya lo estamos aziendo desde anyos en Aki Yerushalayim.
Artículos Relacionados: