Si demandamos a sien personas ke no tienen dinguna relasyon entre eyas vamos a aresivir de eyos sien repuestas diferentes por seguro a muestra demanda : Kualo es vuestro mas grande plazer !
Di-o en su immensa buendad i hohma mos dyo miles de plazeres para gozar de este mundo i mos kaye a mozotros de topar lo ke mos aze felis i tomamos grande keyf… Vos afito de pensar, azer une lista de kualo dezeyash lo mas ? Vash a ver ke los gustos se trokan enteramente kon los anyos… Ke kuryozo de vedra…. Una kreatura vos va responder ke un muevo jugette seriya lo bueno de su vida alora ke una otra kreatura vos dira ke ir a ver una piesa de teatro para kreaturas kon su padre una demanyana de dia de alhad es su suenyo ! Otro dira ke es asuvirse i paseyar kon su kavayo ets….
Los mansevos puedran dizir ke enamorarse es el sielo de la felisitad, otros pensan ke es viajar a los payizes egzotikos i no mankaran los ke preferan un grande konserto de sus estreya ke idolatran !!
Los hombres aresponderan merkar un koche asina i ansina, ganar el match del ekipo ke sostyenen, azer la konosensya de una morena savroza, ir a piknikar kon los amigos, ver un buen filmo. meldar el livro ke les plaze, aferrar un pishkado para la sena, azer el torno del mundo sin pensar al dinero, eskaladar el Himalaya, tener un yacht maraviyozo… Dezeyos sin limitos…….
Mujeres diran ser amada por el ke aman, joyas, vestimienta i aksesuares karos, un jet para ir ande keren, kreaturas primeros de sus klasas…. una ermoza villa i pisina… Munchas amigas… kartas !
Sharope diriya ser la duenya de una hacienda kon todo modo de animales, vakas, ovejas, kavretikas, kavayos, aznos, una gallinera, perros, gatos, lapinos… i pueder eskrivir debasho de la solombra de un arvole de moras, de igos o de serezas ! Seriya esto el Gan Eden? Al bodre de un lago o de la mar tambien…. En el silensyo i kon una grandeeeee kupa de sumo de frutas dulses… de kolor ! Un gatiko en su sesto durmyendo… En el hospital AL LADO, mi ijo kortando personas kon alegriya i felis.. Mi ijika, DETRAS de muestra kazika, en sus salones, jugando kon sus pasyentes, rehabilitandolos, lavorando kon sus gueysizikos i sus muskulos i no se yo kon kualos aparatos elektrikos barminnammmmmm ! Leshos de mi vista….
Ayyyyyyyy ke maraviya seriya ! Ma, rendo siempre grasyas al Di-o por mi vida de oy, muy felis, muy amada, muy alegre, kon todo lo ke nesesito, las dolores, ke no me manken (!) son la prueva ke esto biva dayinda…. I mas ? Ke mas para la felisitad total de la persona ? El amaneser kada diya, el sol, el vedre i el bleu, muzika i livros, el internet !! Esto fue mijor mizmo de la makina de lavar, i de todas las otras makinas! Se puede bivir sin eyas ma sin internet ? Nunka ! Mil grasyas a la persona ke regalo este jugette a la humanitad. Tenemos muy muncha suerte de vedra de bivir en estos tiempos de la historia del mundo… Kon la libertad, todo lo ke mos fasilita la vida, mos divyerte, el progresso en la medisina i en la salud…. Kale BUSHKAR de vedra lo ke es negro para entosegarse la egzistensya ! Kon un pokito de suerte i de intelijensya se puede gozar de todo lo ke la vida mos ofre, basta de kerer i de perseverar ! Los plazeres estan en todos los lugares ! Egzisten miles i miles…. Se pueden alkansar sin asuvir a una eskalera porke kale ekstendir solo la mano para arankarlos de sus ramo !
Plazeres i sorizas ke nunka vos manken…. Ke gozesh de una mueva anyada leshos de todo modo de males i problemes de la vida… No mankan ma savemos tambien evitarlos o solusyonarlos kon el ayudo del Todo Poderozo… Es a EL agora de tomar la pluma en la mano i eskrivir ermozas kozas i muy munchos nombres al Livro de la Vida….
Amor a todos.
Artículos Relacionados: