Ingenuo i falsamente naivo, Djoha mos konta kuentizikos ande remarkamos una filozofiya a vezes absurda i a vezes muy ingeniosa. Se dize ke nasyo en Turkiya en 1208 i bivyo fina 1284 ma su fama se espande de los Balkanes a la Mongolia i sus aventuras son renomadas en diezenes de linguas, inlkluido el Serbio-Kroatio, el Persano, el Turko, el Arabo, el Grego i muy munchas otras linguas sin olvidar, por seguro, el Judeo-Espanyol, muestra dulse lingua.
Djoha es un personaje mitad loko i mitad sezudo ! Es el mizmo de los ke se konosen komo Joha, Jha, Djha, Djouha. En Egypto lo konosen komo Goha i es kon sus kuentos ke me durmiyan…. En Turkiya su nombre es Nasreddin Hodja i sus origines no son konosidas. En Persia lo yaman Mollah Nasreddin i en Asia Central Appendi (del Turko “efendi”, Monsieur) ma son siempre los mizmos kuentizikos sovre el ke se kontan.
Estos son kuentizikos kurtos, kon moral, spirituales, absurdos, a vezes satirikos. Es un hombre tanto intellijente ke parese bovo, o, es tanto bovo ke termina por dizir kozas intellijentes…
Munchos autores eskrivyeron sovre Djoha. La ovra de Albert Ades i Albert Josipovici “EL LIVRO DE GOHA” publikado en 1919 illumino mi chikes.
Muestra amiga Malca se dediko a tomar en manos, en un maraviyozo livro en dos linguas, las perlas ke le kontavan sus parientes, su madre Felicie i su padre, el Granrabino, mi maestro, Moshe Meir Levy, los dos en Gan Eden agora…
De su pluma livyana i biva, Malca save topar la justa palavra para divertirmos kon este Djoha a la savor de los Rodeslis.
Estas historyas emosyonantes son tan modernas ke se olvida kuaji ke el personaje tiene solo 800 anyos. Son tan universalas ke, komo mo lo konfiya Malca, la metropol la mas importante de la Afrika del Sud yeva su nombre : La sivdad de Djoha, Djohanesburg.
Grasyas, Malka, para darmos este trezoro de una profunda savyedura i de una fina humor. Grasyas por azerme bivir mi segunda manseves.
Moise Rahmani Z’l
Mi muy amado amigo, el duenyo de Sefarad.org (Belgika) ke malorozamente serro sus puertas dospues de 25 anyos de un lavoro kolosal, a la muerte de Moise…. Ke pekado ! Lo nombro aki kon muncho karinyo i eskarinyo.
I…. Un kuentiziko de Djoha para arrebivir muestras memoryas de chikes ! Esta es mas deskonosida de las otras ke todos konosen…
TOMA MI MANO
Un diya Djoha se fue a un piknik kon sus amigos. Estavan kaminando al bodre de un rio kuando uno de los amigos se arezvalo al rio profundo. No saviya nadar. Estava mostrando sinyos de grande espanto i disparesyendo unos segundo en la agua ! Sus amigos sin asperar le tendyeron sus manos para salvarlo.
– Damos tus manos… Damos tus manos, te vamos a salvar, le disheron.
Ma el del rio ni bolto su kara ! Estava reelamente para agoarse… A este momento Djoha koryo i le tendyo su mano :
– Aferra mi mano. Te vo salvar !
El hombre aferro la mano de Djoha i kon el ayudo de los otros amigos lo travaron a tierra.
Le demandaron a Djoha komo el hombre no tomo la mano de los otros i sin asperar del todo le dyo la mano a Djoha. Djoha se riyo ! Les respondyo :
– Vozotros no lo konosesh. Este hombre es eskaso hazimiento ! No da nada. Es auzado a tomar solo. Le dishites “damos tu mano” ma yo le dishe “toma mi mano” Es esto la diferensya !…..
Artículos Relacionados: