Diario Judío México - Diario Judío -
LA EMIGRASYON SEFARADI IV
LA DIASPORA JUDIYA – I LOS PAYIZES MUZULMANOS


Dospues de la expulsion de Espanya, los Judyos resiven la autorizasyon del Sultan Beyazid II para installarsen en su Emperyo.
Unos, dominados por el amor ke yevan por Tsion, van a preferar ir a las Tierras Santas ke eran una provinsya Ottomana en akeyos tiempos.
En kurto tiempo los Sefaradis enkavesan el Judaizmo lokal, i Safed se aze en el Siglo 16 el sentro briyando del Judaizmo. Hombres de Letras komo Yosef Caro (1488-1575) ke eskrivyo el Shulhan Arukh, su elevo Moise Cordovero (1522-1570), Salamon Alkabetz, orijinaryo de Salonika (1505-1584) kabbalisto i poeto mistiko de ken konosemos el Leha Dodi “Ven mi bienamado” ke se kanta kada Viernes a la tadre en las sinagogas del mundo entero, azen de esta sivdad la luz del Judaizmo de Palestina.

Dos figuras ke influensaron muncho la epoka sovresalen:
Dona Gracia Mendez (1510-1569) –
La Senyora la Damma i su sovrino i yerno
Joseph Nasi Duko de Naxos (1524-1579) el ke kreo el Sionizm politiko i ke intento en 1564 de enkorajar la gente a ritornar a las Tierras Santas kon la rekonstrusyon de Tiverya en la Gallile.

El Rishon le Tsion, primer de Tsion, es el titro del Hahambashi, el Granrabino Sefaradi, el uniko Rabino Hahambashi de la Palestina Ottomana.
En el tiempo del mandato Inglez, los Inglezes approvan in vano de divizar las dos komunitades. Apuntan Sefaradis en las administrasyones i impozan un Hahambashi Ashkenazi.
A la eksepsyon de los ke la lingua keda el Judeo-Espanyol, los Olim Hadashim, los muevos immigrantes ke empesan a yegar del Oriente Medyo des de 1948, no son tan bueno vistos. Avlan i se visten komo los Arabos i en sus kulturas, nada los puede diferensyar de los Muzulmanos.

Mizmo si los Orientales forman la majoritad del payis, estos no son admettidos a los puestos dirijantes. Se oye dizir sin dinguna piadad “Es vedra ke son los Sefaradim ke konstruiyeron el payis ma son los Askenazim ke izyeron los planos.” – Para obtener mas informasyon vos konsejo de meldar “Los Judyos Sefaradis” de Victor Malca en las Edisyones PUF, Paris 1991-
La revolta empesa a azerse sintir en los anyos 1960. Las Panteras Pretas, el movimiento protestatorio gana importansya. Se topan a su kavesa Charlie Bitton i Shalom Cohen ka va ser el korresponsyente de la Liberasyon fina su muerte en 1993.
Se aze Prezidente del Estado Yitzhak Navon, desendyente de una vieja familya Sefaradi installada en Yerushalayim des de la Ekspulsyon de 1492, i el autor de dos komediyas muzikalas : “El Romansero Sefaradi” en 1968 i “El Bustan Sefaradi” en 1970. Va dirijir este puesto de 1978 fina 1981 i va resivir el Prizidente Enwar Sadat (1918-1981) en Yerushalayim.
PAYIZES MUZULMANOS
De los muevesientos i kuarentamil ( 940.000) Judyos ke biviyan en estos payizes, solo una muy muy chika minoritad, estimada a kuatro mil (4.000) personas kedaron oy en diya.

El Marok, kon serka de dosmil i kinyentos (2.500) Judyos i la Tunisia, kon sus mil i dosyentos (1.200) Judyos, son los unikos estados dichos Arabo-Muzulmanes ke guadran una komunitad aktiva. (“El Exodo olvidado, Judyos de Payizes Arabos” del mizmo Autor, en la Edisyones Raphael, Pris, 2003, i “La eksluzion de los Judyos de los Payizes Arabos”, basho la direksyon de Shmuel Trigano, Pardes, Edisyones In, Press, Paris, 2003). Estas komunitades se estan dezaparesyendo pormodo ke no se amunchan.

La vida Judiya se limita a la praktika relijyoza i a unas aktivitades sosyales sentradas al deredor de la sinagoga.
Malgrado las asseguransyas dadas por las autoritades, el espanto de los ke se topan en estos payizes se aksentuaron dospues de los attentados kontra la sinagoga antika de La Ghriba, en Djerba-Tunisia, la mas vieja de Afrika, el 11 Avril 2002, los attentados del 16 de Mayo 2003, kontra un simetaryo i un restaurante Judyos en Casablanca-Marok, los assasinatos de los dos komersantes Judyos, Albert Rebibo de Casablanca i Elie Afriat de Meknes.

IRAN
La prezensya de los Judyos en Iran i en Irak data del primer egzilio, en el anyo 587 de la era komun. Las kondisyones de egzistensya son duras pormodo de la sharia ke kastiga sin piadad el mas chico delito o infraksyon de la ley. Un judyo fue kemado bivo en Teheran, en el anyo 1860 por aver “ensuzyado” un molla kon sus vistidos mojados en un diya de luvya….

La situasyon se ameliora al empesijo del siglo 20, En el tiempo de Reza Pahlevi (1919-1980) el d’alkavo Shah de Iran, egziliado en 1979 kon la revolusyon del Ayetollah Ruhollah Khomeyni (1902-1989).
Los Judyos pueden respirar… El Monarko tiene buenas relasyones kon . En 1956 se da la nasyonalitad Iraniana a siertos Judyos ke yegaron del Oriente Medyo i estos estan al abrigo, en ayudando kon donos a la fragua de un hospital en Teheran.

Khomeyni i sus suksesores ovligan la sharia en el payis. La situasyon de los Judyos es la mizma de los shiites. En teoriya pueden pratikar sus kulto ma debasho de falsos pretekstos komo siendo spias son enforkados ! Otros por la mizma razon son mettidos en prezo por largos anyos… Los ke estudyavan el Talmud en el Chiraz fueron liberados solo resientemente ….

Los Judyos sufriyendo del rejim partyeron en massas por Los Angeles en California. Kedaron solo unos 8000 Judyos en Teheran prensipalmente. Aviyan 80.000 en 1979. La Konstitusyon Iraniana en 1979 impozava de tener 5 reprezentantes de los minoritaryos : Uno Assirio Kaldeano, un Zoroisto, dos Armenianos i des de 2008, un Judyo.

TURKIA

Los Sefaradis siempre tuvyeron un karinyo espesyal por la Turkiya, heredera del Emperyo Ottomano. Nunka olvidaron los biervos del Sultan Bayazid ke disho en 1492 “Lo nombran a Ferdinand un rey savyo ma el approvese sus estados i enrikese los miyos. Avro grande las puertas de mi emperyo a los Judyos !”
Los Judyos bivyeron en paz fina un sierto punto en el Emperyo. Los yamaron “El puevlo fidel” porke no se emleskavan en la politika del Monarko. Eran kontentes ke puediyan tener el privilegio de sus derechos kultural.

El 11 Novembre 1942, durante la Segunda Guerra, Ankara (la Kapital de Turkia) simpatizava los Alemanes i impozo una taksa muy pezgada a los minoritaryos Judyos i Kristianos. Los ke no puedyeron pagar fueron deportados a los kampos de lavoros forsadas. Kon esto los Judeo-Turkos ke se topavan en los payis okupados por los nazis, no fueron muy molestados. El Konsul de Turkia a Rhodes, Selahattin Ulkumen fue el primer Muzulmano a arresivir el titro del “Justo de las Nasyones” por el Yad Vashem en Yerushalayim. Este titro se da a los ke rizkaron sus vidas para salvar Judyos. Ulkumen de su propria inisiyativa ayudo los Judyos i los salvo de la muerte, fina azer abashar uno del treno de deportasyon.

Kon la Deklarasyon de la Independensya del Estado Judyo, el 15 de Mayo 1948 esta komunitad de serka de 100.000 personas se derrityo komo la nieve debasho del sol. La gente savyendo el Fransez ke nesesitavan grasyas a la Alliansa Israelita partyeron a Fransa i a Belgika.

Los attentados del 15 de Novembre 2003 en las dos sinagogas de Istanbul, el Neve Shalom (por la segunda vez) i el Beth en Sisli kavzaron munchos muertos.

Oy kedan unos 15.000 Judyos en Turkia, lo mas en Istanbul. Munchos estan en kamino de assimilarsen. Se ven de mas en mas kazamientos mikstos i la lingua ansestral, el Judeo Espanyo, no esta mas avlado komo la lingua de kaza i keda en la boka de los aedados solamente. Muevamente kon el rejim teokratiko se ve una importante emigrasyon a .

Seya los Judyos ke se topan en Turkia seya los ke emigraron a otros payizes kedan muy attados a sus patria i se los inkulkan a sus ijos. Este karinyo es komun a los Sefaradim ke fueron arresividos kon grasya por el Sultan en 1492.

(a kontinuar) [email protected]

No hay comentarios

Leave a Reply

Artículo anteriorUn sueño . . .
Artículo siguienteEmprendimiento, arte, solidaridad y deporte
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.