Una Mujer Judiya i Aborigina fue nomada
” Deputy vice-chancellor” a la Universitad de Sydney !
Oy vos kero avlar de una mujer ekstraordinarya, Lisa Jackson Pulver ke puede ser dekorada por todo lo ke logro kon sus medyos muy modestos de manseva indigena en una tribu Aborigina.
Jackson es una eskolaria aborigina en Australia i Profesora en karga de la Salud Publika. La UNSW (Universitad de la Mueva South Wales – Medisina) echo un paso kritiko para amijorar la salud i serrar las diferensyas entre los indigenos i los Australianos ke no son indigenos.
La Profesora Jackson ke es tambien la Direktrisa del Arte Aborigino, fundyo la beka ” Shalom Gamarada “. Su prensipala responsabilitad es de aklarar el puevlo Aborigino sovre sus salud ma en una entrevista kon Ilona Lee, la Prezidente del Instituto Shalom, se vido muy interesada en un muevo projekto endjuntos… Tuvyeron una reunion kon Ilona i el Dr. Immerman del Kolejyo Shalom sovre la beka ke se ofreriya kon prensipalmente, las finansas, ke se ganariyan de una egzibisyon del arte aborigino. Un primer chek de 15.000 Dolares se kito sovre la meza !
Se arekojyeron akeyos artistos de la komunitad aborigina ke aresivyeron la valor de sus ovras i la ganansya se aparto para la beka ke se dariya a los eskolaryos. Sin olvidar ke seya el Sentro de la Salud de la komunitad aborigina Muru Marri, seya el Instituto Shalom son partes integrales de la Universitad de Medisina de SW
.
La Profesora Jackson konta ke para los Aborigenos, la salud no es solo no estar hazino ma komo se siente la persona, ke alegriya devriya prokurar ver las kreaturas baylar i avlar sus linguas, si pueden disernar el espirito de una pintura. Por los artistos se traduize a la valor de sus ovras para pueder pagar una beka a sus ijos i ijas i por los estudientes es la oportunitad de bivir en un kampus para konsentrarsen en sus estudyos. Para los sponsores signifia assegurar una mijor salud kon la medisina, la optometriya ets. Resiven munchos donos de los partikulares para adelantar los servisyos tambien.
Sesh mujeres aborijinas – tres de entre eyas son ermanas – fueron diplomadas doktoras de Salud Publiko
Lisa Jackson, una aktivista del environamento tambyen, es Judiya Ortodoksa….. i es la primera persona aborigina ke resivyo el titulo de PhD en Medisina a la Universitad de Sydney. Era la ex-Presidente de la Sinagoga Newton de Sydney i oy en diya una membra de la Grande Sinagoga de Sydney. Se aviya alevantado kontra el Alkade de Sydney en 2011 kuando deklaro un boykott i sanksyones a Israel para sus malechos (!) a los Palestinos de Gazza !….
El marido de Jackson, Mark, aki ariva en la foto kon su tiya Ali, no era un hombre observante kuando se konosyeron, malgrado ke eya siguiya
su ambezo en la sinagoga. Solo dospues de dos anyos puido obtener su konversyon ortodoksa, en el anyo 2004. Observa las fiestas, observa el kasherut i invita gente de su entorno por el pranso de Shabat. Dize ke el Judaizmo no va kontra sus kreensyas komo una mujer aborigina. Jackson mos informa ke, kontraryo a lo ke puedemos pensar, ay bastante aborigenos judyos en la Australya.
Kon karinyo
[email protected]
Artículos Relacionados: