Orhan Pamuk- El Nobel de la Literatura

Por:
- - Visto 361 veces

“Pintar es el silensyo de la miente i la muzika de la vista”
“Lavora duro en el silensyo i desha tu reushitad ser el bruido”
“Kada koza es difisil antes de ser fasil”
“No kontes los diyas, aze de manera ke los diyas konten”
“El sekreto de los autores no es la inspirasyon…. Esto viene de suyo! Es la pasensya i sus obstinasyon !”
“Los verdaderos muzes son lugares ande el tiempo se transforma en espasyos.”
O. PAMUK

ORHAN PAMUK nasyo en Istanbul en 1952. Es el segundo ijo nasido en una famiya rika, enstruida i sekularya. Se engrandesyo en Nisantas, un baryo ande bive la krema de la sosyetad Turka i minoritarya. Es uno de los novelistos postmodernos los mas meldados en el mundo entero i en Turkiya por seguro. Des de 1983 fina oy eskrivyo 24 livros, munchos de entre eyos fueron traduizidos fina 60 linguas. Su ermano SEVKET PAMUK es un famozo Profesor ekonomisto muy konosido en los Estados Unidos, ande izo sus estudyos, i en munchos otros payizes.

PAMUK es un namorado de Istanbul ande paso su chikes i su manseves. Para mi es la mas ermoza sivdad del mundo ! No tengo dudas ke todos los ke oyeron de eya o ke la viyeron en fotos dezean vijitarla i respirar sus golores, tokar sus kolores, diskutir kon los ke estan kaminando en las kayes… En kurto bivir unos kuantos dias abrasada a eya, mano en la mano para gozar de los mas interesantes momentos de la vida….


A parte de los innombrables premios, honores, doktoratos en varias universitades, mensyones, gano en 2006 la mas grande honor de la literatura, en arresivyendo el presyozo i tan dezeado NOBEL ke es el suenyo de todos los eskritores. Fue kritikado en la prensa Turka ke lo akuzo de ganar su NOBEL por aver deklarodo ke el genosidyo de los Armenis es una realitad historika… No fue del gusto de siertos klanes por ser sekularyo i un amante de la kultua del oueste tambien….

Es un hombre ekstraordinaryo, una persona modesta i muy bien edukada. Yo fui durante 6 anyos la asistenta de su padre Gunduz Pamuk, el Direktor general de AYGAZ i el viniya a vijitarmos en muestra ofisina de vez en kuando. Lo konosi en su primera manseves i puedo afirmar ke no era un kualker chico ! Siempre pensi ke iva ser un grande artisto porke me namorava de kada una de sus pinturas. Teniya un talento raro por un adolesante de su edad…

Yo lo admiro i adoro todo lo ke eskrive… Una pluma de las mas seryozas i valorozas de muestro tiempo por seguro.

PAMUK bivyo largos anyos en Cihangir serka de su Muzeo de la Innosensya, yenno de miles de objektos ke uzavamos en los anyos 40-50 i 60. De su balkon puediya ver la Marmara fina las izlas i el Bosforo, los bodres de la kosta Aziatika kon el ponte illuminado komo una guirlanda de diamantes los noches…. Oy bive en su luksuozo apartamento en Nisantas ande biviya kon sus paryentes.

Me demandaron si PAMUK era antisemito… Antisemito no lo es ma por sierto ke tomariya el partido de sus korrelijyonaryos. No es normal ? Si era el kontraryo, mozotros no ivamos tomar el partido de un puevlo djudio ? No kreyo ke Orhan Pamuk seya antisemito. No, de vedra ke no ! No mas de kualker otro… Es humano en sus penseryos i un hombre aklarado kon muncha inteligensya. Porke ke mos kera bien ? Ma…De aya a odyarmos ay muncho kamino. Ansina lo penso yo…. Kon esto, syendo una persona derecha, esto kuaji segura ke devriya apresyar todo lo ke Israel logro, sus esfuersos para adelantar la savyedura i el saverisyo en el mundo.

Lo ke es interesante i kuryozo aki es ke, komo una madre ke puede dizir lo ke no ama en su kreatura, ma ke seriya loka de inyervos si otro dize lo mismo, yo, puedo avlar de todo esto entre mis ermanos, ma puedriya saltar al garon de akel ke diriya kualker koza negativa sovre mi puevlo o mi payis…!

[email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: