La existensia djudia en Bulgaria empesa de tiempos antiguos. Serka de la sivdad de Gigen existe una piedra tombala, del anyo 235, al nombre de “Yosses Archisinagogus”. En los entornos de Vidin i Nicopol, al lado del rio Danubio, ay tambien sitios arkeolojikos ke demostran la existensia de komunidades djudias en la mizma epoka.
Savemos ke en 1376, el rey ‘hungaro Layos el Grande (1342-1382) ekspulso a los djudios de Budapest ke fueron resividos por el rey bulgaro Ivan Stratzimir. Asta oy ay desendientes de estos djudios ke tienen la alkunya “Madjar”. En la mizma epoka los djudios de Provence en Fransia fueron akuzados de entosegar pozos de agua i bushkaron refujio en Bulgaria; de ayi vienen las alkunyas Franses i Tsarfati. Despues de los pogromes de Regensburg, Bavaria, en 1492, djudios de esta sivdad yegaron a Vidin, Nicopol i Sofia – las famiyas Tadjer i Meshulam son de entre sus desendientes.
Kon la ekspulsion de Espanya en este mizmo anyo, un numero konsiderable de djudios de Castilla i Catalonia yegan a Sofia; a Plovdiv yegan de Aragon, i de Espanya en jeneral yegan a todo el teritorio de Bulgaria.
Desde la fin del siglo 18 empesan a vinir sefaradis de Viena, en segito a la puja del antisemitismo ayi i tambien a la agresividad de la komunidad eshkenazi ke keria tener los mizmos privilejios ke tenian desde anyos los sefaradis de Austria.
Este no fue el kavzo de la famiya Arie ke bivia en Viena. Esta famiya fue ekspulsada en 1775 por el Kaiser Joseph II (1765-1790) ke savemos ke fue bastante bueno kon los sefaradis de Viena, de manera ke no es klaro porke los ekspulsaron. Se dize ke la mujer del Kaiser se enamoro de uno de los miembros de la famiya Arie i ay ken dize ke eya keria adoptar uno de los ijikos de la famiya ke prefero partir de Viena.
La famiya Arie, orijinaria de la rejion de Leon en Espanya, ke avia yegado a Viena despues de la ekspulsion, pasando por Serbia i Macedonia, se vido agora ekspulsada de muevo.
En la famiya avia tres ermanos: Avraam-Moshe, Samuel i Isaac. Avraam Moshe paso a Samokov en 1753, se kazo kon Bohora ija de Yosef Navon i fondo la illustre famiya Arie de Samokov. En esta sivdad Avraam-Moshe fondo una kaza de komersio, ke oy yamariamos grupo de kompanias. Eya se espesializo en el komersio de sereales i espesialmente trigo; merkava i vendia objetos manufakturados; eksplotava minas de fierro i tenia tambien una banka kon sukursalas en el Imperio Otomano i en Evropa.
En Samokov los yaman asta oy “la famiya del sarraf” (espesialista en el kampo de devizas). Todo esto enrikesio muncho a la famiya ke todo en biviendo en una chika sivdad, tenia un gran rafinamiento artistiko i fue mesena de aktividades kulturales. Eya ayudo a tener ayi una buena edukasion djudia ke kon la independensia de Bulgaria de la okupasion turka, duvo adaptarse gradualmente a la edukasion nasionala bulgara. La edukasion djudia era dada en los meldares de los chikos ke podian kontinuar en los “Talmudei Tora” i despues de 1874, en la eskola de la Alliance, ke uno de sus prinsipales profesores fue Gabriel Arie, bisinyeto de Avraam-Moshe.
La famiya Arie fue partidaria de los estudios de la Alliance malgrado ke a vezes chokavan kon los faktores relijozos i sionistas ke temian ke el fransez remplase el ebreo.
Los Arie fueron muy atados a la relijion i a uno de los ijos de Avraam-Moshe lo yamavan Ham Eliyau. Kon el ayudo finansiario de la famiya Arie se fragua en Samokov un ermozo kal ke dezgrasiadamente esta oy en muy negra situasion.
La famiya Arie savia ke los klientes de la kompania venian a Samokov, para tratar i negosiar, de otros lugares tambien, i eyos fraguaron sus kaza de manera a poder resivir i dar ospitalidad a klientes ke vinian de leshos.
La Kaza Arie en Samokov
Lo ke tiene de muy espesial esta kaza es ke eya es bazada sovre la etnografia nasionala bulgara. Esta es la razon ke la kaza de los Arie es oy un muzeo nasional i reflekta muy bien la kultura i el folklor de Bulgaria, segun puede ser visto de las sigientes fotografias.
La guerta i partes del interior
Artículos Relacionados: