Migrantes i migrasyones

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.

Estos tyempos, no ay diya sin ke las gazetas mos avlen de migrantes i migrasyones. Muestra amiga Angèle Saül, ke todos los oyentes konosen byen, yo avli de eya a esta radyo kuando eskrivyo Djoha i Djohaya, o su Letra avyerta al Dyo, eya me dyo la muy buena idea de avlarvos oy de esta kuestyon. No para dizirvos lo ke tenesh de pensar, solo para akodrarvos unas kuantas kozikas ke mozotros djudyos savemos mijor de los otros.

Empesaremos por el empesijo, kyere dizir las orijenes del ombre.

El ombre arrekojiya las plantas ke puediya komer, i kasava los animales ke keriya komer. Despues, komo Kain i Evel, uvo los agrikultores, atados a la tyerra kultivada por eyos, i los pastores, ke yevavan sus ovejas paser ande se topava yerva. Kuando las ovejas aviyan komido toda la yerva, se ivan a otro lugar. Los agrikultores eran sedentaryos, los pastores nomados.

A poko a poko los sedentaryos tomaron mas i mas tyerras, arrepushando los nomados mas i mas leshos, en los dezyertos ande la tyerra no se puede kultivar. Los sedentaryos se organizaron a poko a poko en estados (en jeneral reynos) kon fronteras. Ama dechidar de una frontera no kyere dizir ke esta frontera va ser serrada. Esta serrada i defendida kontra enemigos venidos armados para tomar por fuersa tyerras, syervos, kozas de valuta. Ama en jeneral era avyerta para el komersyo i la ida i venida de djente pasifika.

Ande mozotros, los djudyos, la istorya empesa por un migrante i una migrasyon, kuando el Dyo ordena a Avraham Avinu, nasido en Ur en Mesopotamiya (oy el Irak) de irse en tyerra de Kenaan, oy Israel. Es la primera migrasyon de muestra istorya, no va ser la sola.

El inyeto de Avraham, Yaakov ke ya se yama Israel, se va kon sus ijos i toda su famiya  de Kenaan en Ayifton por razones ekonomikas (la ambre).

Los Bene Israel, kijo sizir su desendensya, abolta de Ayifton para Kenaan. La migrasyon es kondusida por Moshe Rabenu. Ama esta vez las fronteras son serradas, i va ser Yeoshua Bin Nun ke va tener la karga de konkistar la tyerra por fuersa, lo ke va reushir, afillu si kedan Kenaanim enemigos, komo los Pelishtim de Gaza.

Esto es la tresera migrasyon de muestra istorya. Los Bne Israel del norte van a ser eyos mismos konkistados por los Assiryanos, ke los yevan kon eyos, en dos vezes une detras de otra, en primero por el rey Salmanazar IV, la sigunda i peor vez en 718 antes del Kristo, por el rey Sargon II.

Ansina mos konta el Tanah, en el sigundo livro de los reyes, kapitulo 17 pasuk 6 : el rey de Assiriya embiyo en Assiriya los Bene Israel (no kale yamarlos djudyos, porke no son djudyos : los djudyos vyenen del reyno de Yehuda); los establesyo en Halah, sovre el Habor, rio de Gozan, i tambyen en las sivdades de Mediya.

Esto fue la kuatrena migrasyon, migrasyon esta vez forsada por los enemigos.

Lo ke afito a todos estos Bene Israel, en vedra no se save, i por esto se yaman los diez trivos pedridos de Israel. Ama kale pensar ke el Tanah mos dize ke fueron yevados, no ke fueron matados. Estos Bene Israel no dezaparesyeron en umo komo los djudyos en Auschwitz. En kualkyer lugar ke fueran, tuvyeron una desendensya, i djustamente ay en el mundo djente ke se dize azer parte de esta desendensya.  Vos akodro ke los djudyos de Etyopiya fueron akojidos por el Estado de Israel, no komo Djudyos, ama komo Bene Israel, i mas presizamente Bene Dan, uno de los diez trivos pedridos.

La mizma koza ke afito a los Bene Israel del norte va afitar tambyen a los djudyos del sur, kuando en 586 el rey neobabilonyano Nebuhadnetsar no solo toma i destruye Yerushalayim i el Bet Amikdash, ama tambyen yeva en Bavel la mayoriya de la povlasyon del reyno de Yeuda (kon su rey Tsidkiyau despues de tener degoyado a sus ijos delantre de el i tenerlo asyegado despues). Sinkena migrasyon, eya tambyen forsada por los enemigos.

Vos akodro el empesijo del psalmo 137: “Sobre los rios de Babilonia, alli estuvimos, tambien lloramos, en nuestro membrar a Zion….Como cantaremos cantico de Adonay, sobre tierra estraña? Si te olvidaré, Yerusalaim, olvidese mi derecha.”

El mazal de los Djudyos vyene de los Persos ke no solo konkistan el imperyo neobabolonyano solo unos kuarenta anyos mas despues, tomando Bavel, ma sovre todo van a permeter a los djudyos de aboltar en Djudea, es el famozo edikto de Cyrus. Los djudyos de Persa, ama no todos, van a aprovechar esta permisyon para aboltar a Yerushalayim kon Ezra i Zerubavel, ya estamos en la sejena migrasyon

Los djudyos se van a kedar unos kuantos siglos ande estan,  los unos en Djudea, los otros en Bavel, asta ke vengan en Djudea, despues de los Persos i de los Gregos, los Romanos, ke van a destruir enteramente la Djudea, en 70 i 135 despues del Kristo.

Los djudyos se van a ir por fuersa de Djudea, espartyendosen en el Imperyo Romano, por egzemplo en Espanya o en Fransya (ke dainda no se yama Fransya, ama Galya). Esto va ser la setena migrasyon de los djudyos, muy leshos de ser la ultima.

Despues del Edikto de Caracalla en 212, todos los Djudyos espartidos en el Imperyo romano son suditos romanos komo los otros, i esto va surear afillu kuando el Imperyo se va azer kristyano i empesar a persegir los djudyos.

Ama lo ke se va pasar es una mueva migrasyon, no de los djudyos, ama de los Barbaros, sovre todo de Germaniya, ke van a entrar, sea por fuersa, sea sin fuersa, en el Imperyo de Oksidente aflakado, asta ke van a tomar el poder en lugar de los Romanos. Esto va ser el empesijo de la Edad Medya.

Komo los Barbaros se azen eyos tambyen kristyanos, los unos despues de los otros, eyos tambyen persigen a los djudyos, al empesijo sovre todo en Espanya, asta ke el rey Wisigoth Sisebuth, en 617, eche a la puerta de Espanya los djudyos ke no achetan de konvertirsen.

Mueva migrasyon, esta vez para los Djudyos de Espanya, i no es a vozotros, keridos oyentes, ke vo ambezar ke esta migrasyon no va ser la sola, ni de la Edad Medya, ni de la epoka despues de la Edad Medya.

Para kedarmos solo sovre la Espanya, ya konosesh la grande ekspulsyon de 1492, i la grande migrasyon forsada verso Portugal (ke va ser un grande yerro) verso Marroko, i sovre todo verso la Turkiya grasyas al Sultan Beyazit II ke akoje a todos los Djudyos ke vyenen a el.

Los reyes fransezes no kedaron de echar los djudyos a la puerta, i despues, apersivyendosen ke teniyan menester de eyos, los aziyan aboltar: la primera ekspulsyon se tuvo en 533, por Childebert ijo de Clovis (primer rey de los Frankos) despues uvo las de Dagobert en 633, un siglo mas despues, Philippe II (ke no kale konfundir kon Philippe le Bel ke es IV) en 1182, Louis IX, dicho Saint Louis, en 1254, Philippe le Bel en 1306, Charles VI en 1394.

La mizma koza fue en Ingletyerra kon el rey Edward I en 1290.

En Almanya, despues de terrivles matansinas del tyempo de las cruzadas, los djudyos fueron echados a fuera de las sivdades ande sovrebiviyan: entre 1380 i 1519, son echados de Ulm (ande munchos siglos mas despues va naser Einstein, ama el tambyen devra fuir de Almanya) de Strasbourg,  Spire,  Augsbourg,  Mayence, Wurzbourg, Nuremberg, ets.

En Italya, ay los dominyos de la korona espanyola, de ande los djudyos son echados, komo la Sardenya, la Sicilia o el reyno de Napoli.

Una vez echados afuera, ande se van estos todos djudyos? En lo ke meldo, no lo topo. Se avla solo de ande son echados, no de los lugares ande se van. Ama ya konosemos a lo manko dos paizes ke akojeron a los djudyos: la Turkiya i la Polonya.

Por lo ke es de la Turkiya, no kale pensar ke akojo solo a los djudyos de Espanya. Munchos djudyos ashkenazim persekutados en Evropa kristyana toparon abrigo en Turkiya. Munchos se mesklaron a los espanyoles i se yaman agora Eskenazi, lo ke mos da una idea de sus orijen, otros se kedaron, komo mis antepasados de la vanda de mi madre, ashkenazim en medyo de los sefaradim.

Sovre el akojimyento de los djudyos de Evropa por los Sultanos de Turkiya, antes i despues de 1492, vos embiyo al artikolo de Harry Ojalvo en ingles sovre internet en Sephardic studies: Ottoman Sultans and their jewish subjects.

Por lo ke es de la Polonya, es siguro ke akojo eya tambyen, durante la Edad Medya i despues, a miles de djudyos persegidos en Evropa, o echados a la puerta. Por esto es ke los djudyos de Polonya, en mayoriya, no avlavan polones ama una lingua djudeo almana ke asta oy se yama el yidisch. A mi la orijen almana de los djudyos ashkenazim me parese sigura afillu lo ke dizen los partezanos de Arthur Koestler asigun el kual los ashkenazim son los desendyentes de los Khazares. Si desyenden de los Khazares, deke avlan una lingua almana i no la lingua turka de los Khazares

Despues de estas todas migrasyones de djudyos, ayegamos al siglo 19, ke va ser en toda la Evropa del Este, sovre todo en Rusiya, el siglo de los pogromes.

De muevo, miles de djudyos se van a fuir, la mas grande parte verso los Estados Unidos ande van a ser milyones. Es el siglo ande los presyonistos i syonistos kyeren embiyar djudyos en Palestina, provinsya turka. Unos kuantos se van, i forman un kueshko de l prezensya djudiya en Palestina

En el siglo vente, kuando vyenen los nazis al poder, los djudyos de Almanya se esforsan de pueder fuir el pais kuando es dainda posivle, i se apersiven ke dingunos los kyere akojer. Kada pais serra sus fronteras, i acheta solo unos kuantos zavalis.

Mizmo la Amerika tan ospitalyera a serrado sus fronteras despues de los evenimyentos ke an segido la krizis de 1929, ke echan a la kaye milyones de ovreros i empyegados sin lavoro.

Los paizea oksidentales organizan en djulyo 1938 en Evian, sivdadika de Fransya, una konferensya internasyonala kon 32 paizes sovreel akojimyento de los refujyados djudyos de la Almanya nazi. Ama nada sale de esta konferensya, ande el reprezentante del governo franses, Edouard Daladier, va mizmo asta dizir: “Dinguno de los Estados myembros del Komité kontesta al Governo Alman el derecho absoluto de tomar kon sus suditos mezuras ke son de su sola responsabilidad”…

El 13 de mayo 1939, un vapor alman yamado Saint-Louis se va de Hambourg verso Cuba kon 963 refujyados djudyos almanes. Tyenen visas de la embashada de Cuba en Almanya. Ayegados en Cuda, afillu los visas, los djudyos son refuzados. Aprovan los Estados Unidos i el Canada, ke los refuzan tambyen, i deven aboltar en Evropa. Finalmente los paizes oksidentales se van a espartir estos djudyos.

Los refujyados djudyos fuyendo por la Rumaniya verso la Turkiya i Palestina no tendran el mismo mazal, si se puede dizir ke los del Saint-Louis tuvyeron mazal. Ya vos konti aki la suerte trajika de los refujyados de los vapores Salvador i Struma, ke arrepushados sin piyadad por los turkos se batirearon: Mas de 200 muertos aogados en el Salvador, i todos los del Struma, kijo dizir 769, menos uno ke fue salvado i pishin metido en prezo komo entrado illegalmente en Turkiya.

Despues de la gerra los djudyos kijeron irse en Palestina okupada por los Inglezes ke refuzavan la entrada. Akodrarse de la istorya del vapor Exodus.

Enfin en 1948 renasyo el Estado de Israel ke arresivyo syenes de miles de djudyos arrondjados de los paizes arabos. Otra migrasyon!

En esto todo, vos avli solo de djudyos, ama uvo munchas otras migrasyones: ya konosesh, por egzemplo, los boat people del Viet Nam i del Cambodge.

Oy son miles de refujyados de Sirya i de Afrika ke kyeren entrar en Evropa.

Por siguro, la membransa de todo lo ke vengo de kontarvos deve azermos pensar a los migrantes de oy. Kuando oyemos ke tantos migrantes se aogaron en la mar porke eran en un vapor ke se batireo, komo no akodrarmos de los aogados djudyos del Struma o del Salvador?

Vos kyero meldar el ermozo teksto ke eskrivyo a este propozito (en franses) el haham Daniel Farhi el 11 de septyembre de este anyo en su letra semanala:

“Entyendo muy byen las rezervas i el kudyado de algunos a propozito de estas masas de refujyados – veluntaryos o no – ke vyenen chaptear a las puertas de una Evropa ke esperan ospitalyera. Las yamaduras a la vijilansya de estos algunos no deven frenar el eslancho de jenerozidad ke an kavzado syertas imajenes. Mi konviksyon intima, yene, es ke mijor vale yerrarse en dando a uno ke no tyene menester ke yerrarse en no dando a uno ke tyene menester. En el primer kavzo, vas a ser enganyado, en el sigundo, inumano. A mis munchos amigos ke formulan fuertes rezervas sovre el akojimyento de refujyados de la gerra sivil de Sirya i de las de Daesh, akonsejo de ser jenerozo, ama pasando por kanales siguros i rekonosidos komo los ke son propozados por el governo i syertas institusyones komunitaryas. Me aserko de otra parte de las palavras del hahambashi de Fransya ke mos akodra muestro propyo pasado i mos roga de no kedarmos sodros, syegos i sakates delantre de una grande mizerya umana”.

Ansina se eskapa mi meldadura del teksto del haham Daniel Farhi, i kon eya de mi emisyon.

Es ke los arabos ayudados por djudyos se amostraran despues mas agradesyentes verso los djudyos? Esto es otra kuestyon, ama, komo diziya el padre de Victor Hugo: “Dale yene de bever…”

Al djueves ke vyene, si kyere el Dyo!