El 14 de Februar 2021
EL DIA DE LOS NAMORADOS !

Milyones de personas son felises este diya i kuaji un mizmo nombre de personas estan mas malorozos de kada diya.... Seya porke sus partenaryos no los aman komo el "primer diya", seya porke no les trayen flores, regalos i chokolates, ay mizmo a los ke no les importa del todo.. Todo modo de hombres ensima de loskualos kale esfuersarse muncho en pensando bien bien kualo azer para yevar el tiempo atras i ser de muevo el couple egzampleryo de los diyas de la boda. Nunka se deve peryer pasensya i "alevantar las manos" porke siempre ay una chika puerta ke se puede avrir a los korasones... Render la vida mas agreavle, entenderse mijor kon el padre de las kreaturas komo en munchos matrimonios.

Tambien por los ke se sienten "imposible de bivir sin el/eya" ay de azer muncha attensyon i guadrar las buenes relasyones siempre... No deshar puerta avyerta para los peleyos i "enfasyar" el amor ! Aprender a bivir endjuntos... Unos de las lisyones la mas importantes de la vida. Komo ser buena espoza/espozo, madre/padre, maestro/a en la kozina i saver tener una kaza limpya i kon kada koza en su lugar.... El resto viene de suyo...

Un diya de nieve i muy muy yelado ! Me se rompe el korason de saver ke miles i miles de bestyas afuera tienen tan friyo, estan hambres, hazinos, tremblando... No lo puedo suportar ma no tengo nada en mis manos para enderechar esta desgrasya... Minus 5 fina minus 10 esta noche. Horozos los ke tienen un techo ensima de sus kavesas, una kama kayinte i una supa... Los proves... Los emigrantes ke biven en el lodo, en los bankos... una dolor de korason ! Kon bebes muevo nasidos.... El Dio ke los ayude i a mi, para pueder akseptar esta situasyon !

Portanto ay los ke azen sus keyf ! Mazalozos, i yo i mis gatos, ke nasimos kon una estreya en la kavesa.... Kualo es el keyf ?

Keyf o keif es un biervo de orijin Turka. Se uzava i se uza muncho porke komo en todos los payizes del oryente medyo (i en todos los payises por sierto, ma manko) el "buen estar", el "tomar plazer" , el "sintirse en las nuvlas" i el "estado de la persona ke goza" tiyene demasyado importensya !

Se avla de "keyf" kuando una mujer toma un kafiko turko ke le prepara i le traye su servyenta kuando avlan de aki de aya kon una amiga/vizina, djuntos kon un biskochiko salido del orno... ! O el "keyf del hammam " ke puedesh meldar en mi eskrito EL HAMMAM http://diariojudio.com/idioma/djudeo-espanyol/el-hammam/265964/

Avlamos del keyf de ver un ermozo filmo o piyesa de teyatro... Es keyf de pasar un buen diya piknikando debasho de las solombras de los arvoles, kontando kuentizikos, djugando tavli - backgammon, peshkando... Un otro keyf es meldar un ermozo livro espandida en un kantoniko (o eskrivir Almendra ! ) Es keyf de viajar a estos lugares ke nunka vimos, en los leshos, ande las plajas son blankas i las aguas del oseano son de la kolor del turkiz... Es keyf de pasear kon un kruzero para ir a destinasyones tropikos, egzotikos..... Es keyf de pasar horas enteras gozando allado del amado o de la amada, kaminando mano en la mano al bodre del mar o en un parko enkantador..... el te kayinte i perfumado en las tadradas yeladas...

Dospues ...Deshar pasar las horas... Sin dinguna aktivitad fizika ! Pensar...Soriyir a las mil fotografias ke pasan delantre de los ojos ! Komo si fueran reelas. Es esto la inspirasyon...No tiene kavo ma no tengo tiempo de notarlos i prezantarlos en un ermozo eskrito ! Ademas ! Ke manera de eskrito va ser esto ? Alis en el Payis de las Maraviyas ? Al lugar de akel taushan/rabbit/kanijo metere Nuriyev, el ballet, kuando era mansevo i yo baylando kon el, medyo en los prados/la prairie i medyo en el aver i mas dospues ensima de las nuvlas komo algodon.. Entrar i durmir en kazas de biskochos i de chikolata para bever limonatas freskas de las fuentes i vistirme sovre mi puerpiziko de mis 14 anyos unos fostanes de tul i de organza, bolando de todas las vandas i de una ermozura ke es posivle solo en los suenyos !

Penyar mis kaveyos blondos de seda fina mi talya asentada en las piedras al bodre del rio del kual me banyi i kon las aguas i las espumas ke me dan mareyos.... Avlando kon los animalitos aya mizmo ke me kontan sus chikes i la primera vez ke vyeron la nieve i jugaron i se arezvalaron i se divertyeron kon alegriya ke nunka van a olvidar ! Imajinarme ke esto debasho de las aguas de Ein Gedi serka de la Mar Muerta en Israel... Akodrarme komo me echi a estas aguas dospues de la asuvida en akeya kalor infernal ! Esto era el Gan Eden en este mundo si si si ! Mas fuerte de kualkera sensasyon en la vida. Komo naser de muevo, komo el bezo del anjelo del bien-estar...Murir de plazer !

No me plaze ritornar a la realitad ! Estava tan horoza yo aya, yo en mi imajinasyon....

No vos manke el bienestar...

[email protected]

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.
Artículo anteriorHallazgo impresionante: Lápidas judías medievales en un muro en Alemania
Artículo siguiente16 de febrero de 1624: Elias Legardo sería el primer judío en colonizar Norteamérica
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.