Una Luvya fuerte kon relampagos kaye,
Yo no veo ningunos kaminar en la kaye,
Un derredor muy asolado,un brusko dia,
Un sielo eskuro , esto sin alegria.
Me mankava sus miradas,su fizionomia,
Para mi era mi vida,i la alma mia.
Mi oido en sus pasos,i mis ojos kansos,
Alegrias siento mismo de bruidos falsos.
La luvya kontinua,esto kon dezespero
La ora komo kedada,inyervozo de aspero.
De la kaye se siente un gato ke mauya,
No ay otra boz mas k’el bruido de la luvya.
Kedi fin la noche triste sin pueder dormirme
Abatido,sin gozo, sin saver onde irme.
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Artículos Relacionados: