Diario Judío México
UNA SOLA FRAZA
Kuando todas las luzes se amatan
I las kayes son de muevo asoladas
Kuando todos sonyan o kayados se asentan
Por no pueder durmir kon ideas amargas,
Kuando el sol briya ariva en su reynado
I la mar sentiya en sus ondas vibrando
Kuando las flores avlan de bizbaz tremblando
El ayre karesa las karas komo una mano,
Kuando las demanyanas la freskura mos alegre
O las tadres, kansados, bushkamos el repozo
Kuando me avlan de todo lo ke les agrada
Personas van i vienen kon un abraso karinyozo,
Kuando esto en la guerta, triste i sola
I miro los ke pasan i los arvoles kon fuersa
Kuando bivo el momento sin pensar a la manyan
Lagrimas en mis ojos i un espanto ke me alkansa,
Kuando sin dingunos kamino en las kayes
Mis ojos bushkandote i no estas kon mi
Por no pueder dizirte todo, de mi timides…
Te amo, i no ay momento ke no penso en ti !
Sos une verdadera poetessa kerida.