I…… KE DIZE EL PIMYENTON ?
El JUDEO ESPANYOL tiene un korason muy ancho… Le plaze inchirse kon toda manera de biervos zurzuvis ! Por ande lo travash aya se va.. riyendo… i todo le yakishea…(le kaye bien!) Ke lo bueno mio !
Al JUDEO ESPANYOL lo mas le plaze komidas, mezas de fiesta, un mupak /kuzina gloriyozo, mujeres lokas por ser elegantes, musyus kon chapeyos i vistidos echos ande shastres alavados…. Kreaturikas intelijentes ke te demandan kozas mas de lo ke les puedes aresponder i una umor sin fin kon konsejikas ke no te deshan ni durmir porke no puedes serrar el livro !
(esto meldando un livro de anegdotas, una lokura !)
Oy tenemos pipinos… pardon pimientos en el menu ! Piemientos dishe ? Ke verguenza ! Pimyentones ! No no pimienton ! Ya lo topi i lo vo aferrar para ke no se fuyga ! Pimienton ven aki……Allado de mi !
Ya esta aki mirando me kon ojikos vedres 🙂 flakito i alto me esta azyendo del ojo ! Tiene una famiya…..Ayyyyy ke m’esta avlando ! Lo oyesh ?
– Me yamo pimienton i esto namorado de la domat 🙂 En vezes me kizdireyo (m’inyervo) i kemo la boka de la gente porke solo pensan a kemarme bivo en
la lumbre o en el gas ! El azete d’oliva amaha mis dolores i kon ajo so tanto savrozo ke las personas se olvidan ke ay otras komidas de komer !
Tengo una famiya muy grande. Las ijas de mi tio, de la parte de mi madre, son todas godras, Se yaman piperushkas i no keman 🙂 Tienen kolores ermozas porke se van al kuafor kada nada !
Unas se azen kolor de berendjena kaji pretas, a las otras les plaze la kolor de la karota, unas son blondas o amariyas i las mas dulses son las koroladas kayadikas. Las ke no estudiaron kedaron vedres ! Esto es…. Todas estas se uzan para las
mijor salatas ke plazen a los ombres ! Las vedres delgadas i godras son buenas para inchir. Reynadas las yaman.
Las mujeres las inchen kon karne o aroz i sevoya, adjustan pinyones i uvas sekas, verdura….. “Las Dolmas ” ! Son nombradas las ijas de mi tio eh ?
Tenemos en la famiya los “charlestones ” tambien. Eyos baylan noche i dia ! No saven kemar i tienenun korasoniko de oro ! Las mujeres las buyen i las echan en el vinagre kon sal i ajo i un poko de agua….Ya son muy aver livyanoz ! largos…
mas godros de mi, ma mas delgados de las ijas de mi tio. Ansina son ! Pueden ser vedres o koloradas…..
En lugares serka del sol ande se tosta el benadam tenemos inyetizikos, inyetizikas, tias i nonos… Estos son chikichikichikitikos ma kemaaaaaaaaaaan !
Los yaman la pimyenta ! Oyveeeeeeeee ke malos ke son ! Ay unos ke son de kolor preta o blanka o korolada ke se majan i se uzan ke polvos en la komida komo sal. Dizen ke son buenos para aflakar. Si ! Derriten la persona ! Ma muncho no se deve de tomar porke son muy fuertes i peligropzos en mizmo tiempo… Mijor no avlar de eyos ke ya me kemi solo de nombrarlos !
Pretos i korolados i blankeyados….. Pimienta… Para la boka de los ke avlan mintiras i dizen kozas feyas…. Aya ke esten !
Yo me kayo i no digo mas nada ! Ya lo oyitej !
Artículos Relacionados: