En muestros dias kuando la medisina konvensional ya ye yego a ser una medisina akompanyada de una alta teknolojia, en todos sus kampos, munchas de las operasiones mas komplikadas son echas sin tener menester de avrir la tripa del hazino, el sanamiento es muncho mas rapido, i las komplikasiones ke tenian lugar en segito a operasiones shirurjikalas menguaron de manera konsiderable. Esta teknolojia ya es aplikada, desde mas de dos o tres dekadas, en todo lo ke konserna el estado de salud de la mujer prenyada i del embriyo tambien. Por medio de olas ultrasound puedemos ver al bebe, ainda en sus primeros mezes, en la tripa de su madre, i mas ke esto puedemos saver kual es su sexo, si el no sufre de algun defekto, i mizmo en siertos kavzos, por medios tekonolojikos muy adelantados, operar al embriyo ainda en la tripa de su madre, afin de salvarle la vida, antes de su nasimiento. I no kale dicho ke ya son diezenas de anyos ke, en todos los paizes adelantados, los partos ya no tienen mas lugar en kaza sino ke en ospitales, kon salas bien ekipadas i sterilizadas, basho el kontrolo de medikos i infirmieras ke estan prezentes durante el parto.
En el pasado leshano, aun ke muestras nonas i sus madres no tenian estas teknolojias, es bueno saver de komo eyas se rijian i ke eran las praktikas uzadas para saver el sexo del bebe, kestion muy importante, indimas si la prenyada era primeriza, i ke “teknikas” uzavan para luchar kontra la sterilidad de la mujer, o para fasilitar el parto , i mas…
Las repuestas a estas demandas las topimos en el livro “Uzos i kustumbres de los sefadies de Saloniko” de Michael Molho.
Diezenas de anyos atras las famiyas de un par rezin kazado asperavan kon despasensia oyir la buena notisia ke eya ya esta prenyada. Seguramente ke el dezeo del padre era de tener un ijo i puede ser ke mas, siendo ke los varones son los ke perpetuan el nombre de famiya i los ke diran el Kadish, despues de la muerte de sus djenitores. El nasimiento de un ijo era la grande alegria del padre mientres ke una ija era resivida kon yelor siendo ke el padre devia aprontar grandes sumas de moneda para kazar a su ija, komo puedemos ver del refran ke dize “ija de kazar, nave d’enkargar”.
La prenyada era arodeada de su madre i esfuegra ke la kudyavan i tambien de su marido ke le traiya de lo muncho i de lo bueno para komer, defendiendole de alevantar kozas pezgadas para no kavzar un movito.
Una de las superstisiones ke la madre transmetia a su ija durante los mueve mezes del prenyado, era de deshar aviertas las puertas de almarios, otros mobles i mizmo las puertas de kaza. De esta manera kreian ke el parto sera fasil, sin dingun obstakolo.
“Le dezeo a la prenyada inieve tostada” dize el refran. Se kreye ke durante los 9 mezes del prenyado la mujer dezea komer kozas ke a la vista no estan en la sezon o ke son difisil a obtener. Avia miedo ke si no komera lo ke le dezeo la alma, podria mover a su kreatura. . Para evitar un semejante “dezastre” i para kitarle la gana le dizian ke el fruto o el lugumbre ke le dezeo estan guzanados.
Kualo azian anyos atras para saver el sexo del embriyo? Kestion kardianla i muy importante, indimas si la rezin kazada era primeriza.
Oy ya puedemos ver al bebe en la tripa de la madre i tambien saver si sera ijo o ija por medio del ultrasound, resivir un CD kon todas las fotos de esta operasion, lo ke mos parese koza muy natural. Ma muestras nonas tenian praktikas muy kuriozas para saver el sexo del embriyo: se metia sovre el fuego la vesikul bilier de una gayina: si se avria aziendo oyir una “eksplozion” es ke iva naser ijo i si se avria sin azer bruido iva ser ija, ke devia salir al mundo silensiozamente, sin grande alegria.
Un otro medio ke se pensava ke podia influir al sexo del embriyo era de yamar todos los viernes el nombre maskulino ke devia resivir el rezin nasido. La mujer prenyada ke todo su dezeo era de dar satisfaksion a su marido, kreia ke afuersa de yamar durante 9 mezes este nombre le naseria un ijo varon.
Si una rezin kazada no kedava prenyada ainda en los primeros mezes de su kazamiento, la primera a tener miedo era la esfuegra, pensando ke no tendran una inyeta o inyeto ke yevarian su nombre o el de su marido. Devemos aklarar ke en akeyos tiempos dinguno no pensava ke era posible ke el marido tambien tenga un defekto. Toda la kulpa era echada a los ombros de la djoven mujer. Por falta de jinekologos ke, kon sus sensia ya topan oy remedios a este problema, i no teniendo otra solusion, las mujeres de la famiya, madre, esfuegra, ermanas i kunyadas bushkavan los remedios en la majia, en las estreyas, en la santedad de los rabinos ke podian dar una bendision o un amuleto i se adresavan tambien a mujeres aedadas ke ya konosian remedios majikos kontra la sterilidad. A vezes, por buena suerte, estos remedios davan rezultados pozitivos.
Aki algunos de los remedios a los kualos rekorrian:
En la noche del 15 del mez de Shvat ke es la fiesta de las frutas i la natura, segun una kreensia popular, las plantas i los arvoles se abrasan i se aunen. En esta noche enkolgavan entre dos arvoles tres jarros: el uno kon agua dulse, el otro kon agua rozada i el treser kon agua de pozo. A la manyana la mujer devia bever de estas aguas ke fueron testigos a la fekundasion de las plantas, kreyendo ke estas aguas meteran fin a su estado de sterilidad. Si este tratamiento no dava rezultados, no keriendo asperar otrun anyo, asta la proksima fiesta de Tu Bishavat, el djoven para se aleshava de su sivdad i pasava a una otra sivdad, akompanyado por una mujer vieja. Eya atava, kon un kordon el braso derecho del ombre al braso siedro de la mujer, i los azia pasar por las siete puertas ke avia en las murayas de esta sivdad, todo en pronunsiando palavras mistikas afin de atrayer sovre el par poderes sovrenaturales. Despues de este akto el marido i mujer ivan a bever agua yelada de una fuente, siendo ke en los puevlos del Oriente la agua yelada era konsiderada komo simbolo de fekundasion.
Este paseo, leshos de sus sivdad se repetava tres vezes en diversos dias.
Otro remedio era de dar a komer a la mujer un pedasiko del kuero de la sirkunsizion de un rezin nasido.
Si estos remedios no davan rezultado, se adresavan a komadres ke tenian eksperiensa en este kampo. Eyas aprontavan mesklas i bevidas espesiales ke kontenian materias eksitantes i afrodisiakas. Una de estas mesklas era preparada kon guevos krudos de una gayina kon plumas pretas, kon raki fuerte i almastiga i si esto no abastava, se apegava a la mujer, en la rejion de los renes, un kataplasma echo kon guevos i almastiga.
Si una mujer movia mas de una vez, rekorrian a otros remedios mistikos: enkolgavan en los kuatro kantones de la kamareta kemeot (amuletos), ke kontenian entre otras kozas, un pargamino sovre el kual eskrivian formulas i sinyos kabalistikos. Otra praktika era de arodear siete vezes, un kordon en la tomba de un rabino konosido por su santedad. Este mizmo kordon se atava despues a la tripa de la prenyada, arodeandolo siete vezes. Se kreia ke este kordon empapado de santedad protejara al embriyo a su nasimiento. Este kordon yamado “detenedor”, podia servir a otras mujeres mas.
I en fin ya yegava la ora del parto… La komadre ya vinia al momento ke la avertian, ma no siempre los partos eran fasil. La parida echada en la kama sufria de fuertes dolores..Se azian orasiones al lado de la mezuza, se yevava azete al kal, i simbolikamente se avria en kaza todo lo ke tenia puerta, pensando ke esto ayudara a la prenyada a avrirse i deshar salir al fruto de su tripa. Si la mujer kontinuava a tener fuertes dolores yamavan al marido, ke le dava dadikas sovre la tripa diziendo “Yo te kargi ke el Dio te deskarge”.
En kavzos mas ekstremos, i para liberarla de sus dolores metian una roza mojada sovre el ombligo de la prenyada. Si los petales se avrian mas i mas era sinyo ke ya yego el momento del parto. I en fin, en ora buena, ya se sintia el primer yoro del krio, ke si era ijo era resivido kon grande alegria i la bendision tradisional “be siman tov”, si era ija dizian “mazaloza i venturoza ke sea”.
Oy, esta kestion preokupa los djenitores menos ke en el pasado. Lo importante es ke los rezin nasidos salgan a un mundo ande puedan bivir en paz, ser djente buena, kontribuir a la umanidad kon sus sensia i ser dinyos de sus famiyas i de sus patria.
Artículos Relacionados: