No ay munchos anyos ke los puevlos se metyeron de akuerdo o inventaron para sus payis unikamente DATAS DEL DIYA DE… para sulinyar la importansa de lo ke desidyeron ke deve ser rekonosido komo una selebrasyon, un interes partikular…. EL DIYA INTERNASYONAL DEL JUDEO-ESPANYOL en el mundo entero es uno de estos…. Se fiesto, komo lo savesh el 24 de Oktubre en Israel, en Europa, en Turkiya in en las Amerikas…. A datas varias en vezes asigun el payis….
A parte las fiestas relijyozas, ay datas para selebrar las fiestas nasyonales de kada i kada payis komo el 14 de Mayo, DIYA DE LA INDEPENDENSYA DE ISRAEL, DIYA DE LA SHOA (27 de Enero), DIYA DE LA REMEMORASYON DE LOS KAYIDOS , DIYA DE LOS MUERTOS, DIYA DE LAS MADRES (10 de Mayo o 1 de Junio asigun los payizes) , DE LOS PADRES (21 de Junio), DE LOS NAMORADOS (14 de Febrero), DIYA DE LOS LIVROS (3 de April) DIA DE LA MEDICINA (14 de Marzo) DIYA DE LOS PROFESORES (24 de Novembre) …. SIN FIN !
De vedra ke el ke kere puede meterse a fiestar 365 diyas al anyo ! I ken gana lo mas en estos “dias” tan espesyales ? Por seguro los negosyos ke venden regalos, los restaurantes, los hoteles, las patiserias, los floristos, los fotografos i los jurnalistos….. Sisu ve Simhu !
I EL DIYA DE LOS GATOS es el 29 de Octubre en los Estados Unidos de Amerika, el 1 de Marzo en Rusya i el 17 de Febrero en Polonya ! Se fiesta tambien el 8 de Augusto. Fue konvenido por los “Fondos Apartados por el Bienestar Internasyonal de los Animales”.
“Internationalcatday” trata muncho i se izo un fenomeno en las medias sosiales !
En los Estados Unidos (Michigan – Oakland University-) un estudyo demonstro ke los gatos sienten la humor de sus duenyos i se komportan en konsekuensya. Ya savemos el amor i la solidaritad de los perros por sus entornos… I komo eyos munchos otros animales ke mos sorprenden kon sus intelijensya i sus karinyo. De mas en mas muestros amigos peludos se estan uzando en la medisina para la geriatria, los hazinos kon problemes psikolojikos, los hazinos “terminales”, los paralitikos, los siegos i otros handikapados. Kon las kreaturas se obtienen rezultados “majikos” !
En kaza, tenemos la alegriya, mi ija i yo, de tener 4 gatos ke son enteramente liberos de azer lo ke keren. Son animales independentes i kuando tienen menester de karinyo vienen a muestros lados i es inkreyivle el karinyo ke mos mostran i sus dulsor. Son intelijentes i mos entienden kuando les avlamos. Durmen 20 horas al diya i nunka se keshan (!) por tener 24 horas agua freska i komida pronta….. El tiempo ke sovra…. Se lavan ! Son hazinos de limpyeza….. I djugan kon sus jugettos o sus kola !
Son los muestros en las fotografiyas… Tenemos Pamuk, Fillosh, Minnosh i Youmak…. Djidjou se izo un angelo el anyo pasado i Tikir povretiko a sus 3 mezes. Los otros tienen 6 anyos i medyo ! Nunka salyeron a la kaya i son kastrados.
[email protected] miauuuuuuuuu !
Artículos Relacionados: