EL JUGADOR
por Sharope Blanco
No tiene nombre, no tiene edad, sus kaveyos se le aminguaron… Lo konosko de su kaminada i de sus miradas a sus lados i detras komo si teniya espanto de alguna koza… Era flako i komo si su kara nunka se aviya ekspozado al sol o a la luz del diya… Sus mushos estrechos no konosen la savor de las palavras dulses, de los bezos d’amor i de las sorizas… Bive solo…. Al kontraryo de lo ke puedesh pensar todo esta en su lugar entre sus paredes, limpyo ma envyejesido, desmizeryado… Da uti (plancha) su lavado ma lo mas, sus pokas kamizas viejas ke mete siempre en los mizmos lugares.
Tiene dos kostumes; el uno komo un smoking, el panatalon briyando pormodo de los anyos durante los kualos fue uzado, las avyerturas de los mangos un poko komidos… La kolor del otro kostum deve de ser un bleu o un grizo ma tan eskuro ke asemeja al preto ! Se ve la diferensya de kolor solo kuando esta al lado del otro, klaramente preto. Se entyende pishin ke fueron kortados i kuzidos por shastres maestros. Los anyos no los tokaron muncho, mizmo si fueron vistidos diya atras diya… Ken save kuantas vezes tuvo ke kuzir los botones ke serran los pantalones i las jaketas. Botones de gueysos halis i no de plastik komo los azen agora !
Kuzeriya por seguro las doublures de las jaketas tambien ke kon tiempo se deskuzeriyan en vistyendolos. Son de seda pura ansi ke los fulares ke le plaze arrodeyar al entorno de su kuello, entre la kamiza i la jaketa, las dos puntas liberas sovre su pecho. Pensa entre si los fulares le da el ayre de algun senyor de la noblessa, mizmo deskayido, en egzilio i sin dinguna fortuna, pormodo ke las mujeres de sus dinyas famiyas ya vendyeron todo lo ke les puediya raportar moneda para kovrer los gastes de mantenimiento en sus ‘dos kamaretas’ debasho de los techos.
Konose lo mas de estos marquis, kontes, vikontes, barones ke frekuentan los mizmos salones ke el, seya por la mizma razon, seya por razones o intereses diferentes… Estos guadran dayinda una sierta dinyitad impozada por sus rangos passados, En vezes se ven detras de eyos unos jurnalistos, muevos en sus karyea, ke esperan travar la attensyon de los lektores kon unos de estos reportajes klasikos, kon kestyones absurdas lo mas, komo ‘Kijyerash bivir en vuestro payis ?’ mismo si el hombre no tiene mettido el pye en el payis de su aguela i ya apartenese a la tresera jenerasyon de su familya ke bive en egzilyo !
Estos se kontan mazalozos si los envitan a unos banketes o fiestas dadas en los kastilyos i en los yachts de los rikinyones ke les agrada ke los magazines avlen de eyos i eskrivan ke frekuentan las familyas reputadas de la vieja aristokrasiya. No les importa mizmo pagar unos groshes a estos kon nombres i alkunyos mas largos ke de kostumbre para el keyf de tener a prezentarlos a sus amigos muevos rikos komo eyos.
Jurnalistos, modeles, aktores i aktrisas leshos de ser stars por el momento ma ke ya tuvyeron un segundo o treser rol en un filmo o mas, figuran tambien en estas reuniones ke por sierto no dire ‘de amigos!’ Son komo miz-en-senas (mises en scenes) de una komediya, o drama a mis ojos, en las kualas se puede endevinar kada biervo, kada gesto, kada paso, kada komportamiento i konversasyon kon ojos serrados…
Le tiene afitado de akompanyar uno de estos ke yama kon sus diminutivos komo Eddi, Niko, Micha, Costa, Berti, Clarissa, Alexia i mas de unas vezes se tienen ayudado en akeyas noches de tormenta kuando todo va tugerto, komo si unas manos inviziblas travavan ilos majikos para ke, no importa kualo se intenta, el mazal se fuyga a pyes deskalsos de sus lados !…
Blankas nochadas de dezespero, de anksyetad, de arepintamyentos, de kestyones vanas ke vienen al tino, de promesas nunka tenidas, de dolores de kavesa, tremblamyentos, krizas de estomago, bruidos en los oyidos…. Las nochadas ke todos los grandes jugadores experyensan i tornan a ser sus suenyos malos, las torturas de sus egzistensya…
Kuryozamente, i tristamente, dospues de un tiempo, topan el remedyo de retornar i los ven otra vez en los salones boltando entre las mezas i apanyar el koraje de asentarse al bodre de una de estas kon la ferma rezolusyon de ganar atras esta vez todo lo ke se peryo en akeya nochada ke se aviya englutido todo lo ke possedava, ke se aviya bevido toda la sangre del jugo sin el kual no se puede aserkar de estas mezas ke se izyeron de muncho tiempo antes la razon de bivir, la morfina, el kokain, el eroin sin los kualos es imposivle de pensar mizmo a otra koza!
En un kanton del salon ke sierve de kamareta de echar i de komedor en mizmo tiempo, se ve un violon. Allado esta dublada una chika mantika i un kuti de teneke/tin boyadado/pintado a la mano kon kolores bivas. Se entyende pishin ke el era un artisto kon talento i konosido ke jugo mas tadre en su vida en las kayes, en las estasyones de metros i a la puerta de las iglesyas las demanyanadas de Alhad… Unas notas de muzika estan en la biblioteka ke torna kuando se abolta, kon un mekanizmo simple ma muy bien echo. Son las ovras de los grandes kompozitores klasikos…
Parese ke viene de una buena famiya i es un hombre ke resivyo una buena edukasyon kon una ancha kultura jeneral…. Si es ansina ke le akontesyo para ke biva una tala vida de mizerya moral i fizika tambien ?
Lo kulpa su padre ke era uno de los mas konosidos maestros de jugos, jugando en Las Vegas… Antlantic City… Divonne…. Monte Carlo. Se aviya kayido muerto sovre la tapisseriya vedre de una meza de jugo kuando le kedo supito el korason… En medyo de la meza se aviya arrekojido una fortuna ke el iva siertamente ganar por tener un kare de Ases entre sus manos, i lo saviya ! Su korason flako no puido suportar esta emosyon !
Aviya metido en medyo todo lo ke possedava en este torno de poker, absolutamente todo…. I iva ganar ! El destino desidyo otramente i le dyo una dada fatal al mazal. Esta dada no aviya solo kucheyado su mazal ma el futuro de la povereta mujer de esto hombre, kedada bivda sin nada en las manos, kon tres kreaturas ; el, bastante grande i dospues de sus estudyos en el konservatorio i en altas matematikas, i sus dos ermanikas chikas. No le aviya kedado ni un sentado de su padre a parte de lo ke le aviya ambezado… JUGAR !
Dingunos aviyan avrido la boka sovre la moneda por la kuala se jugava en akel torno de Poker…. El kare de Ases se aviya presto emleskado i echo dezapareser entre las kartas del juego i el ke teniya un kare de Diezes aviya ganado esta mano.
Este tambien aviya mettido todo lo ke teniya en medyo de la meza sierto de ganar ! Kon esto, mijor era siempre eliminar sorprezas i estava kontente de esta muerte ke aviya intervenido justo a tiempo.
Los suyos nunka supyeron los detalyos, solo ke aviya perdido todo akeya noche i se aviya murido de este golpe muy fuerte…. No era la primera vez ke aviya perdido toda su fortuna…
Su mujer i sus ijos no lo yoraron. Su madre se aviya murido tambien antes unos anyos i sus ermanas se aviyan kazado.
El teniya su kamino trasado.i siempre penso ke era su unika vokasyon. Iva durar lo ke iva durar….Ni mas ni manko…. Ke lo kera o no ! Era la erensya ke su padre le aviya deshado. Los dedos le tremblavan solo de pensar a la noche ke iva vinir… Se sintiya mas hazino de kuando kayiya hazino por vedra a vezes, si no puediya jugar a la noche o kuando deviya lavorar para ganar paras i pueder arrekojer otra vez la sangre del juego ! La moneda ke nunka abastava !… Portanto, aviya konosido la rikeza, el lukso, las suitas karas de los hoteles komo palasyos, las mansevikas una mas ermoza de la otra ke otr’un poko se pelariyan por el….. No egzaktamente por el ma por lo ke aviya ganado antes unas kuantas noches…
Aviya gozado de los automobiles de grande klasa… Vestimyenta kara, mas i mas fulares de seda komo su propria marka ! Sus bandieras del payis de sus suenyos ande era el Rey de los salones de juegos… El, el deskayido, el ke asperara el kare de Ases komo le vino a su padre, al justo momento ke todos tendran buenas kartas, kon el kare de Diezes en el de enfrente….. La mano de su vida en el Poker ke, pensava, lo salvariya de la mediokritad o la muerte… ke lo salvariya de los salones de piedrisyon de la mizma manera ke salvo a su padre….
[email protected]
Artículos Relacionados: