Diario Judío México - Diario Judío

Venid atras a kaza mis bizbikas. !…Pitititititpiti

Albert Einstein :

” Si no egzisten mas bizbas en el mundo, el hombre puede sobrebivir otros 4 anyos i no mas ! ”

Es kon las bizbas ke las plantas se fertilizan….Si no ay bizbas no avra plantas, no avra los animales i no avra mas humanos en la planeta….

LO DISHO EINSTEIN ! Deke lo disho no lo se… Porke persivyo un peligro en muestro mundo ?

I ESTA PREZENTE ESTE PELIGRO !

Meldi un artikolo ke eksplika ke la populasyon de bizbas ke va diminuando en el
mundo puede trokar enteramente las balansas ekolojikas ! En la primavera 2008 en los las bizbas supito dezaparesyeron ! El Ministeryo de la Agrikultura deklaro ke sien miles de bizbas en 27 estados, de New York fina California, dezaparesyeron supito… A lo manko 600 000 kolmenas / ruches / hives / kovan fueron destruiyidas de manera misteryoza…

Kanada i los payizes de Europa tambien deklararon ke tienen el mizmo problem. El kongre Amerikano envito sientifikos para diskutir de este problem .

Siertos pensan ke la razon es el fakto ke los inviyernos pasan sekos i tivyos … Otros dizen ke es el insektisido “Gaucho” ke kavza ke las bizbas peryen sus instinktos de “topar el kamino” a sus kolmenas….

Turkiya peryo trenta porsyen de su populasyon de bizbas. 130 000 plantas se fertilizan kon el polen depozitado por las bizbas… 5 Milyones de bizbas se muryeron en la Croatia en 48 horas solo !!!! Polonya peryo 60 porsyen de sus bizbas i en Espanya se peryeron sienes de mil tambien.

En la semana dalkavo, agora, Alaska, Kanada, Australya, Gresya, la Suisse, Italya, Almanya i el Portugal deklararon ke sus bizbas estan dezaparesyondo mistoryozamente.

Los apikultores estan en panika !
——————————————————-

Bisbas tienen un rolo de vida o de muerte enla balensa ekolojika del mundo !
80 000 bisbas biven en la kolmena. Los polenes de las flores i de las otras plantas se les pega a las patas i es ansina ke todas las plantas se reproduizen.

Todas las frutas, i las flores se veran enfluensadas ! Las bizbas de una kolmena solo fertilizan mas de un milyon de flores. Sin esto no pueden reproduizir ! Esto kere dizir ke los animales ke komen esto en primero i dospues las personas van a dezapareser.

Los agrikultores de California, i muy munchos otros, se kesharon ke la produksyon de almendras esta dezaparesyondo i tienen 2 Milyares de Dolares de peryita.

DEKE MUEREN LAS BIZBAS ?

Los hombres de siensya dizen ke 3 teoriyas egzisten por oy.

1. El trokamente del klima . El Dr. Max Watkins de la Universitad de California dize ke la balensa biolojika de las bizbas se troko i se bozdeyo pormodo de los mezes sekos i tivyos del inviyerno. No keren mas bivir en koloniyas i una bizba sin
su kolmena no puede sobrebivir.

2. Insektisidos komo el “GAUCHO” … Kavza ke peryen la “direksyon” se sus kolmenas i mueran.

3. Las plantas ke subisaron trokamientos genetikos. En Amerika, ande empeso la panika, dizen ke 40 por syen de las plantas fueron “tokadas” genetikamente para obtener una mas grande produksyon i una mijor kualitad. Se dize ke el polen de estas plantas puedriyan kavzar un efekto toksiko sovre la bizbas.. Los estudyos ke
se azen des de 2001 en la Universita de JENA demonstra ke este puede ser una de las razones.

Agora i a mi me se estan alevantando los kaveyos i los pelos ! Los veygo “en piyes” komo los de Einstein !!!!

Ke otras dezgrasyas vamos a oyer !!!!

Uno disho : Por favor ke stope el mundo un ratiko…. Kero abashar !

Komo se yaman las bizbikas atras ?
Ven pitititipiti….. Vinid mis trezorikos !
pitiiiiiiiiiiiiipititititi… Vos esto asperando !
Vos meti sukar en la kolmena ! I shokolad !
Biskochikos freskos. Pititititititititi….

sharope.blanco[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorConsuelo y arrepentimiento
Artículo siguiente73 lápidas vandalizadas en cementerio judío de Rumania
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.