Era su amor solo lo ke me ambisyona Su boz i su nombre tanto me emosiona, Nunka me emportava lo ke eya era, La konsideri andjela komo si fuera.
Echi sus malos aktos del tino al olvido, Lo ke dezian no sentia mi oido. Kuando me rekuerdo de sus kulpas…yoro Porke eya era la mujer ke adoro.
Sus ojos senteyavan,su boka de rizas, Sus manos,sus karas eran blankas i lizas. Akeas miradas kon su boz i dulsura Azian mas atraktiva su ermosura.
Kuando rekuerdo akea maldicha ora, No puedo olvidar la pena ke me devora? El rankontrarla kon otros medya dezmuda Tremblando la mirava kon mi avla muda.
Maldigo al fuego ke muncho me enflami Por tanto mas hue ordinarya mas la ami.
Acerca de Haim Vitali Sadacca
So nasido en el 11/9/1919. En el 1990 me travi de mi negocio por el amor de mis ijos. Hacia importaciones de grasa i de productos chemicales para fabricacion de jabon de los Estados Unidos durante muchos anyos. En mismo tiempo era reprezentante de una factoria en Italia que hacia machinas para hacer jabon.Disde anyos ke mis dos ijos bivian con sus familias el uno en NY Long island,i el otro en Montreal. Mi esposa i yo empisimos a bivir 5 mezes en el Canada, 3 mezes en Florida y 4 mezes en Istanbul. Ay 22 anyos ke tenemos esta vida,para gozar de las affecciones de nuestros ijos y nietos.Disde mi chikes ke me plasia la literatura,eskrivia poesias en Turko,en Fransez, i en Judeo-Espanol. Este hobby me da una enerjia en esta edad avansada.Antes 2 anyos la Foundation for the Advancement of Sephardic Studies and Culture New York, publico mi livro\Un Ramo De Poemaskon lastraductiones echas en Inglez de parte de David Fintz Altabe, y lo regali a esta organizacion. con la pensada ke puedeser dare una mano a la reanimacion de nuestro Judeo/Espanol(Ladino) ke avlamos los sefaradis en Turquia y en muchos paises.
Artículos Relacionados: