Diario Judío México - La vedra es ke yo sharopeyo lo ke kero embiyar a mis amigos un poko o kaji enteramente (dependyendo del kontenido ma guadrando lo prinsipal) kon el makiyaj de un palyacho i una kalsa amariya i la otro vedre !  Kaveyos zurzuvis i pishkul en la siedra ..  Deke el pishkul  en la siedra ?  Porke en la derecha les meto kampanikas dingi dungi dongi  !

A ver: Esta vez se trata de 5 judyos ke trokaron la vista del mundo !   Por lo ke no izyeron !

El primer fue  MOSHE RABENU  Z”l
disho ke  TODO ES LA LEY.

El segundo fue YOSHUA ben Joseph  Z”l
disho ke  TODO ES AMOR

El treser fue  CARL MAX  Z”l
disho ke  TODO ES (DINERO) IGUALITAD

El kuatren fue SIGMUNDIKO FREUD  Z”l
disho ke  TODO ES EL SEX

El sinken vino ALBERTIKO EINSTEIN i lo espajo todo !

No le plaziya pletos porke su madre le kitava la almika a Albertiko!   Ya savesh ke le aviya dicho  “No aviya otra peliqueria  (berber/coiffeur) de ir antes ke te tomen esta fotografiya de loko atavanado ?  Va i arapate por mundo tuyo !  No ay ke shifros en la vida !  Kualo es ke tienes en el tino ?  De muevo lo vas a kriyar todo ?  Mira las ijikas ke estan pasando !  Ven ke te ize una supika de namorar ! Ay dos diyas ke no komes por no se yo ke ekuasyon ke no te se esta igualando !  A la hamaya ke se vayga !  Nunka ni no !  Ya me espedasates la alma ! 2 semanas ke ni te lavas !  Los moshkos i los piojos te vana komer ! Mil guerkos del ginnam !  Ande pari este ijo trololo, tuguerto entero en SU MEOYO  !!!!

Ke disho ?  TODO ES RELATIVO  !!!

Sin Ley ?  MOSHE RABENU vido ke el puevlo en el dezierto, kon la komida ke kayiya de los sielos se ivan a matar entre eyos i ken save ke otras dezgrasyas si no les dava la LEY, el espanto i koza de tenerlos okupados….DE avlar, de debatir, de ambezar, de observar i de kontar a sus ijos !

Kon el judaizmo….Kuantos se muryeron !

Sin Amor ? Kaliya meter fin a las atrosidades i a las guerras, dar importansya a la kerensya i a la amistad.  A la fraternidad ke trayeriya la buendad olvidada en el mundo…. El Hesed ke el puevlo

estava olvidando por kerer ser kontado, por tener el pueder i la mano fuerte !  No lo kulpa YOSHUA si dospues izyeron kozas ke no deviyan afitar !

Por el kristyanizmo… Kuantos se muryeron

Sin Igualitad ?  Povre Carl MAX  ke kijo komo todos los justos i los buenos ke ayga igualitad en el mundo !  En sus esuenyos solo!!!!

El endividualismo, el egoismo, la kompetensya, el pueder, la atraksyon de la rikeza, el nivel mental, intelektual i emosyonal de kada uno i uno,  la ambre de adelantar, la ambisyon i el selo i ken save mas kualo los tapo kon un kanyamazo limpyo, kon buenas intensyones komo si no egzistyeran i kuando vino el ayre se bolo el tapon !  Ayyyyyyyy !

Kuantos muryeron al nombre del komunizmo ….Kuantos  i kuantos…

Sex  !!!!   El pekado i la mitzva ! El empesijo de la vida i el tormento de la honor  !  El plazer i las kruelitades al entorno de la innosensya de lo natural …  Tanta egzajerasyon, tantas torturas, tantas mujeres matadas, tantos divorsios, tantos pletos.. Duellos ! Sivdades konkistas i guerras en la antikitad…

Deko no puedimos aprender de los animales komo bivir ?

ALBERTIKO….. ENSTEIN Presyado.. Tu a lo manko no matates a dingunos…. Te amo muncho !  En ganeden ke deskanses…

[email protected]  

Kon ganas de eskrivir esta demanyana parese !

SIN COMENTARIOS

Leave a Reply

Artículo anteriorBas-Rhin: les murs d’une mairie recouverts de tags antisémites
Artículo siguienteRomance en Cabo Marqués
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.