Diario Judío México - KREYERSE EN EL UNIKO

No egziste persona ke no ame i no kera la paz en el mundo i odye guerras, i ke no pense, no bushke opsyones, mizmo utopikas (!) para lograr una unika relijyon para todos los humanos… Si metemos las razones (!) ekonomikas ke kavzaron guerras fina oy, a parte de lograr mas territoryos….lo ke es una puerta de detras de las razones ekonomikas… vemos klaramente ke los mas grandes i sanglantes konfliktos fueron kavzados por tener diferentes relijyones ! Komo puede kaver esto en la miente de la persona ? Komo esto afito tantas i tantas vezes se vazyo tan krualmente tanta i tanta sangre, se kemaron sivdades i se anhiliaron puevlos por una razon tan absurda!

Se kreyen a otra relijyon ! Odyar ! Matar por esto ! Portanto nada de konkreto…. Es vedra su teoriya ? No lo es ? Mi teoriya es justa! Appropriyarse del Di-o ? Miiiii Relijyon !

Nooooooooo…. Ni pensan ke Di-o es el Duenyo de todo i todos ! Lo keren suyos ! Ma no lo es….No puede ser… No tiene forma ! Esta en todos los lugares i oye i save todo. A lo manko todos akseptan ESTO. Es el Uniko ke AY i no ay otro. Kero dizir ke las tres grandes relijyones LO akseptan ke tal…. Ke kedo ? La forma de adorarlo ? Los Livros Lo kontan i trasan la vida relijyoza de kada uno i uno ! Benadam… Va adoraLO komo keres ! EL konose tu alma, no tienes mizmo de dizir nada. DiLE, demandaLE, arogaLE komo te viene del korason… TE OYE…..

Los tres Profetos, en Ganeden agora, mos avriyeron los ojos a SUS entender, i mos mostraron kaminos para yegar a EL i al Paradizo !… Las personas fraguaron “razgasielos” en sus deredor ! Eran buenos? SI. Se kreiyan en un Di-o uniko, Todo Poderozo i Duenyo del Universo i de la Vida… OK. Ma eran mortales.. Komo mozotros… Personas.. Personas kon altas kualitades i Servyos del MAS PIADOZO…. Los veneramos por seguro ma muestros orasyones se van a Di-o unikamente. Es ansina ke EL lo kijo en los 10 Mandamientos.

Se deve de yegar a un entendimiento i akseptar una sola teoriya valable para los Kristyanos, los Muzulmanos i los Judyos…. Los otros siguiran…. Me akodro ke el d’alkavo Papa avlo de este tema tambien…. Lo amo ! Es una persona kon muncha hohma ke yeva los Kristyanos a buen kamino.

De ande topar un Papa, un buen Rabino i un buen Imam efendi ke se aunaran para debatir i topar una manera de yegar, kon tiempo, a una konviksyon mutual de adorar EL UNIKO de una mizma manera i tener todos la mizma relijyon…. ? Esto seriya la sola manera de no odyar mas otros puevlos, yegar a la paz, no azer guerras i krear el kalmo i el bienestar en el mundo. Komo una koalisyon entre partidos ke normalmente se kijyeran degoyar !!!

Va ser difisil ? Seguro, ma kon buena voluntad I NESESITAD se yega a todo, mizmo a lo inesperavle…. I alora, veremos ke los ke ni se saludavan i pasavan en frente, se avlaran i se abrasaran en medyo de la kaye…. Ke mas ermozo de ver esto ?…

KOMO…No de vedra KOMO los puevlos de estas tres relijyones puedran aserkarsen, ser ermanos, inyorando sus raises, la historia, sus kreensyas i tradisyones….sus vidas ?

Kale ke el mundo se kria de muevo, todos rekonoskan el KADOSH BARUH-HU, lo adoren a el solo sin dingun intermedyero i ke Su Justisya ke es la unika justisya renya en un mundo de hesed ande no va aver violensya, odyo, negrigura, maldad, selos, injustisya, mintiras.

Un diya….un diya de los diyas mis dezeos se van a akumplir. Las personas “veran” ke el UNIKO kamino ke yeva al UNIKO sera de oyersen, entendersen, amarsen porke no lograron la paz kon las diferensyas…. Solo sangre koryo por las kayes, madres yoraron, la famina i las hazinuras destruizeron los puevlos. Espero solo ke yegaran al justo kamino, a la desizyon logika no demasyado tadre…. A tiempo, Di-o mio ! A tiempo antes ke las desgrasyas empesen en el mundo i ke no mos kede mas alternativas para azer paz…. Paz kon muestros enemigos, paz kon mozotros mizmos en adorando DI-O, El AMOR, LA BUENDAD, LA KREASYON KON TODO LO KE KOMPORTA….

Ke okuryo kon los Kristyanos ? Eyos ke deviyan tender sus segunda kara al chaketon ke arresiveriyan ? Preferyeron dar eyos el chaketon kon el guante de fierro ! Deven konfesar sus pekados ma no tuvyeron skrupulas de testigar en falso ! El biervo mizmo “odyo” es defendido ma odyaron judyos durante toda la historia. (Todos los hombres son ermanos ets.)

Musulmanos deven adorar la “Justisya” -Hak- ke es uno de los 99 Nombres de Allah ma no izyeron “justisya” en Mumbai i en todos los aktos de terror fina oy. Todos los ke no son muzulmanos a sus ojos son “kafir” ke no kreyen en Di-o , ay ke kombatir i trokar el mundo i forsar a rekonoser el Islam. (Las guerras de propagasyon del Islam kon el profeto Muhammed) La mujer ke deve ser respektada sovre todo i “tiene el Ganeden debasho de sus pies” es maltrada, aharvada i mizmo assasinada.

El Judyo no tiene derecho de mesklarse a los otros puevlos !!! Deve retirarse i kedar solo (!). Serrar sus puertas komo si su mundo tuvyera frontieras enviziblas.. Las mujeres no pueden azer partido del “minyan” de los hombres privilijyados ! Se les dyo unikamente la responsabilitad de la kuzina relijyoza i engrandeser ijos asigun lo ke es “mitsva” i “defendido” en la Ley…. Adjustada kada vez kon la “desizyon” de los rabinos. El “santo psak-din !!!” para render mas i mas difisil lo de kada diya….
Nonononono ! No me viene ermozo, justo todo esto….. No puede ser la voluntad de Di-o !

LOS ANIMALES I EL HOMBRE NO VAN A TENER SAR UNOS DE LOS OTROS I LA TIERRA VA DAR SU FRUTA KON ABUNDANSYA I LA AMBRE I EL SED NO VAN A EGZISTIR. UN MUNDO ANDE NI SE PUEDRA PENSAR NO AZER KONFIENSYA! UN MUNDO DE AMOR I DE FELISITAD SIN BANDIERAS, SIN FRONTIERAS SIN ARMADAS I ARMAS SIN GUERRAS I TORTURAS….

ES POSIBLE ? SOLO EN MI KAVESIKA DE KALAVASA PARESE…!

Kon karinyo
[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anterior26 de agosto de 1920: Las mujeres estadounidenses ganan el derecho al voto
Artículo siguienteCompromiso
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.